ރެއާލުން ބޭލް ޗައިނާގެ ކުލަބައް ވިއްކައެއް ނުލާ!

ވޭލްސްގެ ކެޕްޓަން ގެރެތް ބޭލް ޗައިނާގެ ކުލަބެއް ކަމަށްވާ ޖިއާންސޫ ސަނިން އަށް ވިއްކާ ނުލުމަށް ރެއާލުން ނިންމައިފިއެވެ.

ތިރީސް އަހަރުގެ ގެރެތް ބޭލް ޗައިނާގެ ކުލަބެއް ކަމަށްވާ ޖިއާންސޫ ސަނިންއަށް ސޮއި ކުރުމާއި ގާތްވެފައި ވަނިކޮށް ރެއާލުން އެ ޓްރާންސްފަރ ހުއްޓުވީ ރެއާލްގެ ކޯޗު ޒައިނުއްދީން ޒިދާން ބުނެގެންކަމަށް މީޑިއާ ރިޕޯޓްތައް ބުނެއެވެ. ކޯޗު ޒިދާން އާއި ބޭލްގެ ގުޅުން ގޯސްވެފައި ވާއިރު މި ފަހުން ކުޅުނު ގިނަ މެޗުތަކުގައި ބޭލް ފެނިގެންދަނީ ރެއާލްގެ ބެންޗުންނެވެ.

މީޑިއާ ރިޕޯޓްތައް ބުނާ ގޮތުން ރެއާލްގެ ކޯޗު ޒިދާން ބޭލް ވިއްކާލަން ނިންމި ނިންމުން ބަދަލުކުރީ ރެއާލްގެ އެޓޭކިންގް މިޑްފިލްޑަރ މާކޯ އެސެންސިއޯ އަށް އަނިޔާވުމާއި ގުޅިގެންނެވެ.

ރެއާލްއަށް 2013 ވަނަ އަހަރުގެ ސީޒަނުގައި ބަދަލުވި ބޭލް ވަނީ އެ ކްލަބާ އެކު ހަދާފައިވާ އެއްބަސްވުން 2016 ވަނަ އަހަރު 2022 ގެ ނިޔަލަށް އާކޮށްފައެވެ.

ސައުތުހެމްޕްޓަން އިން 2005 ވަނަ އަހަރުގެ ސީޒަނުގައި ކެރިޔަރު ފެށި ބޭލް ވަނީ ޓޮޓެންހަމް ހޮޓްސްޕާއަށް 2007 ވަނަ އަހަރުގެ ސީޒަނުގައި ބަދަލުވެ، އެ ކްލަބުގައި ހަ ސީޒަން ހޭދަކޮށްފައެވެ.

ޓޮޓެންހަމްގެ އެންމެ މޮޅު ޒުވާން ކުޅުންތެރިޔާގެ މަގާމު ދެ ފަހަރު އަދި އެންމެ މޮޅު ކުޅުންތެރިޔާގެ މަގާމު އެއް ފަހަރު ހޯދާފައިވާ ބޭލް ވަނީ އެ ކްލަބަށް ކުޅުނު 203 މެޗުގައި 55 ލަނޑު ކާމިޔާބުކޮށްފައެވެ.

ބޭލް ވަނީ ރެއާލްއަށް މިހާތަނަށް ކުޅުނު 231 މެޗުގައި 102 ލަނޑު ކާމިޔާބުކޮށް، އެ ކްލަބާ އެކު ހަތަރު ޗެމްޕިއަންސް ލީގު، ތިން ޔުއެފާ ސުޕަ ކަޕް، ތިން ކްލަބް ވޯލްޑް ކަޕް، އެއް ސްޕެނިޝް ލީގު، އެއް ކޮޕަ ޑެލްރޭ އަދި އެއް ސްޕެނިށް ސުޕަ ކަޕް ކާމިޔާބުކޮށްފައެވެ.

ވޭލްސްގެ އެންމެ މޮޅު ކުޅުންތެރިޔާގެ މަގާމު ހަ ފަހަރު ހޯދާފައިވާ ބޭލް ވަނީ ގައުމީ ޓީމަށް މިހާތަނަށް ކުޅުނު 77 މެޗުގައި 31 ލަނޑު ކާމިޔާބުކޮށްދީފައެވެ. އޭނާއަކީ ވޭލްސްގެ ގައުމީ ކެޕްޓަންއެވެ.