ސޮލިޑާރިޓީ ގޭމްސް: 100 މީޓަރުގެ ފައިނަލުން ސާއިދުއަށް ހަތަރުވަނަ
ފައިނަލްގައި ސާއިދު ރޭސް ނިންމީ 10.42 ސިކުންތުން
ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު (ކ)
އަޒަރުބައިޖާންގެ ބަކޫގައި ކުރިޔަށްދާ ހަތަރުވަނަ އިސްލާމިކް ސޮލިޑާރިޓީ ގޭމްސްގެ 100 މީޓަރު ދުވުމުގެ ފައިނަލުގެ ހަތަރު ވަނަ މަގާމް ރާއްޖޭގެ އެންމެ ބާރު ދުވުންތެރިޔާ ހަސަން ސާއިދަށް ލިބިއްޖެއެވެ.
ސާއިދަށް މި އިވެންޓުގެ ހަތަރުވަނަ ލިބުނީ ތުރުކީ އާއި ބަހްރޭން އަދި އޮމާންގެ ދުވުންތެރިންނާ ވާދަކޮށް 10.42 ސިކުންތުން ރޭސް ނިންމައިގެންނެވެ. މި އިވެންޓުގެ އެއްވަނަ ލިބުނީ ތުރުކީގެ ގުލީވް ރާމިލް އަށެވެ. އޭނާ ރޭސް ނިންމީ 10.06 ސިކުންތުންނެވެ. އަދި ދެވަނައަށް ބަހްރޭނުގެ ފިޝާ އެންޑްރޫ 10.16 ސިކުންތުން ރޭސް ނިންމި އިރު، ތިންވަނައަށް ރޭސް ނިންމި އޮމާންގެ އަލް ހަރްތީ ބަރަކާތު ވަނީ 10.35 ސިކުންތުން ރޭސް ފުރިހަމަކޮށްފައެވެ.
100 މީޓަރުގެ ފައިނަލަށް ސާއިދު ދަތުރުކޮށްފައި ވަނީ އަންގާރަ ދުވަހު ކުރިއަށްދިޔަ މި އިވެންޓުގެ ފުރަތަމަ ބުރުގައި 10.40 ސިކުންތުން ރޭސް ނިންމައި އަދި ސެމީގައި ވާދަކޮށް 10.40 ސިކުންތުން ތިންވަނައިގައި ރޭސް ނިންމައިގެންނެވެ.
މި ދެބުރާ ހިލާފަށް ފައިނަލުން ސާއިދު އަށް ހަތަރު ވަނަ ލިބުނީ ދެ ސިކުންތު ލަހުން ރޭސް ނިންމައިގެން ފާހަގަކޮށްލެވެއެވެ.
މި މުބާރާތުގައި ރާއްޖޭގެ ދުވުންތެރިން ވާދަކުރާނީ ފިރިހެނުންގެ 100 މީޓަރާއި 200 މީޓަރާއި 1500 މީޓަރު އަދި 5000 މީޓަރު ދުވުމުގައެވެ. މީގެ އިތުރުން 400 މީޓަރު ރިލޭގައި ވެސް ރާއްޖެއިން ވާދަކުރާނެ ކަމަށް ވެސް އެތުލެޓިކްސް އެސޯސިއޭޝަނުން މައުލޫމާތުދެއެވެ.
އެތުލެޓިކްސްގެ އިތުރުން މިފަހަރުގެ ގޭމްސްގައި ދެން ބައިވެރިވާ ކުޅިވަރުތަކަކީ ސްވިމިންގ، ޓޭބަލް ޓެނިސް، ޓެނިސް އަދި ޝޫޓިން އެވެ.
