ދައުލަތުގެ ފައިސާގައި ޖެހިވަޑައިގެންފައިވާކަމަށް ނަތަންޔާހޫގެ އަނބިކަނބަލުން އެއްބަސްވެވަޑައިގެންފި

ދައުލަތުގެ ފައިސާ ނަހަމަ ގޮތުގައި ބޭނުން ކުރެއްވި ކަމަށާއި 15،000 އެމެރިކާ ޑޮލަރު ދައުލަތަށް ދައްކަވަން ޖެހޭކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އަނބިކަނބަލުން އެއްބަސްވެ ވަޑައިގެންފިއެވެ.

ސާރާ ނަތަންޔާހޫގެ މައްޗަށް ތުހުމަތު ކުރެވެނީ ބޮޑުވަޒީރުގެ ރަސްމީ ގެކޮޅުގައި ފަރިއްކޮޅު ނުހުންނަ ކަމަށް ވިދާޅުވެ އިތުރުފުޅު ހައްދަވައިން ބޭރުން ކޭޓަރިންގެ ޚިދުމަތް ހޯއްދަވުމަށް 99،300 އެމެރިކާ ޑޮލަރު ޚަރަދު ކުރެއްވިކަމަށެވެ. އެކަމަނާގެ މައްޗަށް މިދިޔަ އަހަރު ވަނީ އިތުބާރު ގެއްލޭފަދަ އަމަލެއް ހިންގެވުމާއި އޮޅުވާލެއްވުމުގެ ދައުވާ އުފުލާފައެވެ.

އެކަމަނާގެ ވަކީލު ވިދާޅުވެފައިވަނީ އެކަމަކީ އެކަމަނާއާ ގުޅުމެއް އޮތް ކަމެއް ނޫންކަމަށާއި އެކަން ކުރަމުންދަނީ އެކަމަނާގެ ފިރިކަލުންގެ މަގާމު ގެއްލުވާލުމަށްކަމަށެވެ.

އިއުތިރާފާއެކު ސާރާ ނަތަންޔާހޫ ދައުލަތަށް 12،490 އެމެރިކާ ޑޮލަރު ދައްކަން ޖެހޭއިރު ޖޫރިމަނާގެ ގޮތުގައިވެސް 2،777 ޑޮލަރު ދައްކަން ޖެހެއެވެ. އެކަމަނާގެ މައްޗަށް ކުރެވޭ ދައުވާ ކުޑަ ކުރި ނަމަވެސް ޖިނާއީ ކުށުގެ ރެކޯޑް އޮންނާނެކަމަށް ޖެރުއްސަލެމް ޕޯސްޓްގައި ރިޕޯޓްކޮށްފައިވެއެވެ.