އަޒަރުބައިޖާންގެ ބަކޫގައި މާދަމާ ފެށުމަށް ހަމަޖެހިފައިވާ 4 ވަނަ އިސްލާމިކް ސޮލިޑާރިޓީ ގޭމްސްގައި ރާއްޖޭގެ ފްލެގް ބިއަރާ އަކަށް އެއް ނަމްބަރު ޓެނިސް ކުޅުންތެރިޔާ އަބްދުﷲ ފާލިހް ހަމަޖައްސައިފިއެވެ.

ފާލިހް ފްލެގް ބިއަރާގެ މަގާމަށް ހަމަޖައްސާ އޭނާއަށް ދިވެހި ދިދަ ހަވާލުކޮށްދެއްވީ ބުދަ ދުވަހު ބަކޫގައި އޮތް ކުޑަ ހަފްލާއެއްގައި އެމްއޯސީގެ ނައިބު ރައީސް މުހައްމަދު އަބްދުއް ސައްތާރެވެ.

ފާލިހް އަށް ފްލެގް ބިއަރާގެ މަގާމު ހަވާލުކުރުމާ ގުޅޭ ގޮތުން ރާއްޖެއެމްވީ އަށް މައުލޫމާތު ދެއްވަމުން އެމްއޯސީގެ ޖެނެރަލް ސެކްރެޓަރީ އަހުމަދު މަރުޒޫގު ވިދާޅުވީ އެމްއޯސީގެ އަބަދުވެސް ވިސްނުން ހުންނަނީ މުޅިން އާ ކުޅިވަރަކުން އާ ކުޅުންތެރިއަކަށް އެ މަގާމު ހަވާލުކުރުން ކަމަށާއި އެހެން ކަމުން މިފަހަރުގެ ގޭމްސްގައި އެމަގާމު ހަވާލުކުރަން ނިންމީ ބެޑްމިންޓަން ކުޅުންތެރިއަކަށް ކަމަށެވެ.

ރާއްޖެއިން ވާދަކުރާ މިފަދަ ބޮޑެތި ގޭމްސްތަކުގައި އެކި ކުޅިވަރުތަކުން އެކި ކުޅުންތެރިން ފްލެގް ބިއަރާގެ މަގާމަށް ހަމަޖައްސާފައިވާ އިރު، މިފަހަރުގެ ގޭމްސްގައި އެގޮތަށް ފްލެގް ބިއަރާގެ މަގާމު އަދާކޮށްފައިވާ ދެ ކުޅުންތެރިއަކު ހިމެނެއެވެ. އެއީ ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު އާއި ރާއްޖޭގެ ސްވިމިންގެ އެއްވަނަ އަންހެން ފެތުންތެރިޔާ އައިމިނަތު ޝަޖަން އެވެ.

މިފަހަރުގެ އިސްލާމިކް ސޮލިޑަރިޓީ ގޭމްސްގައި 5 ކުޅިވަރަކުން 15 އެތުލީޓަކު ވާދަކުރެއެވެ. އެއީ އެތުލެޓިކްސް، ސްވިމިންގ، ޓޭބަލް ޓެނިސް، ޝޫޓިން އަދި ޓެނިހެވެ.

މިމަހުގެ 12 އިން 22 ގެ ނިޔަލަށް ކުރިއަށްދާ މި މުބާރާތުގައި ވާދަކުރާ ރާއްޖޭގެ އެތުލީޓުން ހިމެނޭ ޑެލިގޭޓްގެ ޗެފް ޑެ މިޝަންގެ ގޮތުގައި ހަމަޖައްސާފައި ވަނީ ސައީދު މުހައްމަދެވެ. އަދި ޑެޕިއުޓީ ޗެފް ޑެ މިޝަންގެ ގޮތުގައި ހަމަޖައްސާފައި ވަނީ ހޭންޑްބޯލް މޯލްޑިވްސްގެ އެކްސްކޯ މެމްބަރު މުއުމިނާ އާދަމެވެ.

ހަތަރުވަނަ އިސްލާމިކް ސޮލިޑަރިޓީ ގޭމްސް ފެށުމަށް ހަމަޖެހިފައިވަނީ ހުކުރު ދުވަހުގެރޭ ބަކޫ ގަޑިން 8 ޖަހާއިރުއެވެ.