ޤައުމީ އަރުޝީފަކީ ދައުލަތް ހެޔޮ ގޮތުގައި ހިންގުމަށް އެހީތެރިވެދޭނެ މުއައްސަސާއެއް: މިނިސްޓަރު ޔުމްނާ
ޤައުމީ އަރުޝީފު ފުރިހަމައަށް ގާއިމު ކުރުމަށް ވަރަށް ބޮޑަށް މަސައްކަތް ކުރަމުން ގެންދަން
ހެރިޓޭޖް މިނިސްޓަރ ޔުމްނާ މައުމޫނު
ޤައުމީ އަރުޝީފަކީ ދައުލަތް ހެޔޮ ގޮތުގައި ހިންގުމަށް އެހީތެރިވެދޭނެ މުއައްސަސާއެއް ކަމަށް މިނިސްޓަރ އޮފް އާރްޓްސް، ކަލްޗަރ އެންޑް ހެރިޓޭޖް، ޔުމްނާ މައުމޫނު ވިދާޅުވެއްޖެއެވެ.
ބައިނަލްއަޤްވާމީ އަރުޝީފު ދުވަހު މިނިސްޓަރު ނެރުއްވި ބަޔާނުގައި ވިދާޅުވީ ދިވެހިރާއްޖޭގެ ޤައުމީ އަރުޝީފު، އެކަށޭނެ ގޮތުގައި ގާއިމުވެ ފުރިހަމަ ވުމަކީ މުޅި ޤައުމަށް އަދި އަންނަން އޮތް ޖީލުތަކަށް ނުހަނު ބޭނުންތެރި އެހާމެ ފައިދާ ކުރާނެ ކަމެއް ކަމަށާއި ދިވެހި ޤައުމުގެ އެންމެހާ ކަންކަން އަންނަން އޮތް ޖީލުތަކަށް ފުރިހަމައަށް ވާސިލު ވާނީ ދިވެހި ޤައުމުގެ ފަތްފުއްތަކާއި ފުރޭފުތަކާއި ލިޔެކިޔުންތަކާއި ރިކޯޑުތައް ރަނގަޅަށް ރައްކާތެރިކޮށް ބެލެހެއްޓިގެން ކަމަށެވެ. އަދި މިހާރުން މިހާރަށް ވެސް ދައުލަތުގެ އޮފީސްތަކުން ދެވޭ ޚިދުމަތްތައް ހަރުދަނާކޮށް ފުރިހަމަ ކުރުމަށް ޓަކައިވެސް ރެކޯޑްސް މެނޭޖްމަންޓްގެ ކަންކަން ފުރިހަމަ ކުރެވޭނީ ޤައުމީ އަރުޝީފު އެކަށޭނެ ގޮތެއްގައި ގާއިމު ކުރެވިގެން ކަމަށް މިނިސްޓްރީން ބުންޏެވެ.
ދިވެހިރާއްޖޭގެ ޤައުމީ އަރުޝީފު ފުރިހަމައަށް ގާއިމު ކުރުމަށް ވަރަށް ބޮޑަށް މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވާ ޔުމްނާ ވަނީ ސަރުކާރުގެ އިތުރުން އަރުޝީފު ކުރުމުގެ މަސައްކަތް ކުރައްވަމުން ގެންދަވާ އަމިއްލަ ފަރާތްތަކުގެ ޚިދުމަތްތައް ފާހަގަކޮށް އެ ފަރާތްތަކަށް ހިތްވަރުދީ ޝުކުރު އަދާކުރައްވާފައެވެ. އަދި އަމިއްލަ ފަރާތްތަކަށް މިރޮނގުން ވެދެވެން އޮތް އެންމެބޮޑު އެހީތެރިކަމެއް ސަރުކާރުން ފޯރުކޮށްދޭނެ ކަމުގެ ޔަގީންކަން އެކަމަނާ ވަނީ އަރުއްވާފައެވެ.
9 ޖޫން އަކީ 2007 ވަނަ އަހަރުން ފެށިގެން ބައިނަލްއަޤްވާމީ އަރުޝީފު ދުވަހުގެ ގޮތުގައި ފާހަގަކުރަމުން އަންނަ ދުވަހެވެ. މިދުވަސް 9 ޖޫންގައި ފާހަގަކުރަނީ، ޔުނެސްކޯގެ ޖަމާޢަތެއް ކަމުގައިވާ އިންޓަރނޭޝަނަލް ކައުންސިލް އޮން އާކައިވްސް (ބައިނަލްއަޤްވާމީ އަރުޝީފު ޖަމްޢިއްޔާ) އައި. ސީ. އޭ. އުފެދުނީ 1948 ޖޫން 9 ގައި ކަމަށް ވާތީއެވެ. މި ދުވަސް ފާހަގަކުރުމުގެ މަޤްޞަދަކީ އަރުޝީފުކުރުމުގެ މުހިއްމުކަމުގެ މައްޗަށް އެންމެން ހޭލުންތެރި ކުރުމެވެ. އަދި މި ދުވަސް ފާހަގަކުރުމުގައި ބާރު އަޅާފައި ވަނީ އަރުޝީފުތައް ފަރުމާ ކުރެވެން ވާނީ ރައްޔިތުންނަށް ލާބަޔާ މަންފާ ލިބިނެވި ޚިދުމަތްތަކެއް ދެވޭނެ ގޮތްތަކެއްގެ މައްޗަށެވެ.
ރާއްޖޭގައި އަރުޝީފު ކުރުމުގެ މަސައްކަތްތައް މީގެ އެތައްސަތޭކަ އަހަރެއް ކުރީއްސުރެ ކުރެވިފައިވާކަން އެއީ ތާރީޚީ ގޮތުން ސާބިތުވާ ކަމެކެވެ. 12 ވަނަ ގަރުނުން ފެށިގެން ހުރި ލޯމާފާނުތަކަކީ މި ކަމުގެ ސާބިތު ހެކިތަކެކެވެ. ފަހުގެ ތާރީޚުގެ އަރުޝީފުގެ މަސައްކަތްތަކަށް ބަލާއިރު، ދުވަހުން ދުވަހަށް ގައުމުގެ ކަންކަން ލިޔެ އަރުޝީފު ކުރަން ފެށުނީ 1942 ޖެނުއަރީ 12ގައި ވުޒާރަތުލްދާޚިލިއްޔާގައެވެ. އަދި 1945 ގައި ހުޅުވުނު ކުތުބުޚާނާ އާއި، 1952ގައި ހުޅުވުނު ދާރުލްއާސާރަކީ ވެސް އަރުޝީފުގެ މަސައްކަތްތައް ކުރެވިފައިވާ ތަންތަނެވެ. އަދި 1968ގައި އުފެދުނު ޑިޕާޓްމަންޓް އޮފް އިންފޮމޭޝަން އެންޑް ބްރޯޑްކާސްޓިންގ އާއި، 1979 ގައި އުފެދުނު ދިވެހި ތާރީޚާ ސަގާފަތަށް ޚިދުމަތްކުރާ ގައުމީ މަޖިލީހާއި، 1982 ގައި އުފެދުނު ދިވެހިބަހާ ތާރީޚަށް ޚިދުމަތްކުރާ ގައުމީ މަރުކަޒަކީ އަރުޝީފު ކުރުމުގެ މަސައްކަތް ޤައުމީ ގޮތުން ކުރެވުނު މުއައްސަސާތަކެވެ. އަދި 2003 ގައި އުފެދުނު ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ (އެން.ސީ.އައި.ޓީ) އަކީ ޒަމާނީ ޓެކްނޮލޮޖީއާއެކު އަރުޝީފުގެ މަސައްކަތް ކުރެވޭ މުއައްސަސާއެއް ކަން ހެރިޓޭޖް މިނިސްޓްރީން ވަނީ ފާހަގަކޮށްފައެވެ.
މިނިސްޓްރީ އޮފް އިންފޮމޭޝަން، އާޓްސް އެންޑް ކަލްޗަރގެ ދަށުގައި އިދާރީ ގޮތުން ޤައުމީ އަރުޝީފުގެ ނަމުގައި އޮފީހެއް 1996 ނޮވެންބަރު 6 ގައި ސަރުކާރުން އުފެއްދިއެވެ.
ޤައުމީ އަރުޝީފަކީ ހަމައެކަނި ތާރީޚީ ރިކޯޑް ބަލަހައްޓާ ތަނަކަށްވުރެ ދައުލަތް ހެޔޮ ގޮތުގައި ހިންގުމަށް އެހީތެރިވެދޭނެ މުއައްސަސާއެއް ކަމަށާއި ހަރުދަނާ އަރުޝީފެއް ޤާއިމު ކުރެވި ބެލެހެއްޓުމަކީ އެ ގައުމެއްގެ ސަރުކާރުގައި ކަން ހިނގާފައިވާ ގޮތާއި ސަބަބާއި ހިނގި ގޮތް އޮޅުންފިލާނެ ނިޒާމެއް ކަމަށް ވެސް މިނިސްޓްރީން ވަނީ ބުނެފައެވެ. މީގެ އިތުރުން އިންސާނީ ހައްޤުތައް ދަމަހައްޓާ، އެ ކަންކަމާ ގުޅޭގޮތުން ސަރުކާރުގެ ނިންމުންތައް ބުނެ ދިނުމާއި ދިފާއު ކުރެވޭނެ ނިޒާމެއްކަމަށް ވެސް މިނިސްޓްރީން ބުނެއެވެ.
