ޑިބާލާ ބޭނުންވަނީ ހަފްތާއަކު 350،000 ޕައުންޑު ލިބޭގޮތަށް ޔުނައިޓެޑަށް ބަދަލުވާން

ޔުވެންޓަސްއަށް ކުޅެމުން އަންނަ އާޖެންޓީނާގެ ފޯވާޑް ޕައުލޯ ޑިބާލާ ބޭނުންވަނީ ހަފްތާއަކު 350،000 ޕައުންޑު ލިބޭގޮތަށް ޔުނައިޓެޑަށް ބަދަލުވާން ކަމަށް ރިޕޯޓްތައް ބުނެފިއެވެ.

އިނގިރޭސި ނޫސްތަކުން ބުނީ، ޑިބާލާ ހޯދުމަށް ޔުނައިޓެޑުން ބޭނުންވާ ކަމަށާއި، އެގޮތުން ހަފްތާއަކު 350،000 ޕައުންޑުގެ މުސާރައެއް ލިބޭގޮތަށް އެ ކްލަބަށް ބަދަލުވާން ޑިބާލާ ހުރީ ތައްޔާރަށް ކަމަށެވެ.

މި މުސާރައަށް ޑިބާލާ ޔުނައިޓެޑަށް ބަދަލުވެއްޖެނަމަ، އޭނާ ވެގެންދާނީ އާސެނަލްގެ މިޑްފިލްޑަރ މެސުތު އޮޒިލްއާއެކު ޕްރިމިއާ ލީގުގައި އެންމެ ބޮޑު މުސާރައެއް ލިބޭ ދެވަނަ ކުޅުންތެރިޔާއަށެވެ.

ޔުވަންޓަސްއާ 2015 ވަނަ އަހަރު ގުޅުނު އުމުރުން 25 އަހަރުގެ ޑިބާލާ ހޯދުމަށް ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ސްޕެއިންގެ ޗެމްޕިއަން ބާސެލޯނާ އާއި އިންޓަ މިލާންވެސް ހިމެނެއެވެ.

ޔުވެންޓަސްއާ އެކު ޑިބާލާ ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، ރިޕޯޓްތައް ބުނާގޮތުން އޭނާ ހުރީ އެހެން ކްލަބަކަށް ބަދަލުވާން ތައްޔާރަށެވެ.

ޔުވަންޓަސް އަށް މިހާތަނަށް ކުޅުނު 182 މެޗުގައި 78 ލަނޑު ކާމިޔާބުކޮށްފައިވާ ޑިބާލާ ވަނީ އެ ކްލަބާ އެކު ތިން އިޓާލިއަން ލީގު، ތިން ކޮޕާ އިޓަލިއާ އަދި އެއް އިޓާލިއަން ސުޕާ ކަޕް ކާމިޔާބުކޮށްފައެވެ.

އާޖެންޓީނާ ގައުމީ ޓީމަށް 24 މެޗު ކުޅެފައިވާ ޑިބާލާ ވަނީ މިދިޔަ ދެ ސީޒަނުގައި ވެސް އިޓަލީ ލީގުގެ ޓީމް އޮފް ދަ އިޔާގައި ހިމެނިފައެވެ. އަދި އޭނާ ވަނީ މިދިޔަ ސީޒަނުގައި ކޮޕާ އިޓަލިއާގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމު ވެސް ހޯދާފައެވެ.