ރައްޔިތުންގެ މަޖިލީހުގައި އޮންނަ ސިޔާސީ ޕާޓީތަކަށް ނިސްބަތްވާ މެމްބަރުންގެ ލިސްޓުން، އެމްޑީޕީ ޕާލަމެންޓްރީ ގްރޫޕުން ހުޅުހެންވޭރު ދާއިރާގެ މެމްބަރު އަދި މަޖިލީހުގެ ނާއިބު ރައީސް ރީކޯ މޫސާމަނިކު ވަކިކުރައްވައިފި އެވެ.

ބުދަ ދުވަހު ބޭއްވި ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ތިން ވަނަ ޖަލްސާގައި މަޖިލީހުގެ ރައީސް އަބްދުﷲ މަސީހު މުހައްމަދު ވަނީ އެކަން އިއުލާން ކުރައްވާފަ އެވެ.

މަސީހު ވިދާޅުވީ އެމްޑީޕީގެ މެމްބަރު މޫސާމަނިކު އެޕާޓީގެ ރަޖިސްޓްރީން އުނިކޮށް، އެކަން މަޖިލީހަށް އަންގާފައިވާތީ މޫސާމަނިކަކީ މިހާރު އެމްޑީޕީގެ މެމްބަރެއް ނޫން ކަމަށް އިއުލާން ކުރައްވާ ކަމަށެވެ.

އެހެންކަމުން މަސީހު ވަނީ މަޖިލީހުގެ ހިމެނޭ ސިޔާސީ ޕާޓީތަކުގެ މެމްބަރުންގެ އަދަދުތައް ވެސް އިއުލާން ކުރައްވާފަ އެވެ. އެގޮތުން ޕީޕީއެމް މެމްބަރުންގެ ގޮތުގައި 48 މެމްބަރުން ހިމެނޭއިރު، އެމްޑީޕީގެ މެމްބަރުންގެ ގޮތުގައި ތިއްބެވީ 21 މެމްބަރުންނެވެ. އަދި ޖުމްހޫރީ ޕާޓީގައި ހަތް މެމްބަރުން ތިއްބެވިއިރު، އެމްޑީއޭގައި ހަ މެމްބަރުން ތިއްބަވަ އެވެ. މީގެއިތުރުން އަދާލަތު ޕާޓީގެ މެމްބަރަކާއި ވަކި ޕާޓީއަކަށް ނިސްބަތްނުވާ ދެ މެމްބަރުން ހިމެނޭ ކަމަށް މަޖިލީހުގެ ރައީސް ވަނީ އިއުލާން ކުރައްވާފަ އެވެ.

އެމްޑީޕީން މޫސަ ވަކިކުރެއްވިކަން އިއުލާން ކުރެއްވުމާއި ގުޅިގެން ޖަލްސާގައި ވާހަކަ ދައްކަވަމުން މޫސާމަނިކު ވިދާޅުވީ 2005 އިން ފެށިގެން އެމްޑީޕީގެ މެމްބަރެއްގެ ގޮތުގައި އަދި އެމްޑީޕީ ޕާލަމެންޓްރީ ގްރޫޕްގައި ވަރަށް ބުރަކޮށް މަސައްކަތް ކޮށްފައިވާނެ ކަމަށެވެ.

ނަމަވެސް އެ 13 އަހަރު ދުވަހުގެ ހިދުމަތަށްފަހު އެމްޑީޕީން ވަކިކުރި ދުވަހަށް އިއްތިފާގުން ނަމަވެސް ވެފައިމިވަނީ ފެބްރުއަރީ 08 ވަނަ ދުވަހަށް ކަމަށެވެ. ފެބްރުއަރީ 08، 2012 ވަނަ ދުވަހަކީ އޭނާގެ ސިޔާސީ ހަޔާތުން އެންމެ އަނިޔާވެރި ދުވަސް ކަމަށާއި، އިއްތިފާގުން ފެބްރުއަރީ 08، 2017 ވެގެން މިދިޔައީ އެމްޑީޕީގެ ލީޑަރޝިޕުން އެދިގެން އޭނާގެ އެއްވެސް ކުށެއްނެތި އެމްޑީޕީން ވަކިކުރި ދުވަސް ކަމަށް ވެސް މޫސާމަނިކު ވިދާޅުވި އެވެ.

މޫސާ ވިދާޅުވީ އެމްޑީޕީގައި މަސައްކަތް ކޮށްފައިވާނީ ވަރަށް އިހުލާސްތެރި ކަމާއެކު ކަމަށާއި މިއަދު އެމްޑީޕީއަކީ ހުދުމުހުތާރު އަނިޔާވެރި ޕާޓީއެއް ކަމަށެވެ. އަދި ކުރިއަށް އޮތްތާނގައި މަޖިލީހުގެ ތެރޭގައި އެމްޑީޕީގެ އަނިޔާވެރިކަމުގެ ވާހަކަތައް ދައްކާ، އެމްޑީޕީއަށް ރައްދު ދެއްވަމުން ގެންދަވާނެ ކަމަށްވެސް މޫސަ ވިދާޅުވި އެވެ.  

މޫސަ ވިދާޅުވީ ފެބްރުއަރީ 08، 2012 ގައި އެމްޑީޕީގެ މެމްބަރުންނަށް އަނިޔާކުރި "ބާޣީން"ގެ ނުފޫޒު އެމްޑީޕީގެ ތެރެއަށްވަދެ، މޫސަމެންފަދަ ޕާޓީއަށް ހިދުމަތް ކުރި މެމްބަރުން ޕާޓީން ބޭރުކުރަމުންދާ ކަމަށެވެ.