ކުރީގެ ނައިބު ރައީސް އަހުމަދު އަދީބު, ވަގަށް އިންޑިއާއަށް އެތެރެވާން އުޅެނިކޮށް އެ ގައުމުގެ ފުލުހުން ހައްޔަރުކޮށްފި އެވެ.
ރާއްޖެއެމްވީއަށް އެނގިފައިވާ ގޮތުގައި ޓަގު ބޯޓެއްގައި އަދީބު އިންޑިއާއަށް ފުރާވަޑައިގަތީ ޖުލައި މަހުގެ 27 ވަނަ ދުވަހުއެވެ. އަދި އިންޑިއާއިން އަދީބު ހައްޔަރު ކޮށްފައިވަނީ ޖުލައި މަހުގެ 28 ވަނަ ދުވަހުއެވެ.
އަދީބު ފުރާވަޑައިގެންނެވި ބޯޓުގެ ފަޅުވެރިއަކު ރާއްޖެއެމްވީއަށް ވަނީ އެކަން ކަށަވަރު ކޮށްދީފައެވެ. އޭނާ ބުނީ އަދީބު މިވަގުތު ހުންނެވީ އިންޑިއާގެ އިމިގްރޭޝަންގެ ބެލުމުގެ ދަށުގައި ކަމަށެވެ.
އިންޑިއާގެ ޓުޓްކޮރިން ބަނދަރުން އެ ގައުމަށް އެތެރެވާން އުޅެނިކޮށް އަދީބު ހައްޔަރު ކޮށްފައިވާއިރު އިންޑިއާގެ ނޫސްތަކުގައިބުނެފައިވަނީ އަދީބު އިންޑިއާއަށް އެތެރެވާން އުޅުނީ ޓަގް ބޯޓެއްގެ ފަޅުވެރިއަކަށް ވެގެން ކަމަށެވެ. އެނޫހުން ރިޕޯޓް ކޮށްފައިވާ ގޮތުގައި ވަރގޯ-9 ކިޔާ އެ ޓަގުބޯޓުގައި 9 ފަޅުވެރިއަކު ތިއްބެވެ.
އިންޑިއަން އެކްސްޓަރނަލް އެފެއަރޒް މިނިސްޓްރީގެ ތަރުޖަމާނު ވިދާޅުވީ އަދީބު ހައްޔަރުކުރިކަމުގެ މައުލޫމާތު ކަށަވަރުކުރުމުގެ މަސައްކަތް ޓެމިލް ނާޑޫ ސަރުކާރާ ގުޅިގެން ކުރަމުން އަންނަ ކަމަށެވެ.
އަދީބު ހައްޔަރު ކޮށްފައިވާއިރު ފުލުހުން ތަހުގީގު ކުރަމުންދާ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން(އެމްއެމްޕީއާރުސީ)ގެ މައްސަލައިގައި އެ އިދާރާއަށް އޭނާ މީގެ ކުރިން ދިޔައީ އެއްބާރުލުން ދެއްވަމުންނެވެ. އެނގިފައިވާ ގޮތުގައި އަދީބު އެންމެ ފަހުން ފުލުހުންގެ އިދާރާއަށް ތަހުގީގަށް ވަޑައިގެންފައިވަނީ މިދިޔަ ހަފްތާ ތެރޭގައެވެ. އޭގެ ފަހުން މިހަފްތާގެ ހޯމަ ދުވަހަށް ފުލުހުންގެ އިދާރާއަށް ހާޒިރުވާން އެންގި ކަމަށާއި ނަމަވެސް އެދުވަހު ވަޑައިނުގެންނެވުނީ އާއިލާއާއިއެކު ރިސޯޓަކަށް ވަޑައިގެންނެވުމުން ކަމަށް ފުލުހުންގެ އިދާރާއަށް މައުލޫމާތު ދެއްވާފައިވާ ކަމަށާއި ބުދަ ދުވަހު އެއިދާރާއަށް ހާޒިރުވެވަޑައިގަންނަވާނެ ކަމަށް ވިދާޅުވި ކަމަށް މައުލޫމާތު ލިބިފައިވެއެވެ. ނަމަވެސް ބުދަ ދުވަހު އަދީބު ހާޒިރުވާން އެންގުމުން ފުލުހަށް އަދީބު ފިއްލަވަން މަސައްކަތް ކުރެއްވީ ކޮން ސަބަބަކާއި ހެދި ކަމެއް ސާފެއް ނުވެއެވެ.
އަދީބު އިންޑިއާއަށް ފިއްލަވައިގެން ވަޑައިގެންފައިވަނީ އޭނާގެ މައްޗަށް ކޮށްފައިވާ 33 އަހަރުގެ ޖަލު ހުކުމްތަކުން ކޯޓުތަކުން ބާތިލްކޮށް އޭނާ މިނިވަންވެފައި ވަނިކޮށެވެ.
ހައިކޯޓުން ބާތިލްކުރި އަދީބުގެ 33 އަހަރުގެ ހުކުމްގެ ތެރެއިން ޚިޔާނާތްތެރިވި މައްސަލައިގައި އަދީބުގެ މައްޗަށް އިއްވާފައިވާ އަށް އަހަރުގެ ޖަލު ހުކުމުގެ މައްސަލަ ދައުލަތުން ސުޕްރީމް ކޯޓުގައި އިސްތިއުނާފު ކޮށް އަދީބުގެ ޕާސްޕޯޓް ހިފެހެއްޓުމަށް ސުޕްރީމް ކޯޓުގައި އެދިފައިވެއެވެ. އަދި އެމައްސަލައިގައި ޖޫން މަހުގެ 24 ވަނަ ދުވަހު ސުޕްރީމް ކޯޓުން ވަނީ ދައުލަތުން ވަގުތީ އަމުރަކަށް އެދިފައިވާތީ ގާނޫނީ އުސޫލުތަކާއި މައްސަލައިގެ ބާވަތަށް ރިއާޔަތްކޮށް، އެ މައްސަލަ ސުޕްރީމް ކޯޓުން ނިމެންދެން ނުވަތަ އެހެން ގޮތަކަށް އަންގަންދެން އަދީބުގެ ޕާސްޕޯޓް ހިފަހައްޓަން އިމިގްރޭޝަންގެ މައްޗަށް އަމުރުކުރާ ކަމަށް ބުނެފައެވެ.
އަދީބަށް ބޭސްފަރުވާގެ ފުރުސަތު މިސަރުކާރުން ދިން އިރު އަދީބު މިނިވަނެއް ނުވެއެވެ. މިދިޔަ ޖޫން މަހުގެ 14 ވަނަ ދުވަހު ބޭސްފަރުވާއަށް އިންޑިއާގެ ޕޫނޭއަށް ވަޑައިގެންނެވުމަށް ފަހު ރާއްޖެ ވަޑައިގެންނެވީ ޖުލައި މަހުގެ ހަވަނަ ދުވަހުއެވެ. އޭރު އެމަނިކުފާނާއި އެކު މޯލްޑިވްސް ކަރެކްޝަނަލް ސަރވިސްގެ މުއައްޒަފުންނާއި ފުލުހުން ވަނީ ފޮނުވާފައެވެ.
ކުރީގެ ރައީސް އަބްދުﷲ ޔާމީންއަށް ކުރާ މަނީ ލޯންޑަރިންގެ ދައުވާގައި ދައުލަތުން ޔާމީނާއި ދެކޮޅަށް ހުށައަޅާފައިވާ ހެކިންގެ ތެރޭގައި އަދީބު ވެސް ހިމެނިވަޑައިގަންނަވައެވެ.
