ޕްރިޔަންކާއާއި ނިކް ޖޯނަސް: ގިނަ ގިނައިން އެކުގައި ފެންނަން ފަށައިފި، ރަށްޓެހި ވެގެންކަން ހާމަ ކުރަނީ؟

ހޮލީވުޑްގައި އެންމެ ކާމިޔާބު ހޯދާފައިވާ އިންޑިއާގެ ސިނަމާއަށް ނިސްބަތްވާ ޕްރިޔަންކާ ޗޯޕްރާއާއި 'ޖޯނަސް ބްރަދަރސް' ބޭންޑްގެ ނިކް ޖޯނަސްއާ ރަށްޓެހިވެގެން އުޅޭ ވާހަކަ އަނެއްކާވެސް ފެތުރެން ފަށައިފިއެވެ.

ދެ މީހުން ރަށްޓެހިވެގެން އުޅޭ ވާހަކަ ފުރަތަމަ ފެށިފައިވަނީ 2017 ވަނަ އަހަރުގެ މޭ މަހުގައެވެ. އެއީ އެކުގައި މެޓް ގާލާއަށް ދިއުމަށް ފަހެވެ. ނަމަވެސް ދެ މީހުން ވެސް ވަނީ 'އެއީ އެކަހަލަ ކަމެއް ނޫން'ކަން ދޭހަވާ ގޮތަކަށް ވާހަކަ ދައްކާފައެވެ. އަދި 2017 ވަނަ އަހަރުގެ މެޓް ގާލާއަށް އެކުގައި ދިޔަ ސަބަބަކީ ދެ މީހުންގެ ކޮސްޓިއުމް ޑިޒައިން ކުރީ އެކަކު ކަމަށްވުން ކަމަށް އެމީހުން ފާހަގަ ކޮށްފައިވެއެވެ.

ނަމަވެސް މި ދެ މީހުންގެ ގުޅުމުގެ ވާހަކަ އަނެއްކާ ވެސް މިވަނީ ފެށިފައެވެ. އަދި ހޮލީވުޑްގެ 'ޕީޕަލް' ފަދަ މެގަޒިން ތަކުން ވަނީ މި ވާހަކަތައް ކަށަވަރު ކޮށްދީފައެވެ.

ރިޕޯޓްތަކުގައިވާ ގޮތުން، ނިމިގެން ދިޔަ ބުރާސްފަތި ދުވަހު ނިކްއާއި ޕްރިޔަންކާ އެކުގައި ވެސްޓް ހޮލީވުޑްގައި ހުންނަ ޓޯކާ މެޑެރާއިން ވަނީ ފެނިފައެވެ. 'ރޮމޭންޓިކް' ޑިނަރއެއްގައި ތިއްބައެވެ. އަދި އޭގެ ކުރީ ހަފްތާ ބަންދުގައި ވެސް ދެ މީހުން އެކީ ފެނިފައިވެއެވެ. އެގޮތުން، މޭ 25ގައި ދެ މީހުން އެކުގައި 'ބިއުޓީ އެންޑް ދަ ބީސްޓް'ގެ ލައިވް ކޮންސަޓެއް ބަލަން ގޮސްފައިވާ އިރު، ޖެހިގެން އައި ދުވަހު އެ މީހުން ވަނީ ލޮސް އެންޖެލެސް ޑޮޖަރސް ބޭސްބޯލް ގޭމެއް ބަލަން ގޮސްފައެވެ. އަދި ހޮލީވުޑްގެ ގިނަ ތަރިންނާ އެކު ދެ މީހުން ބޯޓެއްގައި 'ވަރަށް ކޯޒީ'ކޮށް ތިއްބާ ފެންނަ ފޮޓޯތަކެއް ވެސް ސޯޝަލް މީޑިއާގައި އާންމު ވެފައިވެއެވެ.

ޕްރިޔަންކާ އަދި ނިކް ވެސް މިހާރު ގުޅުން ސިއްރު ކުރަން މަސަައްކަތް ނުކުރާކަމަށް ދެ މީހުން އެކުގައި ފެނިފައިވާ ފަރާތްތަކުން ފާހަގަ ކުރެއެވެ. މީޑިއާ ތަކުގައި ފާހަގަކޮށްފައިވާ ގޮތުގައި ދެ މީހުން ފެންނަނީ 'އަތުގައި ހިފައިގެން ވަރަށް ލޯބިން އުޅޭތަނެ'ވެ. ނަމަވެސް ލޯބީގެ ގުޅުމާ ގުޅޭ ގޮތުން ދެ މީހުން ވެސް މިހާތަނަށް އެއްޗެއް ބުނެފައެއް ނުވެއެވެ.

ޕްރިޔަންކާއާއި ނިކް އެކުވެރިންނާ އެކު