މަންމަ ބޭނުންވީ ކޮއްކޮ ހުޝީ ކަޕޫރު އެކްޓްރެސްއަކަށް ވާން ކަމަށް މަޝްހޫރު ބަތަލާ ސްރީދޭވީ އާއި ޕްރޮޑިއުސަރު ބޯނީ ކަޕޫރުގެދޮށީ އަންހެން ދަރިފުޅު ޖާންވީ ކަޕޫރު ބުނެފިއެވެ.
އިންޑިއާގެ މަޝްހޫރު މެގަޒިން "ވޯގް" އަށް އުމުރުން 21 އަހަރުގެ ޖާންވީ ކަޕޫރު، ދިން ފުރަތަމަ އިންޓަވިއުގައި ބުނެފައި ވަނީ ސްރީދޭވީ ބޭނުންވީ އޭނާގެ ބަދަލުގައި ކޮއްކޮ ހުޝީ ފިލްމީ ދާއިރާ އަށް ނެރުމަށް ކަމަށެވެ. ފިލްމް ކުޅޭ ވަރަށް ޖާންވީގެ ހަށިގަނޑު ބައްޓަން ނުކުރެވޭނެ ކަމަށް އޭނާގެ މަންމަ ހީކުރި ކަމަށް ޖާންވީ ބުންޏެވެ .އަދި ސްރީދޭވީ ބޭނުންވީ އޭނާ ހަމަޖެހޭ ދިރިއުޅުމެއް އުޅުމަށް ކަމަށެވެ.
ސްރީދޭވީގެ ކުއްލި މަރަށް ފަހު، އޭނާގެ ބައްޕަގެ އަނެއް ދެ ދަރިން ކަމަށްވާ ފިލްމީ ތަރި އަރުޖުން ކަޕޫރާއި އަންޝުލާ ކަޕޫރާއި ޖާންވީއާ ދެމެދު ވަނީ ގުޅުން ބަދަހިވެފައެވެ. ޖާންވީ ބުނެފައި ވަނީ އާއިލާގެ ގުޅުން ބަދަހިވުމުން ސަލާމަތާއި ރައްކާތެރިކަން ލިބިގެންދާނެ ކަމަށެވެ. އަދި އޭނާގެ ބައްޕައަށް ވެސް ހިތްހަމަ ޖެހުން ލިބޭނެ ކަމަށެވެ. ސްރީދޭވީ ދުނިޔޭގައި ހުރި އިރު އަރުޖުން އާއި އަންޝުލާއާ މާ ބޮޑު ގުޅުމެއް އެ އާއިލާ އިން ބާއްވާފައެއް ނުވެއެވެ.
މަންމަގެ މަރަކީ އާއިލާއަށް ލިބުނު ވަރަށް ބޮޑު ގެއްލުމެއް ކަމަށާއި ދުވަހަކު ވެސް ގެޓްއޯވަރ ނުވެވޭނެ ކަމަށް ޖާންވީ ބުންޏެވެ.
މިދިޔަ ފެބްރުއަރީ މަހު ސްރީދޭވީ ކުއްލި ގޮތަކަށް މަރުވި ނަމަވެސް، އެހިތާމަވެރި ވަގުތުގައި ވެސް ކުޑަދުވަސްކޮޅެއްގެ ތެރޭގައި ޖާންވީ ވަނީ ފިލްމްގެ ޝޫޓީންތައް ފަށާފައެވެ.
ޖާންވީ ބުނީ އެހިތާމަވެރި ވަގުތުގައި ވެސް ހިތްވަރުކޮށް އޭނާ މަސައްކަތް ފަށާފައި ވަނީ އޭނާގެ މަންމަ އަށްޓަކައި ކަމަށެވެ.
ޖާންވީ ބުނެފައި ވަނީ އޭނާގެ މައިންބަފައިންނަށްޓަކައި ފަޚުރުވެރިވާ ކަމަށާއި އޭނާ ބޭނުން ވަނީ އޭނާއާ ދޭތެރޭ އޭނާގެ މައިންބަފައިން ވެސް ފަޚުރުވެރިވާން ކަމަށެވެ.
އަންނަ ޖުލައި މަހުގެ 20 ވަނަ ދުވަހު ރިލީޒް ކުރުމަށް ހަމަޖެހިފައިވާ އޭނާގެ ފުރަތަމަ ފިލްމް "ދަޅަކް" ގެ ޝޫޓިން މިހާރު ވަނީ ނިންމާލާފައެވެ.
