އައިޖީއެމްއެޗް އިން ސީޓީ ސްކޭންގެ ޚިދުމަތް މެދުކަނޑާލައިފި
23 ޖޫން 2019 | އާދީއްތަ 03:32ސީޓީ ސްކޭންގެ ހިދުމަތް ދޭން ފަށާނެ ދުވަހެއް އެ ހޮސްޕިޓަލުން ބުނެފައެއްނުވޭ
އިންދިރާ ގާންދީ މެމޯރިއަލް ހޮސްޕިޓަލް
އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިިން ސީޓީ ސްކޭންގެ ހިދުމަތް ވަގުތީގޮތުން މެދުކަނޑާލައިފި އެވެ.
ވަގުތީގޮތުން ހިދުމަތް މެދުކަނޑާލިކަން ހާމަކޮށް، އައިޖީއެމްއެޗުން ނެރުނު ބަޔާނެއްގައި ބުނީ ސީޓީ ސްކޭން މެޝިން މަރާމަތުކުރުމުގެ މަސައްކަތަށްޓަކައި ހޮނިހިރު ދުވަހުން ފެށިގެން ވަގުތީގޮތުން އެ ހިދުމަތް މެދުކަނޑާލައިފައިވާކަމަށެވެ. އަދި ހިދުމަތް ވަގުތީގޮތުން މެދުކެނޑިފައިވީނަމަވެސް އެމެޖެންސީކޮށް ހަދަންޖެހޭ ސްކޭންތައް އާސަންދަ އާއި ޓްރީޓޮޕް ހޮސްޕިޓަލުން ހެދޭނެ އިންތިޒާމް ހަމަޖެހިފައިވާ ކަމަށް އައިޖީއެމްއެޗުން ބުންޏެވެ.
ނަމަވެސް ހިދުމަތް އަލުން ފަށާނެ ތަރީހެއް ހޮސްޕިޓަލުން ހާމައެއް ނުކުރެ އެވެ.
އައިޖީއެމްއެޗުގައި ސީޓީ ސްކޭން ހެދުމަށް މައްސަލަތަކެއް ކުރިމަތިވީ މިދިޔަ ހަފުތާގެ ހުކުރު ދުވަހު އެ ހޮސްޕިޓަލުގައި ހިނގި އަލިފާނުގެ ހާދިސާ އަށް ފަހު އެވެ. އެއަށްފަހު މިދިޔަ ހޯމަ ދުވަހު އެ ހިދުމަތް އަލުން ފެށިނަމަވެސް މަރާމާތުގެ މަސައްކަތަށް ހޮނިހިރު ދުވަހު އަނެއްކާވެސް ވަނީ އެޚިދުމަތް މެދުކަނޑާލާފައެވެ.
