ރައީސް މައުމޫން އުފެއްދެވި ޕާޓީން އެމަނިކުފާނު ވަކިކުރަން ފާސްކޮށްފި
މައުމޫން ޕާޓީން ވަކިކުރުމަށް ފާސްކުރީ އަޣްލަބިއްޔަތުން
މެންބަރުކަމުން ވަކިކޮށްފިނަމަ، ޕާޓީގެ ރައީސްކަން މައުމޫނަށް ގެއްލޭނެ
ރައީސް މައުމޫން އަބްދުލްގައްޔޫމް އުފެއްދެވި ޕާޓީ، ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް)ގެ މެންބަރުކަމުން އެމަނިކުފާނު ވަކިކުރުމަށް އެ ޕާޓީގެ ކައުންސިލުން ފާސްކޮށްފި އެވެ.
ޕީޕީއެމްގެ މެންބަރުކަމުން ރައީސް މައުމޫން ވަކިކުރުމަށް ފާސްކޮށްފައިވަނީ އާދިއްތަ ދުވަހު ބޭއްވި ރައީސް އަބްދުﷲ ޔާމީން ފެކްޝަނުގެ ޕީޕީއެމް ކައުންސިލް ބައްދަލުވުމުގަ އެވެ. ގަރާރެއްގެ ގޮތުގައި ރައީސް މައުމޫން ވަކިކުރުމަށް ހުށަހެޅުއްވީ އިނގުރައިދޫ ދާއިރާގެ މެންބަރު އިބްރާހިމް ފަލާހު އެވެ.
ރައީސް މައުމޫންގެ އެއްބަފާ ކޮއްކޯފުޅު، ރައީސް ޔާމީން ރިޔާސަތުގައި އިންނެވި އެ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ނިންމީ ރައީސް މައުމޫން ޕާޓީން ވަކިކުރުމަށެވެ.. އަދި މެންބަރުކަމުން ރައީސް މައުމޫން ވަކިކުރުމަށް އެ މައްސަލަ ސުލޫކީ ކޮމެޓީއަށް ފޮނުވާލުމަށެވެ.
ރައީސް މައުމޫން ޕީޕީއެމްގެ މެންބަރުކަމުން ވަކިކުރުމަށް މައްސަލަ ހުށަހެޅިއިރު، ހޮނިހިރު ދުވަހު ޕީޕީއެމް ޕާލިމެންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި ފަލާހު ވަނީ ރައީސް މައުމޫން ޕާޓީގެ ރައީސްކަމުން ވަކިކުރުމުގެ މަސައްކަތް ފައްޓަވާނެ ކަމަށް ވިދާޅުވެފަ އެވެ.
ރާއްޖެއެމްވީއަށް މައުލޫމާތު ދެއްވަމުން ފަލާހު ވިދާޅުވީ އާންމު އުސޫލުގެ ދަށުން ޕާޓީގެ މެންބަރަކު ވަކިކުރުމަށް ކައުންސިލަށް ހުށަނާޅާ ކަމަށާއި ނަމަވެސް، ރައީސް މައުމޫނަކީ ޕާޓީ އުފެއްދެވުމުގައި އިސްކޮށް ހުންނެވި ބޭފުޅަކަށް ވާތީ އެމަނިކުފާނުގެ މައްސަލަ ކައުންސިލަށް ހުށަހެޅީ ކަމަށެވެ. އަދި ކައުންސިލުގެ އަޣްލަބިއްޔަތުން ފާސްކުރީ ރައީސް މައުމޫން ޕާޓީން ވަކިކުރުމަށް ކަމަށާއި، މިހާރު އެ މައްސަލަ ސުލޫކީ ކޮމެޓީއަށް ހުށަހަޅާފައިވާ ކަމަށެވެ.
ފަލާހު ވިދާޅުވީ ރައީސް މައުމޫން ވަކިކުރުމަށް ކައުންސިލުން ފާސްކޮށްފައިވާތީ، ކައުންސިލުގެ ނިންމުމާ ސުލޫކީ ކޮމެޓީން ޚިލާފުވާނެ ކަމަށް ނުބެލެވޭ ކަމަށެވެ.
މިދިޔަ އަހަރުގެ އޮކްޓޯބަރުގައި، 24 ގަޑިއިރު ތެރޭ ޕީޕީއެމްގެ ކައުންސިލް ބައްދަލުވުމެއް ބޭއްވުމަށް ސިވިލް ކޯޓުން އެ ޕާޓީގެ މުސްތަޝާރު، ރައީސް ޔާމީންގެ މައްޗަށް ކުރި އަމުރުގެ ފަހުން، ޕާޓީގެ ބާރުތައް ރައީސް މައުމޫންގެ އަތްޕުޅުން ވަނީ ނަގާފަ އެވެ. އޭގެ ފަހުން ޕާޓީގެ ކައުންސިލް ބައްދަލުވުންތައް ބާއްވަނީ ރައީސް ޔާމީނުގެ ބެއްލެވުމުގެ ދަށުންނެވެ.
ޕީޕީއެމް ދެފަޅި ވެފައިވާއިރު، ރައީސް މައުމޫން ފެކްޝަނުގެ ކައުންސިލެއް ވެސް އޮވެ އެވެ. އެ ކައުންސިލުން ވެސް ދަނީ ނިންމުންތައް ނިންމައި، ބައްދަލުވުންތައް ބާއްވަމުންނެވެ. އެ ފެކްޝަނުގެ ސުލޫކީ ކޮމެޓީއެއް ވެސް އޮންނައިރު، އެ ކޮމެޓީއަށް ބައެއް މެންބަރުންގެ މައްސަލަ ވެސް ހުށަހަޅާފައިވެ އެެވެ.
ޕީޕީއެމްގެ ރައީސްގެ މަގާމަށް މައުމޫން އިންތިޚާބު ކުރީ 2013 ވަނަ އަހަރު ބޭއްވި އެ ޕާޓީގެ ކޮންގްރެސް އިންނެވެ. ޕާޓީގެ މެންބަރުކަމުން ވަކިކޮށްފިނަމަ ރައީސް މައުމޫނަށް ޕީޕީއެމްގެ ރައީސްގެ މަގާމު ގެއްލޭނެ އެވެ.
ރައީސް މައުމޫން ޕާޓީން ވަކިކުރަން ނިންމިއިރު، ރައީސް މައުމޫން ވަނީ، އެމްޑީޕީއާއި ޖުމްހޫރީ ޕާޓީގެ އިތުރުން އަދާލަތު ޕާޓީއާއެކު އިސްލާހީ މަސައްކަތް ކުރުމަށް އެއްބަސްވުމެއްގައި ސޮއިކުރައްވާފަ އެވެ. އެމަނިކުފާނު ވިދާޅުވީ އެ އެއްބަސްވުމުގައި ސޮއިކުރެއްވީ ގައުމަށްޓަކައި ކަމަށެވެ.
ނަމަވެސް، ރައީސް ޔާމީނަށް ތާއީދުކުރާ މެންބަރުން ދަނީ ރައީސް މައުމޫނަށް ފާޑު ވިދާޅުވަމުންނެވެ. އެ މެންބަރުން ވިދާޅުވާ ގޮތުގައި ޕީޕީއެމްގެ ނަމުގައި އެފަދަ އެއްބަސްވުމެއްގައި ސޮއިކުރުމުގެ ބާރެއް ރައީސް މައުމޫނަކަށް ލިބިވަޑައިގެންފައި ނުވެ އެވެ.
ޕާޓީގެ އަސާސީ ގަވާއިދާ ކަނޑައެޅިގެން ރައީސް މައުމޫން ހިލާފުވެވަޑައިގެންފައިވާ ކަމަށް ބުނެ ފަލާހު ހުށަހެޅުއްވި ގަރާރުގައި އެދިފައިވަނީ، ރައީސް މައުމޫން ވަކިކުރުމަކީ ގައުމީ މައްސަލައެއް ކަމުގައި ބަލައި އަވަހަށް ވަކިކޮށްދިނުމަށެވެ.
ގަރާރުގައި ބުނެފައިވަނީ ޕާޓީގެ ކައުންސިލުގެ މަޝްވަރާއެއް ނެތި ދިވެހި ގައުމާއި ރައްޔިތުންނާއި ޕާޓީގެ މަސްލަހަތަށް ގެއްލުންވާ ފަދަ ސްޓެރެޓެޖީތަކާއި ސިޔާސަތުތައް އަމިއްލަ އަށް ކަނޑައަޅައި ޕާޓީގެ ސިއްކަ އާއި އެހެނިހެން ތަކެތި ބޭނުންކޮށްގެން ޕާޓީގެ ނަމުގައި ހިންގާ ސިޔާސީ އެކި ހަރަކާތްތަކަކީ ކަނޑައެޅިގެން ގާނޫނާއި ގަވާއިދާ ހިލާފަށް ކުރާ އަމަލުތަކެއް ކަން ފާޅުކަންބޮޑު ގޮތެއްގައި އެނގޭ ކަމަށެވެ.
ފަލާހުގެ ގަރާރުގައި ބުނެފައިވަނީ، ގާނޫނުއަސާސީ އާއި ކޯޓުތަކުގެ ގާނޫނަށް ރައީސް މައުމޫން ގޮންޖައްސަވަމުން ގެންދެވުމުގެ ސަބަބުން ރާއްޖޭގައި ގާނޫނުގެ ވެރިކަން ނަގަހައްޓަން ހުރަސްތަކެއް ކުރިމަތިވެ ގައުމުގެ އަމަންއަމާން ކަމަށާއި ދާހިލީ އަމްނަށް ނުރައްކާތަކެއް ކުރިމަތިވަމުންދާ ކަމަށެވެ.
