އައިއޯއައިޖީ ގޭމްސް 2019: ކޮމޯރޯސް އަތުންވެސް ބަލިވެ ރާއްޖެއަށް ފުރުސަތު ހަނިވެއްޖެ

އިންޑިއަން އޯޝަން އައިލޭންޑް ގޭމްސްގައި ކޮމޯރޯސް އަތުން ވެސް ބަލިވެ ސެމީ ފައިނަލަށް ދިޔުމުގެ ފުރުސަތު ރާއްޖެއަށް ހަނިވެއްޖެއެވެ.

ހޮނިހިރު ދުވަހު ހަވީރު ކުޅުނު މެޗުން ކޮމޯރޯސްއާ ވާދަކޮށް ރާއްޖެ ބަލިވީ 0-3 ގެ ނަތީޖާއަކުންނެވެ. މިއީ ކޮމޮރޯސްއިން ބައިނަލްއަގުވާމީ ފުޓުބޯޅައިގައި ހޯދި އެންމެ ބޮޑު މޮޅެވެ.

މޮރިޝަސްގެ ޖޯޖް ވީ ސްޓޭޑިއަމްގައި ކުޅުނު މި މެޗު ފެށިގެން ރަނގަޅަށް ކުޅެމުންދިޔައީ ކޮމޯރޯސްއިންނެވެ. އެގޮތުން އެޓީމުން ވަނީ ރާއްޖޭގެ ހާފަށް ބާރުބޮޑުކޮށް ހަމަލާތައް އުފައްދަން މަސައްކަތް ކޮށްފައެވެ.

ނަމަވެސް ރާއްޖެއިން ވަނީ ވަކި ހިސާބަކުން މެޗުގެ ކޮންޓްރޯލް ހޯދާފައެވެ. އެގޮތުން ނާއިޒް ހަސަން (ދާދު) އަށް ވަނީ ލީޑު ނެގުމަށް ފުރުސަތުތަކެއް ލިބި ބޭކާރުވެފައެވެ.

ރާއްޖެއިން ރަނގަޅަށް ކުޅެމުން ދަނިކޮށް 29 ވަނަ މިނެޓުގައި ކޮމޯރަސްއިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ހަ ނަމްބަރެވެ.

މި ލަނޑަށްފަހު ކޮމޯރޯސްއިން ވަނީ އެޓީމުގެ އެޓޭކްތައް ވަރުގަދަކޮށް، ރާއްޖޭގެ ހާފަށް ބާރުބޮޑުކޮށްފައެވެ. އެގޮތުން 37 ވަނަ މިނެޓުގައި އެޓީމުގެ ކެޕްޓަން 17 ނަމްބަރު ވަނީ ލީޑު ފުޅާކޮށްދީފައެވެ.

ފުރަތަމަ ހާފްގެ ފަހުކޮޅު ރާއްޖެއަށް މެޗުގެ ކޮންޓްރޯލް އެއްކޮށް ގެއްލުނުއިރު، ހާފް ނިމުމުގެ ކުރިން ކޮމޯރޯސްގެ ތިންވަނަ ލަނޑު ކެޕްޓަން 17 ނަމްބަރު ވަނީ ކާމިޔާބުކޮށްފައެވެ.

ދެވަނަ ހާފް ރާއްޖެއިން ފެށީ އިބްރާހިމް މަހުދީ (ފޭދޫ އިއްބެ) އަދި އަލީ ފާސިރު (ސެންޓޭ) އާއެކުއެވެ. ނަމަވެސް ކޮމޯރޯސްއިން މި ހާފް ފެށީ ވަރަށް ވަރުގަދަކޮށެވެ. އެގޮތުން އެޓީމުން ވަނީ ރާއްޖޭގެ ގޯލަށް ނުރައްކާކޮށް ގިނަ ހަމަލާތަކެއް އުފައްދާފައެވެ.

މި ހާފްގައި ރާއްޖެއަށްވެސް ވަނީ ލަނޑު ޖެހުމަށް މަދުން ނަމަވެސް ފުރުސަތުތަކެއް ލިބިފައެވެ. ނަމަވެސް އެ ފުރުސަތުތަކުގެ ބޭނުން ރާއްޖެއަށް އެންމެ ރަނގަޅަށް ބޭނުން ކުރެވިފައެއް ނުވެއެވެ.

ކޮމޯރޯސް އަދި ރާއްޖެ ވަނީ 2011 ވަނަ އަހަރުގެ އައިއޯއައިޖީ ގޭމްސްގައި ވާދަކޮށްފައެވެ. އެ މެޗު ނިމުނީ 2-2 ގެ ނަތީޖާއިން ދެޓީމު އެއްވަރުވެގެންވެ. ފީފާ ރޭންކިންގ އަށް ބަލާއިރު، ކޮމޯރޯސް އޮތީ 148 ވަނައިގައެވެ. ރާއްޖެ އޮތީ 151 ވަނައިގައެވެ.

މި ނަތީޖާއާއެކު ރާއްޖެ ވަނީ ކުޅުނު ދެ މެޗުންވެސް ބަލިވެފައެވެ. ފުރަތަމަ މެޗުން ރާއްޖެ ބަލިވީ ރީޔޫނިއަންއާ ވާދަކޮށް 0-4 ގެ ނަތީޖާއަކުންނެވެ. ގްރޫޕް ސްޓޭޖުގައި ކުޅޭ ފަހު މެޗުގައި ރާއްޖެ ހޯމަ ދުވަހު ނިކުންނާނީ މަޔޯޓްއާ ދެކޮޅަށެވެ.

ރާއްޖެއަށް ސެމީގެ ޖާގައެއް ކަށަވަރުވާނީ ގްރޫޕް ސްޓޭޖުގައި މަޔޯޓްއާ ދެކޮޅަށް ކުޅޭ މެޗު ބޮޑު ތަފާތަކުން ކާމިޔާބުކޮށް، ކޮމޯރޯސް އަދި ރީޔޫނިއަން ބައްދަލުކުރާ މެޗުން ރީޔޫނިއަން މޮޅުވުމުންނެވެ.