2024 އަދި 2028 ގެ އޮލިމްޕިކް ގޭމްސް ބާއްވާ ސިޓީތަށް ކަނޑައަޅައިފި

2024 ވަނަ އަހަރާއި 2028 ވަނަ އަހަރު އޮލިމްޕިކް ގޭމްސް ބާއްވާ ސިޓީތައް ކަނޑައަޅައިފިއެވެ.

ޕެރޫގެ ލީމާގައި ބޭއްވި އިންޓަނޭޝަނަލް އޮލިމްޕިކް ކޮމިޓީގެ ބައްދަލުވުމުގައި ވަނީ މި ދެ އަހަރު އޮލިމްޕިކް ގޭމްސް ހޯސްޓް ކުރާނެ ސިޓީތަށް ކަނޑައަޅާފައެވެ. މިއީ ތާރީހުގައިވެސް އެއްފަހަރާ އޮލިމްޕިކް ގޭމްސް ބާއްވާ ދެ ސިޓީއެއް އިއުލާންކުރި ފުރަތަމަ ފަހަރެވެ.

އެގޮތުން 2024 ވަނަ އަހަރުގެ އޮލިމްޕިކް ބޭއްވުމަށް ހަމަޖެހިފައިވަނީ ފްރާންސްގެ ޕެރިހުގައެވެ. އަދި 2028 ވަނަ އަހަރުގެ އޮލިމްޕިކް ގޭމްސް ބޭއްވުމަށް ހަމަޖެހިފައިވަނީ އެމެރިކާގެ ލޮސް އެންޖެލްސްގައެވެ. މި ދެ ސޓީގައި މި ދެ އަހަރު އޮލިމްޕިކް ގޭމްސް ބާއްވައިފިނަމަ މި ދެ ސިޓީވެސް ވެގެންދާނީ ތިން ފަހަރެއްގެ މަތިން އޮލިމްޕިކް ގޭމްސް ހޯސްޓް ކުރާ ސިޓީ ތަކަށެވެ. އެގޮތުން ޕެރިހުން ވަނީ މީގެ ކުރިން 1900 އޮލިމްޕިކްސް އާ 1924 ވަނަ އަހަރުގެ އޮލިމްޕިކް ގޭމްސް ހޯސްޓް ކޮށްފައެވެ. ހަމައެހެންމެ ލޮސް އެންޖެލްސްގައި މީގެ ކުރިން 1932 އަދި 1984 ވަނަ އަހަރު ވަނީ އޮލިމްޕިކް ގޭމްސް ބޭއްވިފައެވެ.

ޕެރިހުގައި ވަނީ މީގެކުރިން ތިން ފަހަރެއްގެ މަތިން ފިނި މޫސުމުގެ އޮލިމްޕިކްސް ވެސް ބޭއްވިފައެވެ. އިންޓަނޭޝަނަލް އޮލިމްޕިކް ކޮމިޓީގެ ރައީސް ތޯމަސް ބާކް ބުނެފައިވަނީ މި ދެ އަހަރު އޮލިމްޕިކް ގޭމްސް ބޭއްވުމަށް އެހެން ސިޓީތަކުން ބިޑު ކޮށްފައިނުވާތީ ލޮސް އެންޖެލްސްއާ ޕެރިހަށް އޮލިމްޕިކް ގޭމްސް އެވޯޑު ކުރީ ކަމަށެވެ. އަދި ދުނިޔޭގެ ހުރިހާ އެތްލީޓުންނަށްވެސް ކުރިޔަށްއޮތް 11 އަހަރު ކުރިޔާލާ އޮލިމްޕިކް ގޭމްތަކަށް ތައްޔާރުވާން މިކަމުގެ ސަބަބުން ފުރުސަތު ލިބިގެންދާނެ ކަމަށެވެ.

2020 ވަނަ އަހަރުގެ އޮލިމްޕިކް ގޭމްސް ބޭއްވުމަށް ހަމަޖެހިފައިވަނީ ޖަޕާނުގެ ޓޯކިޔޯގައެވެ.