މިޔަންމާގެ އަސްކަރީ ބޯޓެއް ވެއްޓުނީ މޫސުން ގޯސްވުމުގެ ސަބަބުން: ދައުލަތުގެ މީޑިއާ
ބޯޓުގެ ޕައިލެޓު ސީދާ ވިއްސާރަ ކޮޅިގަނޑުން ދަތުރު ކުރީ ކީއްވެ ކަމެއް ނޭނގޭ، އާންމުކޮށް މޫސުމާއި ބެހޭ ރާޑަރުން އެފަދަ ކޮޅިގަނޑުން ސަލާމަތް ވުމަށް އެހީވެދޭ
ޗައިނާގައި އުފައްދާފައިވާ ވައި 8 މަރުކާގެ ބޯޓެއް، ވެއްޓިފައި ވަނީ މި މޮޑެލްގެ ބޯޓެއް
މިދިޔަ ޖޫން މަހު 122 މީހުންނާއި އެކު ދަތުރުކުރަމުން ދަނިކޮށް ވެއްޓުނު މިޔަންމާ އަސްކަރިއްޔާގެ ބޯޓު ވެއްޓުނީ މޫސުން ގޯސްވުމުގެ ސަބަބުން ކަމަށް ދައުލަތުގެ މީޑިއާ އިން ބުނެފިއެވެ.
ޗައިނާ އިން އުފައްދާފައިވާ މި މަތިންދާ ބޯޓު ވެއްޓުނީީ އަންޑަމަން ކަނޑަށް ޖޫން 7 ވަނަ ދުވަހުއެވެ. މިހާދިސާގައި އެއްވެސް ބަޔަކު ސަލާމަތް ނުވެއެވެ.
މި ހާދިސާ އަކީ މިޔަންމާގެ އޭވިއޭޝަން އިންޑަސްޓްރީގައި ހިނގި އެންމެ ނުރައްކާތެރި މިފަދަ ހާދިސާއެވެ. ހާދިސާގެ ތަހުގީގުން ހާމަވެފައި ވަނީ ބޯޓު ވިއްސާރަ ކޮޅިގަނޑެއްގައި ޖެހި ޕައިލެޓަށް ބޯޓުގެ ކޮންޓްރޯލް ގެއްލުނީ ކަމަށެވެ.
ފްލައިޓް ދަތުރުކުރަމުންދިޔައީ ބައިގަޑިއިރުގެ ކުރު ރާސްތަ ދަތުރެއްގައި ކަމަށްވާއިރު ބޯޓު ދަތުރު ކުރި ސަރަހައްދުގެ މޫސުން ގޯސްކަމުގެ އެއްވެސް ރިޕޯޓެއް ލިބިފައެއް ނުވާ ކަމަށް ކުރީގައި ބައެއް މީޑިއާތަކުން ރިޕޯޓުކޮށްފައިވެއެވެ.
އަސްކަރިއްޔާއިން ބުނާ ގޮތުގައި ވެއްޓުނު ބޯޓަކީ މިދިޔަ އަހަރުގެ މާޗް މަހު ގަނެފައިވާ ފްލައިޓެކެވެ. އަދި 809 ގަޑިއިރު ހަމަކޮށްފައި ވެއެވެ.
މި ފަހުގެ އަހަރުތަކުގައި މިޔަންމާގައި ވަނީ މަތިންދާ ބޯޓް ވެއްޓުމުގެ ބައެއް ހާދިސާތައް ހިނގާފައެވެ.
