ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ބްރެޒިލް ޑިފެންޑަރު މަރްކީނިއޮސް ގެނައުމަށް މެންޗެސްޓާ ޔުނައިޓެޑުން 70 މިލިއަން ޕައުންޑު ހުށަހަޅަން އުޅޭ ކަމަށް ރިޕޯޓްތައް ބުނެފި އެވެ.
ގޯލްޑޮޓްކޮމް އިން ބުނީ ޔުނައިޓެޑުން އުމުރުން 22 އަހަރުގެ މާރްކީނިއޮސް ހޯދުމަށް ބިޑެއް ހުށަހަޅާފައި އަދިނުވާ ކަމަށާއި، އެހެންނަމަވެސް އެ ކްލަބުން އޭނާ ހޯދުމަށް ޕީއެސްޖީއާ މަޝްވަރާ ކުރުމަށް މަސައްކަތްކުރަމުންނަ ކަމަށެވެ.
މީގެއިތުރުން ގޯލްޑޮޓްކޮމް އިން ބުނީ އަންނަ ޓްރާންސްފާ މާކެޓްގައި ކުޅުންތެރިޔަކު ވިއްކާލަން ޕީއެސްޖީން ވިސްނާފައިނުވާ ކަމަށާއި، އެ ކްލަބުން ޔުނައިޓެޑާ މަޝްވަރާ ކުރަންވެސް އެއްބަސްވާނެ ކަމަށް ނުބެލެވޭ ކަމަށެވެ.
ޕީއެސްޖީއާއެކު ކުރިޔަށް އޮތް ދެ އަހަރު އެއްބަސްވުން ހަދާފައިވާ މަރްކީނިއޮސް ހޯދުމަށް މިދިޔަ ޓްރާންސްފާ ބާޒާރުގައިވެސް ޔުނައިޓެޑުން މަސައްކަތްކުރި ކަމަށް ރިޕޯޓްތައް ބުނާއިރު، ޕީއެސްޖީން އަންނަނީ މަރްކީނިއޮސް ޔުނައިޓެޑަށް ވިއްކާލަން ދެކޮޅު ހަދަމުންކަމަށްވެސް ރިޕޯޓްތައް ބުނެއެވެ.
ގޯލްޑޮޓްކޮމް އަށް ދިން އިންޓަވިއުއެއްގައި މަރްކީނިއޮސްގެ ބައްޕަ މާކޮސް ބަރޮސް ބުނީ ޕީއެސްޖީގައި އޭނާގެ ދަރިފުޅު ހުރީ ފައިސާއަށް ނޫން ކަމަށާއި، ޕީއެސްޖީން އޭނާ އަކީ ޓީމަށް މުހިންމު ކުޅުންތެރިޔެއްކަން ދައްކައިދޭންޖެހޭ ކަމަށެވެ.
ބްރެޒިލް ގައުމީ ޓީމަށް 17 މެޗު ކުޅެދީފައިވާ މަރްކީނިއޮސް ވަނީ ޕީއެސްޖީއާ އެކު ތިން ލީގު ތަށި ކާމިޔާބުކޮށްފައެވެ.
