އަޒަރުބައިޖާންގެ ބަކޫގައި ކުރިޔަށްދާ ހަތަރުވަނަ އިސްލާމިކް ސޮލިޑާރިޓީ ގޭމްސްގެ 100 މީޓަރު ދުވުމުގެ ފައިނަލަށް ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު ދަތުރުކޮށްފިއެވެ.

ސާއިދު މި އިވެންޓުގެ ފައިނަލުން ޖާގައެއް ހޯދީ އަންގާރަ ދުވަހު ހަވީރު އޭނާ ވާދަކުރި ހީޓުން ތިންވަނަ ހޯދައިގެންނެވެ. މި އިވެންޓުގައި އޭނާ ރޭސް ނިންމާފައި ވަނީ 10.40 ސިކުންތުންނެވެ.

ޖުމްލަ 8 ދުވުންތެރިން ވާދަކުރާ މި އިވެންޓުގެ ފައިނަލް ފެށުމަށް ހަމަޖެހިފައި ވަނީ އަންގާރަ ދުވަހުގެރޭ 8:25 ގައެވެ.

ސަތޭކަ މީޓަރު ދުވުމުގެ ފައިނަލުން ސާއިދު ޖާގަ ހޯދިއިރު، އޭނާ ވަނީ އަންގާރަ ދުވަހު މެންދުރު އޮތް 100 މީޓަރު ދުވުމުގައި ވާދަކޮށް ހީޓުން އެއްވަނަ ހޯދާ ސެމީގެ ޖާގައެއް ކަށަވަރުކޮށްފައެވެ.

އަންގާރަ ދުވަހު މެންދުރު ކުރިޔަށްދިޔަ 100 މިޓަރު ދުވުމުން ސާއިދު ވަނީ 10.40 ސިކުންތުން ރޭސް ނިންމާފައެވެ. އޭނާއާ އެންމެ ގާތުން ވާދަކުރީ ތުރުކަމިނިސްތާންގެ ދުވުންތެރިޔާ ރަމިލް ގުލިއެވް އެވެ. މި ހީޓުގައި ޕާކިސްތާން، ޔޫއޭއީ އަދި ބަހުރޭންގެ ދުވުންތެރިން ވެސް ވަނީ ވާދަކޮށްފައެވެ.

ހުރިހާ ހީޓެއްގެ ނަތީޖާތަކަށް ބަލާއިރު، ސާއިދު ދިޔައީ ރޭންކިންގެ ފަސްވަނަ އަށެވެ. ރޭންކިންގެ އެއްވަނަ ހޯދާފައި ވަނީ ބަހުރޭންގެ ފިޝާ އެންޑްރިއު އެވެ. އޭނާ ރޭސް ނިންމާފައި ވަނީ 10.20 ސިކުންތުންނެވެ. ސަތޭކަ މީޓަރު ދުވުމުން ރާއްޖޭގެ ސަރީސް އަހުމަދު ވާދަކޮށް ދިޔައީ ހީޓުގެ ފުލަށެވެ. އޭނާ ރޭސް ނިންމާފައިވަނީ 11.28 ސިކުންތުންނެވެ.

މި މުބާރާތުގައި ރާއްޖޭގެ ދުވުންތެރިން ވާދަކުރާނީ ފިރިހެނުންގެ 100 މީޓަރާއި 200 މީޓަރާއި 1500 މީޓަރު އަދި 5000 މީޓަރު ދުވުމުގައެވެ. މީގެ އިތުރުން 400 މީޓަރު ރިލޭގައި ވެސް ރާއްޖެއިން ވާދަކުރާނެ ކަމަށް ވެސް އެތުލެޓިކްސް އެސޯސިއޭޝަނުން މައުލޫމާތުދެއެވެ.

އެތުލެޓިކްސްގެ އިތުރުން މިފަހަރުގެ ގޭމްސްގައި ދެން ބައިވެރިވާ ކުޅިވަރުތަކަކީ ސްވިމިންގ، ޓޭބަލް ޓެނިސް، ޓެނިސް އަދި ޝޫޓިން އެވެ.