މެމްބަރު އިބްރާހިމް ފަލާހްގެ މައްޗަށް އަބުރުގެ ދައުވާ ކުރަން އުމަރު އެދިވަޑައިގެންފި
ފަލާހުގެ މައްސަލަ ހުށަހަޅާފައިވަނީ ހަގީގަތާ ހިލާފު ވާހަކަ ދެއްކި ކަމަށް ތުހްމަތުކޮށް
ކުރީގެ ހޯމް މިނިސްޓަރ އުމަރު ނަސީރު
އިނގުރައިދޫ ދާއިރާގެ މެމްބަރު އިބްރާހިމް ފަލާޙްގެ މައްޗަށް, އަބުރުގެ ދައުވާ ކޮށްދިނުމަށް ކުރީގެ ހޯމް މިނިސްޓަރ އުމަރު ނަސީރު އެދިވަޑައިގަންނަވައިފި އެވެ.
ޕޮލިސް ކޮމިޝަނަރަށް އެޑްރެސް ކުރައްވާ އުމަރު ފޮނުއްވި ސިޓީގައި ވިދާޅުވެފައި ވަނީ ޓީވީ މޯލްޑިވްސްއާއި ޗެނަލް 13 އިން ވަގުތުން ދައްކަމުން ދިޔަ ޖަލްސާގައި ރައްޔިތުންގެ މަޖިލިސް މެމްބަރު އިބްރާހިމް ފަލާޙް ވަރަށް ސަރީޙަ ބަހުން އޭނާއަށް "ވަގަށް" ގޮވާ އަބުރަށް އަރާވަޑައިގަންނަވާފައިވާ ކަމަށް ވިދާޅުވެފައިވެއެވެ.
ޤާނޫނު ނަންބަރު 15/2016 އަބުރު ރައްކާތެރިކޮށްދިނުމާ ހިޔާލު ފާޅުކުރުމުގެ މިނިވަންކަމުގެ ޤާނޫނުގެ ދަށުން ނަމާއި އަބުރު ރައްކާތެރިކުރެވިފައި އޮތުމުގެ ހައްގު ކަށަވަރުކޮށްދޭތީ ޤާނޫނުގެ 19 ވަނަ މާއްދާގެ (ށ) ގެ ދަށުން ފަލާހުގެ މައްސަލަ މޯލްޑިވްސް ޕޮލިސް ސަރވިސްއަށް ހުށަހަޅާ ކަމަށް އުމަރުގެ ސިޓީގައި ވިދާޅުވެފައިވެ އެވެ. މި މައްސަލައިގައި ފަލާހުގެ މައްޗަށް ދައުވާކޮށް ދިނުމަށް، މައްސަލަ ޕީޖީ އޮފީހަށް ފޮނުވައި ދެއްވުމަށްވެސް އުމަރު އެދިވަޑައިގެންފައިވެ އެވެ.
އުމަރު ތުހްމަތު ކުރެއްވި ފަލާހު ދެއްކެވި ވާހަކަތަކަކީ އަބުރުގެ ޤާނޫނުގެ 10 ވަނަ މާއްދާގެ (ނ) ގައިވާ ފަދަ ސާބިތު ނުހިފޭ ދޮގު ބަހެއްގެ ކަމަށެވެ. ރާއްޖޭގެ އެއްވެސް މުއައްސަސާއަކުން އޭނާގެ މައްޗަށް ވައްކަމަން ފަދަ ކުށެއް ސާބިތު ވެފައި ނުވާ ކަމަށް އުމަރު ވިދާޅުވެފައިވެ އެވެ. އަދި މިނިވަން 50ގެ އެއްވެސް މަސައްކަތެއް އޭނާގެ ހިއްސާއެއް އޮތް ކުންފުންނަކަށް ނުވަތަ އޭނާގެ އަނބިކަނބަލުންނާއި ދަރިއެއްގެ ހިއްސާއެއް އޮތް ކުންފުންޏަކަ ވެސް ހަވާލުކޮށްފައި ނުވާއިރު މިނިސްޓަރކަމުގައި ހުންނެވި ދުވަސްވަރު އެފަދަ ކުންފުންޏަކުން އެމިނިސްޓްރީގެ އެއްވެސް މަސައްކަތަކަށް ބިޑް ކޮށްފައި ނުވާނެ ކަމަށް އުމަރު ވަނީ ވިދާޅުވެފައެވެ.
ޕީޕީއެމްއަށް އަލަށް ގުޅިވަޑައިގެންނެވި މެމްބަރުންގެ ފޯމް ހަވާލުކުރުމަށް ބޭއްވި ޖަލްސާގައި ވާހަކަދައްކަވަމުން ފަލާޙް ވިދާޅުވެފައިވަނީ މިނިވަން ފަންސާހާއި ގުޅިގެން އުމަރު ނަސީރު ކުދި ކުދި ކުންފުނިތައް ހަދާފައި އެބަހުރި ކަމަށާއި އުމަރު ނަސީރު ކޯޓަށް ވަޑައިގެންނެވި ނަމަވެސް އެކަން ސާބިތުކޮށްދެއްވާނެ ކަމަށެވެ. ކޮރަޕްޝަނުގެ ވާހަކަ އެހެން މީހުންނާއި ދިމާލަށް އުމަރު ނަސީރު ދައްކަވާއިރު ވައްކަން ކޮށްފައި ވަގަށް ގޮވަނީ އެހެން މީހުންނާއި ދިމާލަށް ކަމަށް ފަލާޙް ވިދާޅުވެފައިވެ އެވެ.
"...ދެން ބައްލަވާ އުމަރު ނަސީރު، އެއްޗެއް ވިދާޅެއް ނުވާނެ. ތިބޭފުޅުން ބައްލަވާ މިނިވަން 50 ގަ ކުދިކުދި ކުންފުނި ހަދާފަ އެ ހުރީ10 ދުވަހަށް، 15 ދުވަހަށް. އެކަމަކު ކޮރަޕްޝަންގެ ވާހަކަ އެހެން މީހުންނާ ދިމާއަށް މިދައްކަނީ. އުމަރު އަޅެ ކޯޓަށް ދެބަލަ، އަޅުގަނޑު ގޮވައިގެން. އަޅުގަނޑު ސާބިތުކޮށްދޭނަން. ނުދާނެ ކޯޓަކަށް. ނުދާނެ. ވައްކަން ކޮށްކޮށްފައި މި ވަގަށް ގޮވަނީ އެހެން މީހުނނާ ދިމާއށް، މިއީ ވަރަށް ދެރަ ކަމެއް، ވަރަށް ނިކަމެތި ކަމެއް،" ފަލާހު ވިދާޅުވި އެވެ.
ޗެނަލް 13 ގެ އިތުރުން މި ޖަލްސާ ދައުލަތުގެ މީޑިއާ، ޓީވީއެމް އިން ވެސް ވަގުތުން ދެއްކި އެވެ.
