އުމުރުން 39 އަހަރުގައި ނަފްސާނީ މައްސަލައެއް ދިމާވި: ކާންޔޭ ވެސްޓް
ކާންޔޭގެ "ޔޭ" އަލްބަމް ނެރެފައި ވަނީ މެއި 31 ގައި
ކާންޔޭ ވެސްޓް
އޭނާގެ އުމުރުން 39 އަހަރުގައި ނަފްސާނީ މައްސަލައެއް ދިމާވި ކަމަށް ހޮލީވުޑްގެ މަޝްހޫރު ރެޕް އާޓިސްޓް ކާންޔޭ ވެސްޓް ބުނެފިއެވެ.
ކާންޔޭ މިހެން ބުނެފައި ވަނީ އޭނާގެ އާ އަލްބަމް "ޔޭ" އާ ބެހޭ ގޮތުން ދީފައިވާ ރޭޑިއޯ އިންޓަވިއުއެއްގެ ތެރޭގައެވެ.
ކާންޔޭ އެ އިންޓަވިއުގައި ބުނެފައި ވަނީ އޭގެ ކުރިން ނަފްސާނީ އެއްވެސް މައްސަލައެއް ދިމާ ނުވާ ކަމަށާއި އޭނާގެ އާ އަލްބަމުގައި ބުނެފައިވާ ފަދައިން އެ ނަފްސާނީ މައްސަލައަކީ ޚާއްސަ އެހީއަށް ބޭނުންވާ ކަމެއް ނޫން ކަމަށެވެ. އެކަމުގެ މާބޮޑު ތަފްސީލެއް އޭނާއެއް ނުދިނެވެ.
މީގެ ކުރިން 2016 ވަނަ އަހަރު ކާންޔޭގެ އަލްބަމެއް ކަމަށްވާ "ދަ ލައިފް އޮފް ޕްބްލޯ" އަށް ޓުއާއެއް ދެމުން ދަނިކޮށް އޭނާ ވަނީ ސްޓޭޖް މަތީގައި މޮޔަ ވާހަކަތަކެއް ދައްކާފައެވެ. އެފަހަރު ހޮސްޕިޓަލްގައި އެޑްމިޓްކުރުމަށް ފަހު އޭނާ އަށް ވަނީ ފަރުވާ ދީފައެވެ. ކާންޔޭ ވަނީ އެފަހަރު އޭނާ ދެމުން އައި ޓުއާ ކެންސަލްކޮށް ޓުއާގެ ޓިކެޓް ނެގި ފަރާތްތަކަށް ރިފަންޑް ދީފައެވެ. އޭރު ރިޕޯޓް ކޮށްފައިވާ ގޮތުގައި ކާންޔޭއަށް އެހެން ވީ އޭނާ މާބޮޑަށް ވަރުބަލިވުމުންނެވެ. އެހެންވެ ހޮސްޕިޓަލްގައި އެޑްމިޓްކުރީ ކަމަށް ވަނީ ރިޕޯޓްކޮށްފައެވެ. އޭނާއަށް ވަނީ ނަފްސާނީ މައްސަލަތަކަށް ހޮސްޕިޓަލުގައި ފަރުވާ ވެސް ދީފައެވެ.
ދެ އަހަރު ފަހުން ނެރުނު ކާންޔޭގެ އައު ސޯލޯ އަލްބަމް "ޔޭ" ނެރެފައި ވަނީ މެއި 31 ގައެވެ.
