މަޖިލީހުގައި މެމްބަރުން ތިއްބަވާ ތަރުތީބު ބަދަލުކުރައްވަން ފެނިވަޑައިގަންނަވާކަމަށާއި އެކަމަށް ފެނިލައްވާތާ އެތަށް ދުވަހެއް ވެފައިވާ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލީހުގައި ބުދަ ދުވަހު އޮތް ޖަލްސާގައި ވާހަކަދައްކަވަމުން ނަޝީދު ވިދާޅުވީ މަޖިލީހުގައި މެމްބަރުން އިށީދެގެން ތިއްބަވާގޮތަކީ އެންމެ ބުއްދިވެރި ގޮތްކަމެއް ފެނިވަޑައިނުގަންނަވާ ކަމަށާއި މަޖިލީހުގެ ކަންކަން ހިނގަމުންދާނީ މެމްބަރުންނަށް ފެނިވަޑައިގަންނަވާ ގޮތަށް ކަމަށެވެ. އާންމު ގޮތެއްގައި މަޖިލީހުގެ މެމްބަރުން ތިއްބަވަނީ ވަކި ޕާޓީއަށް ނިސްބަތްވެ ވަޑައިގަންނަވާ މެމްބަރުން އެއް ތަނެއްގައި އަދި "އޮޕޮޒިޝަން" މެމްބަރުން އޭރަކު އޮންނަ ސަރުކާރާއި އިދިކޮޅަށް ކަމަށެވެ.
މަޖިލީހުގައި އެންމެ ގިނައީ އެމްޑީޕީ މެމްބަރުންނެވެ. އެމްޑިޕީގެ 65 މެމްބަރުން މަޖިލީހުގައި ތިއްބަވާއިރު ޖޭޕީގެ ފަސް މެމްބަރުން، ޕީއެންސީގެ ތިން މެމްބަރުން ޕީޕީއެމްގެ ފަސް މެމްބަރުން، އަދި އެމްޑީއޭގައި ދެ މެމްބަރަކު ތިއްބަވައެވެ. މީގެއިތުރުން އަމިއްލަ މެމްބަރުންގެ ގޮތުގައި ހަތް މެމްބަރުން ތިއްބަވައެވެ.
ޒަމާނުއްސުރެ މަޖިލީހުގައި ގޮނޑިޖަހާފައި ހުރި ގޮތަށް އިޝާރާތް ކުރައްވާ ނަޝީދު ވަނީ މަޖިލީހުގެ ތާރީޚުގައި ވެސް ގޮނޑިޖަހާފައިވާ ތަރުތީބަށް ހިނގާފައިވާ ކަންކަން ފާހަގަ ކުރައްވާފައެވެ. އެގޮތުން ނަޝީދު ވިދާޅުވީ 1932 ވަނަ އަހަރު މަޖިލިސް އެކުލަވާލިއިރު ރަދުންގެ އަށް މެމްބަރުންނާއި މާލޭގެ މެމްބަރުން ތިއްބަވަނީ އަބަދުވެސް ކުރީ ގޮނޑިބަރީގައި ކަމަށާއި އޭގެ ފަހުން ރަދުންގެ ވެރިކަން ރަސްކަމަށް ބަދަލުވެ 1968 ވަނަ އަހަރުން ފެށިގެން ވެސް ރައީސުލްޖުމްހޫރިއްޔާގެ އަށް މެމްބަރުން ވެސް ތިއްބެވީ ކުރީ ގޮނޑިބަރީގައި ކަމަށް ނަޝީދު ވިދާޅުވިއެވެ.
ރަދުންގެ އަށް މެމްބަރުންނާއި މާލޭގެ މެމްބަރުން ކުރީގައި ތިއްބަވަނީ 1932 ވަނަ އަހަރު އިށީންނެވި އިރުގައި. ދެން ފަހުން އައިސް ރަދުންގެ އަށް މެމްބަރުން އަޅުގަނޑުމެން ރަސްކަމެއް ދޫކޮށް ޖުމްހޫރިއްޔަތަކަށް ބަދަލުވީމާ 68 19 ވަނަ އަހަރުން ފެށިގެން އެއީ ރައީސުލްޖުމްހޫރިއްޔާގެ 8 މެމްބަރުންގެ ގޮތުގައި ކަނޑައެޅި އެބޭފުޅުން ކުރީ ގޮނޑިބަރީގައި ތިއްބަވަމުން ގެންދެވީ. 2008 ވަނަ އަހަރު މިހާރު އަމަލުކުރަމުންދާ ގާނޫނު އަސާސީ އަޅުގަނޑުމެންނަށް އޭގެ ދަށުން އަޅުގަނޑުމެންނަށް އިންތިޚާބުވާ ދާއިރާތަކުގެ މެމްބަރުންނަށްވެ މިހާރު ތި ތިއްބެވިގޮތަށް މެމްބަރުންނަށް މެމްބަރުންނަށް ތި ތިއްބަވަނީ ކުރިއްސުރެ ފަށައިގެން އެކަން އެގޮތަށް އޮންނާތީ.މަޖިލީހުގެ ރައީސް މުހައްމަދު ނަޝީދު
ނަވާރަ ވަނަ މަޖިލީހުގައި 87 މެމްބަރުން ތިއްބަވާއިރު މެމްބަރުން ތިއްބަވަނީ 2008 ވަނަ އަހަރުން ފެށިގެން ވެސް އަމަލު ކުރަމުން އަންނަ ދާއިރާތަކުގެ މެމްބަރުންގެ ތަރުތީބުންނެވެ. ނަމަވެސް ފުރަތަމަ ގޮނޑިބަރީގައި ތިއްބަވަނީ މާލޭގެ ދާއިރާތަކަށް ނިސްބަތްވާ ދާއިރާތަކުގެ މެމްބަރުންނެވެ.
