ސުޕްރީމް ކޯޓުގެ ބެންޗު ހަތަކަށް ބަދަލުކުރުމަށް ހުށައަޅައިފި
ފަނޑިޔާރުންގެ އަދަދު ފަހަކަށް ބަދަލު ކުރީ 2014 ވަނަ އަހަރު
ސުޕްރީމް ކޯޓުގެ ފަނޑިޔާރުން
ސުޕްރީމް ކޯޓުގެ ފަނޑިޔާރުންގެ އަދަދު 7 އަށް ބަދަލުކޮށް ކޯޓުތަކުގެ ގާނޫނަށް އިސްލާހު ގެނައުމަށް މަޖިލީހަށް ހުށައަޅައިފިއެވެ.
ސަރުކާރުގެ ފަރާތުން މެދު ހެންވޭރު ދާއިރާގެ މެމްބަރު އަލީ އާޒިމް ހުށައެޅުއްވި އިިސްލާހުގައި ވަނީ ސުޕްރީމް ކޯޓުގެ ފަނޑިޔާރުންގެ އަދަދަކީ އުއްތަމަ ފަނޑިޔާރު ހިމެނޭ ގޮތުން ހަތް ފަނޑިޔާރުންނަށް އިތުރު ކުރުމަށެވެ.
އާ ގާނޫނު އަސާސީގެ ދަށުން އެކުލަވާލެވުނު ސުޕްރީމް ކޯޓުގައި ފުރަތަމަ ތިއްބެވީ ވެސް 7 ފަނޑިޔާރުންނެވެ. ނަމަވެސް 2014 ވަނަ އަހަރުގެ ޑިސެމްބަރުގައި ކޯޓުތަކަށް ގެނައި އިސްލާހާއެކު ފަނޑިޔާރުންގެ އަދަދު ފަހަކަށް ބަދަލުކޮށް އުއްތަމަ ފަނޑިޔާރާއި އެކު ފަސް ފަނޑިޔާރުން ތިއްބަވާ ގޮތަށް ބަދަލު ކުރިއެވެ. އެ އިސްލާހާއެކު މަގާމުން ދުރުކުރީ އޭރުގެ އުއްތަމަ ފަނޑިޔާރު އަހުމަދު ފާއިޒް ހުސެއިންނާއި، ފަނޑިޔާރު މުއުތަސިމް އަދުނާނު އެވެ.
2010 ވަނަ އަހަރު އެކުލަވާލެވުުނު ސުޕްރީމް ކޯޓުގައި ތިއްބެވި 7 ފަނޑިޔާރުން:
1. ފަނޑިޔާރު އަހުމަދު ފާއިޒް ހުސެއިން (އުއްތަމަ ފަނޑިޔާރު - މަޤާމުން ވަކިކުރެވިފައި)
2. ފަނޑިޔާރު އަބްދުﷲ އަރީފް (މިހާރުވެސް ސުޕްރީމް ކޯޓުގެ ބެންޗުގައިި)
3. ފަނޑިޔާރު މުއުތަސިމް އަދުނާނު (މަޤާމުން ވަކިކުރެވިފައި)
4. ފަނޑިޔާރު އަބްުދުﷲ ސައީދު (މަޤާމުން ވަކިކުރެވިފައި)
5. ފަނޑިޔާރު އަލީ ހަމީދު (މަޤާމުން ވަކިކުރެވިފައި)
6. ފަނޑިޔާރު އާދަމް މުހައްމަދު (މިހާރުވެސް ސުޕްރީމް ކޯޓުގެ ބެންޗުގައިި)
7. ފަނޑިޔާރު ޑރ. އަހުމަދު އަބްދުﷲ ދީދީ (މިހާރުގެ އުއްތަމަ ފަނޑިޔާރު)
ފަނޑިޔާރުންގެ އަދަދު ހަތަކަށް ބަދަލުކުރުމަށް އަލީ އާޒިމް ހުށައެޅުއްވީ އެ ބިލުގައިވަނީ ކޯޓުތަކުގެ ގާނޫނަށް ކުރިން އޮތް ގޮތަށް ހަތް ފަނޑިޔާރުންނަށްބަދަލު ކުރުމަށެވެ. އަދި 2010 ވަނަ އަހަރު ސުޕްރީމް ކޯޓުގެ ފަނޑިޔާރުންގެ އަދަދަކީ ހަތެއް ކަމުގައި ރައްޔިތުންގެ މަޖިލީހުން ކަނޑައަޅައިފައި ވަނިކޮށް، 2014 ވަނަ އަހަރު ސުޕްރީމް ކޯޓުގެ ފަނޑިޔާރުންގެ އަދަދު ފަހަކަށް ބަދަލު ގެނެސްފައި ވަނީ ސިޔާސީ މަގުސަދެއް ހާސިލް ކުރުމަށް ކަމަށް އެ ބިލުގައި ވަނީ ބުނެފައެވެ. އެ ބިލުގެ ފުރަތަމަ ކިޔުން މަޖިލީހުގެ ހޯމަ ދުވަހުގެ ޖަލްސާގައިވަނީ އިއްވައިފަ އެވެ.
