ސުޕްރީމް ކޯޓުގެ ފަނޑިޔާރުންގެ އަދަދު ހަތަކަށް ބަދަލުކުރަން މަޖިލީހުން ފާސްކޮށްފިއެވެ.
ސުޕްރީމް ކޯޓުގެ ފަނޑިޔާރުންގެ އަދަދު ހަތަކަށް ބަދަލުކޮށްފައިވަނީ ޖަލްސާއަށް ހާޒިރުވެ ވަޑައިގެންނެވި 74 މެމްބަރުންގެ އިއްތިފާގުންނެވެ.
އާ ގާނޫނު އަސާސީގެ ދަށުން އެކުލަވާލެވުނު ސުޕްރީމް ކޯޓުގައި ފުރަތަމަ ތިއްބެވީ ވެސް 7 ފަނޑިޔާރުންނެވެ. ނަމަވެސް 2014 ވަނަ އަހަރުގެ ޑިސެމްބަރުގައި ކޯޓުތަކަށް ގެނައި އިސްލާހާއެކު ފަނޑިޔާރުންގެ އަދަދު ފަހަކަށް ބަދަލުކޮށް އުއްތަމަ ފަނޑިޔާރާއި އެކު ފަސް ފަނޑިޔާރުން ތިއްބަވާ ގޮތަށް ބަދަލު ކުރިއެވެ.
ސުޕްރީމް ކޯޓުގައި މިވަގުތު ތިއްބެވި ފަސް ފަނޑިޔާރުންނަކީ:
1. އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ
2. ފަނޑިޔާރު އަބްދުﷲ އަރީފު
3. ފަނޑިޔާރު އާދަމް މުހައްމަދު އަބްދުﷲ
4. ފަނޑިޔާރު ޢަބްދުލްޣަނީ މުޙައްމަދު
5. ފަނޑިޔާރު އަބްދުﷲ ދީދީ
ފަނޑިޔާރުންގެ އަދަދު ހަތަކަށް ބަދަލުކުރުމަށް އަލީ އާޒިމް ހުށައެޅުއްވީ އެ ބިލުގައިވަނީ ކޯޓުތަކުގެ ގާނޫނަށް ކުރިން އޮތް ގޮތަށް ހަތް ފަނޑިޔާރުންނަށްބަދަލު ކުރުމަށެވެ. އަދި 2010 ވަނަ އަހަރު ސުޕްރީމް ކޯޓުގެ ފަނޑިޔާރުންގެ އަދަދަކީ ހަތެއް ކަމުގައި ރައްޔިތުންގެ މަޖިލީހުން ކަނޑައަޅައިފައި ވަނިކޮށް، 2014 ވަނަ އަހަރު ސުޕްރީމް ކޯޓުގެ ފަނޑިޔާރުންގެ އަދަދު ފަހަކަށް ބަދަލު ގެނެސްފައި ވަނީ ސިޔާސީ މަގުސަދެއް ހާސިލް ކުރުމަށް ކަމަށް އެ ބިލުގައި ވަނީ ބުނެފައެވެ.
މި ބިލަށް ހުށައެޅި އިސްލާހު ގާނޫނަކަށް ވާނީ ރައީސް އިބްރާޙިމް މުހައްމަދު ސޯލިހު ތަސްދީގުކުރައްވާ ހިސާބުންނެވެ.
