ޔުނިވާސިޓީ އޮފް މިޗިގަންގައި ރައީސް ނަޝީދު ތަގުރީރު ކުރައްވައިފި
ތަގުރީރު ކުރެއްވީ ޑޯނިއާ ހިއުމަން ރައިޓްސް ސެންޓާގައި
ޔުނިވާސިޓީ އޮފް މިޗިގަންގައި ރައީސް ނަޝީދު ތަގުރީރު ކުރައްވަނީ
އެމެރިކާގެ ޔުނިވާސިޓީ އޮފް މިޗިގަންގައި ކުރީގެ ރައީސް މުހައްމަދު ނަޝީދު ތަގުރީރު ކުރައްވާފިއެވެ.
ރައީސް ނަޝީދު ތަގުރީރު ކުރެއްވީ ޔުނިވާސިޓީ އޮފް މިޗިގަންގައި ގާއިމްކޮށްފައިވާ ޑޯނިއާ ހިއުމަން ރައިޓްސް ސެންޓާ އަންގަރަ ދުވަހު ބޭއްވި ޕެނަލް ޑިސްކަޝަންއެއްގަ އެވެ.
ރައީސް ނަޝީދުގެ ވާހަކަފުޅުގައި އެ މަނިކުފާނަށް ލިބިވަޑައިގެންނެވި އަނިޔާތަކާއި ސިޔާސީ ހަޔާތް ބައްޓައް ކުރައްވަމުން ގެންދެވި ގޮތުގެ ތަފްސީލް ދެއްވި އެވެ. ސިޔާސީ މަގާމަކަށް ކުރިމަތިލެއްވުމުގެ ކުރިން އެތައް ފަހަރަކު ރައީސް ނަޝީދު ޖަލަށް ލައްވާފައިވާއިރު، ތަގްރީރުގައި ވިދާޅުވީ ރައްޔިތުންގެ މަޖިލީހަށް ހޮވިވަޑައިގަތުމަށް ފަހު ވެސް ޖަލަށް ލައްވައި، އަރުވާލެއްވި އެވެ. އަރުވާލައްވާފައި ހުންނެވިއިރު، މަސްވެރިކަމާއި ދަނޑުވެރިކަން ކުރެއްވި ކަމަށް އެ މަނިކުފާނު ވިދާޅުވި އެވެ.
ރާއްޖޭގެ ސިޔާސީ މަޝްރަހުގައި ހިނގާފައިވާ އަނިޔާވެރި ކަންކަމަށް އަލިއަޅުވާލައްވައި ރައީސް ނަޝީދު ވިދާޅުވީ، އީވާން ނަސީމް ޖަލުގައި މަރާލި ހާދިސާއާ ގުޅިގެން އެ މަނިކުފާނު ރާއްޖެ ދޫކޮށް ސްރީ ލަންކާއަށް ހިޖުރަކުރެއްވި ކަމަށާއި އެއަށް ފަހު އިނގިރޭސި ވިލާތުން ހިމާޔަތް ހޯއްދަވައިގެން ހުންނެވި ކަމަށެވެ. އެ މުއްދަތުގެ ތެރޭގައި އެމްޑީޕީ ވުޖޫދުކޮށް ސިޔާސީ ހަރަކާތް ރާއްޖޭން ބޭރުގައި ހިންގަވަން ފެއްޓެވި ކަމަށް އެ މަނިކުފާނު ވިދާޅުވި އެވެ.
އިނގިރޭސި ވިލާތުގައި ހުންނެވުމަށް ފަހު، އެނބުރި ރާއްޖެ ވަޑައިގެން ކުރެއްވި މަސައްކަތުން ސިޔާސީ ޕާޓީ އުފެއްދުމުގެ ފުރުސަތު ލިބިގެން ދިޔަ ކަމަށާއި މިކަމުގެ ހައްގު ޝުކުރު އޭރުގެ ރައީސް މައުމޫނު އަބްދުލް ގައްޔޫމަށް ދެއްވަން ޖެހޭ ކަމަށް ރައީސް ނަޝީދު ވިދާޅުވި އެވެ. ސިޔާސީ ޕާޓީތައް ފެށުމާއެކު، އޭގެ ކުރިން ހަރަކާތެއް ނެތިފައި އޮތް ސިވިލް ސޮސައިޓީ ވަރުގަދަވި ކަމަށާއި ދައުލަތުގެ މުއައްސަސާތަކަށް ވެސް ބާރުވެރިކަން ލިބިގެން ދިޔަ ކަމަށް އެ މަނިކުފާނު ވިދާޅުވި އެވެ.
ރާއްޖޭގައި ބޭއްވި ފުރަތަމަ ޑިމޮކްރެޓިކް އިންތިހާބު 2008 ވަނަ އަހަރު ކާމިޔާބު ކުރެއްވި ކަމަށާއި ނަމަވެސް ތިން އަހަރަށް ފަހު، އެ މަނިކުފާނު ވެރިކަން ވައްޓާލީ ބަޣާވާތަކުން ކަމަށް ރައީސް ނަޝީދު ވިދާޅުވި އެވެ. އެއީ ވަގުތުން ދުރަށް ދައްކަމުން ދިޔަ ބަޣާވާތެއް ކަމަށް ވެސް އެ މަނިކުފާނު ވިދާޅުވި އެވެ.
ބަޣާވާތަށް ފަހު ބޭއްވި އިންތިހާބު ގަޑުބަޑުކުރަން ކޯޓުތައް ބޭނުންކުރި ކަމަށާއި އިންތިހާބު ފަސްކުރަމުން ދިޔަ ނަމަވެސް، އެ އިންތިހާބުގައި ބަލި ގަބޫލްކުރީ ރައީސް ނަޝީދު ވިދާޅުވި ގޮތުގައި ގައުމު ހަމަޖެހުމެއްގެ ތެރެއަށް ވައްޓާނުލުމަށެވެ.
ރައީސް އަބްދުﷲ ޔާމީން ވެރިކަން ކާމިޔާބު ކުރެއްވުމަށް ފަހު އަލުން ރައީސް ނަޝީދު ޖަލަށް ލެއްވި އެވެ. އެ މަނިކުފާނަށް ޖަލުން ޖަލުން ނުކުމެވަޑައިގެންނެވުނީ ގާނޫނީ ޓީމުން ކުރެއްވި މަސައްކަތާއި އެމްޑީޕީގެ މެމްބަރުން މަގުމަތީގައި ކުރި އިހްތިޖާޖުގެ ސަބަބުން ކަމަށް ރައީސް ނަޝީދު ވިދާޅުވި އެވެ.
"ދަ އައިލެންޑް ޕްރެޒިޑެންޓްސް ސްޓްރަގަލް ފޯ ޑިމޮކްރަސީ އެންޑް އެންވަޔަރަމެންޓަލް ޖަސްޓިސް އިން ދަ މޯލްޑިވްސް" ގެ ނަމުގައި ބޭއްވި ޕެނަލް ޑިސްކަޝަންގައި ރައީސް ނަޝީދާއެކު ބައިވެރިވެވަޑައިގެންނެވީ، މަޝްހޫރު އިންސާނީ ހައްގުތަކާ ބެހޭ ވަކީލު އަދި ރައީސް ނަޝީދުގެ ބައިނަލްއަގްވާމީ ވަކީލެއްގެ ގޮތުގައި މަސައްކަތް ކުރައްވާ ޖެރަޑް ޖެންސާ އާއި މިޗިގަން ޔުނިވާސިޓީގެ ގުދުރަތީ ވަސީލަތްތަކާއި ތިމާވެއްޓާ ބެހޭ ޕްރޮފެސަރު ރެބެކާ ހާޑިންއާއި އެކުގައެވެ..
އެ ޕެނަލް ޑިސްކަޝަން މޮޑެރޭޓް ކުރައްވާފައި ވަނީ ޑޯނިއާ ހިއުމަން ރައިޓްސް ސެންޓަރުގެ ޑިރެކްޓަރު ކިޔޯޓެރޫ ސުސޫއީ އެވެ.
ޔުނިވާސިޓީ އޮފް މިޗިގަންގައި ބޭއްވި އެ ޕެނަލް ޑިސްކަޝަންގެ މައުޟޫއަކީ ތިމާވެއްޓަށް އަންނަ ބަދަލުތަކުގެ ސަބަބުން ކުރިމަތިވާ ގޮންޖެހުންތަކާއި، އިންސާނީ ހައްގުތަކާއި، ރައީސް ނަޝީދުގެ ވެރިކަމުގައި ޑިމޮކްރަސީގެ ހަމަތައް ހިފަހެއްޓުމަށް ކުރެއްވި މަސައްކަތްޕުޅުތަކުގެ އިތުރުން، 2018 ގައި ރާއްޖޭގައި އޮންނަ ރިޔާސީ އިންތިހާބައިގެން ކުރިއަށް ދެވޭނެ ގޮތްތަކުގެ މައްޗަށެވެ.
