ބޭ އިންސާފުން ވަޒީފާއިން ވަކިކޮށްފައިވާ 301 މީހުންނަށް ވަޒީފާ ދިނުމުގެ މަސައްކަތް ދަނީ ކުރިއަށް: ރައީސް ސޯލިހު
6 ޖުލައި 2019 | ހޮނިހިރު 14:35ނުހައްގުން ވަޒީފާއިން ވަކި ކުރި 451 މައްސަލަ ހުށަހެޅިފައިވޭ
ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު
ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ސަރުކާރުން ނުހައްގުން ވަޒީފާއިން ވަކިކޮށްފައިވާ މީހުންގެ ތެރެއިން 301 މީހުންނަށް ވަޒިފާ އަނބުރާ ދިނުމުގެ މަސައްކަތް ކުރަމުން އަންނަ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް އޮފީހުގައި ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި، ރައީސް ޔާމީންގެ ސަރުކާރުން ނުހައްގުން ވަޒީފާއިން ވަކިކުރި މުވައްޒަފުންނަށް އަލުން، ވަޒީފާ ދިނުމުގެ މަސައްކަތް އޮތީ ކިހާ ހިސާބަކުތޯ "ރާއްޖެއެމްވީ" ން ސުވާލު ދެންނެވުމުން ރައީސް ވިދާޅުވީ، ރައީސް ޔާމީންގެ ސަރުކާރުން ނުހައްގުން ވަޒީފާއިން ވަކި ކުރި މުވައްޒަފުންގެ ތެރެއިން 301 މީހުންނަށް ވަޒީފާ އަނބުރާ ދޭން އެކަންތައް ބެލި ކޮމިޝަނުން އަންގާފައިވާ ކަމަށެވެ. އަދި އެ 301 މީހުންނަށް އަނބުރާ ވަޒީފާ ދިނުމަށް ކުންފުނިތަކަށާއި މިނިސްޓްރީތަކަށް އަންގާފައިވާ ކަމަށާއި،އޭގެ ތެރެއިން ބައެއް މީހުންނަށް، މިހާރު އަނބުރާ ވަޒީފާ ލިބިފައިވާ ކަމަށެވެ.
އިތުރު ޝަކުވާ އައިސްގެން އިތުރަށް ބަލަންވެގެން ހުއްޓިފައި ހުރި ބައެއް ވަޒީފާތައް އެބަހުރި ކަމަށާއި، ނަމަވެސް އެ ފަރާތްތަކަށް ވަޒީފާ އަނބުރާ ހޯދައިދިނުމުގެ މަސައްކަތް ކުރިއަށްދާ ކަމަށް ރައީސް ވިދާޅުވިއެވެ.
ކުރީގެ ރައީސް އަބުދުﷲ ޔާމީންގެ ވެރިކަމުގެ ދުވަސްވަރު ނުހައްގުން ވަޒީފާއިން ވަކިކޮށްފައިވާ މީހުންނާއި، ވަޒީފާ ބަދަލު ކުރި މީހުންގެ މައްސަލަތައް ހުށަހެޅުމުގެ ފުރުސަތު ރައީސް އޮފީހުން ހުޅުވާލީ މިދިޔަ އަހަރުގެ ޑިސެމްބަރުމަހުގެ ތިން ވަނަ ދުވަހެވެ. އަދި އެ މައްސަލަތަށް ހުށަހެޅުމަށް ސަރުކާރުން ދިނީ 30 ދުވަހުގެ މުއްދަތެކެވެ.
އެ މުއްދަތުގެ ތެރޭގައި ބޭއިންސާފުން ވަޒީފާ އިން ވަކި ކުރުން ނުވަތަ ވަޒީފާ ބަދަލު ކުރުމުގެ މައްސަލަތަކުގެ ގޮތުގައި ރައީސް އޮފީހަށް 451 މައްސަލައެއް ހުށަހެޅި ކަމަށް ރައީސް އޮފީހުން ވަނީ ބުނެފައެވެ. އެ މައްސަލަތައް ބަލަން ފަށާފައިވާ ކަމަށް މި އަހަރުގެ ޖެނުއަރީ މަހުގެ ތިން ވަނަ ދުވަހު ރައީސް އޮފީހުގެ ތަރުޖަމާން އިބްރާހިމް ހޫދު ވަނީ ވިދާޅުވެފައެވެ.
ހޫދު ވިދާޅުވެފައިވަނީ އެ މައްސަލަތައް ބަލާ، ނިންމުމަށް ވަކި ތާރީހެއް ކަނޑައެޅިފައި ނެތް ނަމަވެސް، އެ މައްސަލަތައް ބެލުމަށް ފަހު، އެ ފަރާތްތަކަށް އިންސާފު ހޯދައިދޭނެ ކަމަށެވެ.
ބޭއިންސާފުން ވަޒީފާ އިން ވަކިކޮށްފައިވާ މީހުން ނުވަތަ ވަޒީފާ ބަދަލުކޮށްފައިވާ މީހުންނަށް އިންސާފު ހޯދައިދިނުމަކީ ރައީސް ސޯލިހުގެ ފުރަތަމަ 100 ދުވަހުގެ ވައުދުގެ ތެރޭގައި ހިމެނު ކަމެކެއެވެ.
