އަޒަރްބައިޖާންގެ ބަކޫގައި އަންނަ މަހު ބޭއްވުމަށް ހަމަޖެހިފައިވާ އިސްލާމިކް ސޮލިޑަރިޓީ ގޭމްސްގައި ރާއްޖޭގެ ފަސް ކުޅިވަރަކުން ޖުމްލަ 15 އެތުލީޓުން ބައިވެރިވާނެ ކަމަށް މޯލްޑިވްސް އޮލިމްޕިކް ކޮމެޓީން ބުނެފިއެވެ.

ރާއްޖެއިން މި ގޭމްސްގައި ބައިވެރިވާ ފަސް ކުޅިވަރަކީ ސްވިމިންގ، ޓޭބަލް ޓެނިސް، ޓެނިސް، އެތުލެޓިކްސް އަދި ޝޫޓިން އެވެ.

ޖުމްލަ 15 އެތުލީޓުން ހިމެނޭ މި ޑެލިގޭޓްގެ ޗެފް ޑެ މިޝަންގެ ގޮތުގައި ހަމަޖައްސާފައި ވަނީ ސައީދު މުހައްމަދެވެ. އަދި ޑެޕިއުޓީ ޗެފް ޑެ މިޝަންގެ ގޮތުގައި ހަމަޖައްސާފައި ވަނީ ހޭންޑްބޯލް މޯލްޑިވްސްގެ އެކްސްކޯ މެމްބަރު މުއުމިނާ އާދަމެވެ.

މީގެ އިތުރުން މިފަހަރުގެ ގޭމްސްގެ މެޑިކަލް އޮފިސަރަކަށް ހަމަޖައްސާފައި ވަނީ ގިނަ ގޭމްސްތަކެއްގައި އެ މަގާމު ފުރާފައިވާ މަޝްހޫރު ޑޮކްޓަރ މުހައްމަދު ފަޔާޒް ރިޒާ އެވެ.
މުބާރާތުގެ ޗެފް ޑެ މިޝަންގެ ދެ ބޭފުޅުން ގޭމްސްއަށް ފުރާވަޑައިގަތުމަށް ހަމަޖެހިފައި ވަނީ އަންނަ މަހުގެ 6 ވަނަ ދުވަހު ކަމަށް އޮލިމްޕިކް ކޮމެޓީން މައުލޫމާތުދެއެވެ.

މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ބުނީ މި މަގާމުތަކަށް މީހުން ހޮވާފައި ވަނީ ފެބްރުއަރީ މަހުގެ 13 ވަނަ ދުވަހު ބޭއްވި އެމްއޯސީގެ 2 ވަނަ އެގްޒެގެޓިވް ކޮމެޓީގެ ބައްދަލުވުމުގައި ކަމަށެވެ.

މިއަހަރުގެ ގޭމްސް ބޭއްވުމަށް ހަމަޖެހިފައިވަނީ މެއި 12 އިން 22 ގެ ނިޔަލަށެވެ.