2008 ވަނަ އަހަރު ތަރުން މަންސަހާނީ ޑައިރެކްޓްކޮށް ނެރުނު ފިލްމު "ދޯސްތާނާ"ގެ ދެވަނަ ބައިން ފެނިގެން ދާނީ ޖާންވީ ކަޕޫރާއި ކާތިކް އާރިޔަން ކަން ޕްރޮޑިއުސަރު ކަރަން ޖޯހަރު ކަށަވަރުކޮށްދީފި އެވެ.
ޓުވިޓާ މެދުވެރިކޮށް ކަރަން ޖޯހަރު އެކަން ކަށަވަރުކޮށްދީފައިވާއިރު ޖާންވީ އާއި ކާތިކްގެ އިތުރުން ދެން ފެނިގެންދާނެ ފަންނާނުންގެ ނަން ވަނީ އަދި ސިއްރުކޮށްފަ އެވެ. އަދި އެ ރޯލު ކުޅޭނީ އެ ރޯލަށް އެންމެ އެކަށީގެންވާ މީހާކަމަށާއި, އެރޯލުން ފެންނާނީ މުޅިން އާ މޫނެއް ކަމަށް ކަރަން ވަނީ ބުނެފަ އެވެ.
2008 ވަނަ އަހަރު ކަރަން ޖޯހަރު ޕްރޮޑިއުސްކޮށް ނެރެފައިވާ ފިލްމު ވެގެންގޮސްފައިވަނީ އެ އަހަރު ނެރުނު ފިލްމުތަކުގެ ތެރެއިން އެންމެ މަޝްހޫރު އެއް ފިލްމަށެވެ.
ފިލްމު ދޯސްތާނާގެ ފުރަތަމަ ބައިން ފެނިގެންގޮސްފައިވަނީ ހޮލީވުޑްގައި މިހާރު ވިދަމުންދާ ތަރި ޕްރިޔަންކާ ޗޯޕްރާ އާއި އަބީޝޭކް ބައްޗަންގެ އިތުރުން ޖޯން އަބްރަހަމް އެވެ.
ޖާންވީ ބޮލީވުޑަށް ތައާރަފްވެފައި ވަނީ 2018 ވަނަ އަހަރު ކަރަން ޖޯހަރުގެ ފިލްމް ދަޑަކްއިންނެވެ. ޖާންވީ އަކީ މަޝްހޫރު ފިލްމީ ތަރި ސްރީދޭވީ އަދި ބޮނީ ކަޕޫރުގެ ދަރިއެވެ.
ކާތިކް ބޮލީވުޑަށް ތައާރަފުވެފައިވަނީ ލަވް ރަންޖަން ޑައިރެކްޓުކޮށް 2011 ވަނަ އަހަރު ނެރުނު ފިލްމު ޕިޔާރް ކާ ޕަންޗްނާމާ އިންނެވެ.
