ޗައިނާ އަތުންވެސް ބޮޑު ތަފާތަކުން ބަލިވެ، ގައުމީ ފުޓްސަލް ޓީމް ކަޓައިފި

ފަސްވަނަ އޭޝިއަން އިންޑޯ އެންޑް މާޝަލް އާޓްސް ގޭމްސްގައި ޗައިނާ އަތުންވެސް ބަލިވެ، ރާއްޖޭ ގައުމީ ފުޓްސަލް ޓީމު މުބާރާތުން ކަޓައިފި އެވެ.

ބުދަ ދުވަހު ޗައިނާއާ ދެކޮޅަށް ކުޅުނު މެޗުން ފުޓްސަލް ޓީމު ބަލިވީ 3-9 ގެ ތަފާތުބޮޑު ނަތީޖާއަކުންނެވެ.

ތުރުކަމިނިސްތާނުގައި ކުޅުނު މި މެޗުގައި ފުރަތަމަ ލަނޑު ޖަހާ ލީޑު ނެގީ ރާއްޖެއިންނެވެ. މި ލަނޑު ރާއްޖެއަށް ކާމިޔާބު ކޮށްދިނީ ފުރުގާން އިބްރާހިމް އެވެ. އެހެން ނަމަވެސް ރާއްޖެއިން ލީޑު ނެގިތާ މާގިނައިރުތަކެއް ނުވަނީސް ޗައިނާގެ ޒަހޮއާ ލިއަންގް ވަނީ އެޓީމަށް ނަތީޖާ ހަމަހަމަ ކޮށްދީފައެވެ.

ފުރަތަމަ ހާފް ނިމުމުގެ ކުރިން ޗައިނާ އަށް ލީޑު ނަގައިދީފައި ވަނީ ޒޫ ޔަންގް އެވެ. މި ލަނޑާއެކު ފުރަތަމަ ހާފް ނިމުނީ 1-2 ގެ ނަތީޖާއިން ރާއްޖޭގެ މައްޗަށް ޗައިނާ ކުރީގައި އޮވެގެންނެވެ.

ދެވަނަ ހާފް ފެށިގެން ޗައިނާ އިން ވަނީ ރާއްޖެ ކޮޅަށް ހަތް ލަނޑު ކާމިޔާބު ކޮށްފައެވެ. ޗައިނާގެ ލޫޗަންގް ދެ ލަނޑު ޖަހާފައިވާއިރު، ޒާއޯ ލިއަންގް، ލިއު ޗަންގް، ޗެން ޒިހެންގް، ޒެންގް ލިއަންގް، ލި ޖިއަންޖިއާ، ލިއު ވެންޒީ އަދި ޒިހުއަންގް ޖިއަންފާ ކުރެ ކޮންމެ ކުޅުންތެރިޔަކު ވަނީ ލަނޑެއް ކާމިޔާބު ކޮށްފައެވެ.

ރާއްޖެއަށް މި ހާފްގައި ލަނޑުތައް ކާމިޔާބުކޮށްދިނީ އަހުމަދު ނަސީމް މުހައްމަދު އަދި ފުރުގާން އިބްރާހިމް އެވެ.

މި މުބާރާތުގައި ރާއްޖެ ވަނީ އުޒްބަކިސްތާން، އަފްއާނިސްތާން އަދި ޔޫއޭއީއާ ދެކޮޅަށް ކުޅުނު މެޗުން ވެސް ބަލިވެފައެވެ. ފުރަތަމަ މެޗުގައި ޔޫއޭއީ އަތުން 1-3 ގެ ނަތީޖާއަކުން ރާއްޖެ ބަލިވިއިރު، އަފްއާން އަތުން ބަލިވީ 1-6 ގެ ނަތީޖާއަކުންނެވެ. އުޒްބަކިސްތާން އަތުން ރާއްޖެ ބަލިވީ 1-9 ގެ ނަތީޖާއަކުންނެވެ.