ކެންޑިޑޭޓުންގެ މައްސަލާގައި އެމްޑީޕީން ހުށަހެޅި މައްސަލަ ހައިކޯޓަކަށް ނުބެލޭނެ: ދައުލަތް
ހައިކޯޓަށް މައްސަލަ ބެލޭނެ ކަަމާ މެދު ފަނޑިޔާރުންގެ ބެންޗުން ސުވާލު އުފެއްދި
ދިވެހިރާއްޖޭގެ ހައިކޯޓް
މިމަހުގެ 14 ވަނަ ދުވަހު ބާއްވަން ހަމަ ޖެހިފައިއޮތް ލޯކަލް ކައުންސިލްތަކުގެ އިންތިހާބް ސިވިލް ކޯޓުގެ ހުކުމަކާއެކު ފަސް ކުރުމާ ގުޅިގެން އިންތިހާބަށް ކުރިމަތިލި ފަރާތްތަކުގެ ފޯމުތައް އިލެކްޝަންސް ކޮމިޝަނުން ބާތިލް ކުރުމުން އެމްޑީޕީން ހައި ކޯޓަށް ހުށަހެޅި މައްސަލަ އެކޯޓަށް ނުބެލޭނެ ކަމަށް ދައުލަތުގެ ވަކީލާ ވިދާޅުވެއްޖެ އެވެ.
އެމްޑީޕީން ހައި ކޯޓަށް ހުށަހެޅި މައްސަލާގައި ބުރާސްފަތި ދުވަހު ބޭއްވި އަޑުއެހުމުގައި ދައުލަތުގެ ވަކީލާ ވިދާޅުވީ އިންތިހާބީ މައްސަލައެއް ކޯޓަށް ހުށަހެޅޭނީ އެ މައްސަލައަކާ ގުޅޭ ގޮތުން ޝަކުވާއެއް އޮތް ނަމަ އެ މައްސަލަ އީސީއަށް ހުށަހެޅުމަށް ފަހު ދޭ ޖަވާބަކުން ކަމަށެވެ. ވަކީލާ ވިދާޅުވީ އިންތިހާބާ ބެހޭ އާންމު ގާނޫނުގެ 64 ވަނަ މާއްދާގައި އެގޮތަށް ބަޔާންކޮށްފައިވާއިރު އެމްޑިޕީން އެ ގާނޫނާއި އެގޮތަށް އަމަލުކޮށްފައި ނުވާ ކަމަށެވެ.
އެމްޑީޕީން ހުށަހެޅި މި މައްސަލައިގަ އީސީގެ ފަރާތުން ވަކާލާތު ކުރައްވަނީ ބަންޑާރަ ނާއިބު އޮފީހުގެ ވަކީލުންނެވެ. ވަކީލާ ވަނީ އެ މައްސަލަ އަކީ ހައިކޯޓަށް ބެލޭނެ މައްސަލައެއް ނޫން ކަމަށް ކަނޑައަޅައި ދިނުމަށް އެދިފައި އެވެ.
ދައުލަތުގެ ވަކީލާގެ އިތުރުން ފަނޑިޔާރުންގެ ބެންޗުން ވެސް ވަނީ އިންތިހާބުތަކާ ބެހޭ އާންމު ގާނޫނުގެ 21 ވަނަ މާއްދާގެ ބ. އޮތްގޮތުން އެ މައްސަލަ ބެލުމުގެ އިހްތިސާސް ހައި ކޯޓަށް އޮތް ކަން ގަބޫލުކުރަންތޯ އެމްޑީޕީގެ ވަކީލާ ސުވާލު ކުރައްވައިފަ އެވެ.
އެ މާއްދާގެ ބ. ގައި ވަނީ ކެންޑިޑޭސީ ބަލައިނުގަތުމަށް ކޮމިޝަނުން ނިންމި ނިންމުމަކާ މެދު ހިތްހަމަނުޖެހޭ ނަމަ އެ މައްސަލައެއް ހުށަހަޅަން ޖެހޭނީ ސުޕްރީމް ކޯޓަށް ކަމަށާއި އެނޫން ކަމަކާ ގުޅޭ ގޮތުން ނަމަ ހައިކޯޓަށް މައްސަލަ ހުށަހަޅަންޖެހޭނީ ހައި ކޯޓަށް ކަމަށެވެ. ޖަވާބުދާރީވަމުން އެމްޑީޕީގެ ގާނޫނީ ވަކީލު އަނަސް އަބްދުއްސައްތާރު ވަނީ އެ ނުކުތާ އަށް ޖަވާބުދާރީވާން ފުރުސަތަކަށް އެދިވަޑައިގެންފައެވެ. ފަނޑިޔާރުންގެ ބެންޗުން ވަނީ އެ ފުރުސަތު އެޕާޓީއަށް ދީފައެވެ.
އެމްޑީޕީން ބުނީ ކައުންސިލް އިންތިހާބަށް ކުރިމަތިލާން ހުޅުވާލުމާ އެކު އެމްޑީޕީގެ ކެންޑިޑޭޓުންގެ ފޯމުތައް ބަލައިގަނެ ކެންޑިޑެސީ ގަބޫލުކުރުމަށް ފަހު، އެ ނިންމުން ބާތިލްކޮށް އެޕްރީލް 8 ގައި އޮންނަ އިންތިހާބަަށް އެ ކެންޑިޑޭޓުން އަލުން ކުރިމަތިލާން ޖެހޭ ގޮތަށް ހެދީ ސިވިލް ކޯޓުގެ ހުކުމާއި އިންތިހާބާ ބެހޭ ގާނޫނާ ވެސް ހިލާފަށް ކަމަށެވެ. އެހެންވެ އެމްޑީޕީން ހައި ކޯޓުގައި އެދުނީ އީސީގެ އެ ނިންމުމަކީ ބާތިލް ނިންމުމެއް ކަމަށް ކަނޑައަޅައި ދިނުމަށެވެ.
މީގެ އިތުރުން މައްސަލާގައި ބުނެފައި ވަނީ މައްސަލައާ ގުޅޭ ގޮތުން ވަކި ގޮތެއް ނިމެންދެން، އެމްޑީޕީ ކެންޑިޑޭޓުންގެ ކެންޑިޑެސީ ބާތިލްކުރަން ނިންމި ނިންމުމަށް އަމަލުކުރުން ފަސްކުރަން އީސީގެ މައްޗަށް އަމުރެއް ނެރެދޭން ވެސް އެމްޑީޕީން އެދިފައިވެ އެވެ.
ކައުންސިލްތަކުގެ އިންތިހާބު މިމަހުގެ 14 ވަނަ ދުވަހު ބޭއްވުމަށް ނިންމައި، 900 އަށް ވުރެ ގިނަ ކެންޑިޑޭޓުންގެ ކެންޑިޑެސީ ގަބޫލުކުރުމަށް ފަހު އީސީން ވަނީ އެ ނިންމުން ބާތިލްކޮށްފަ އެވެ. އެއީ، އިންތިހާބު ދެ މަހަށް ފަސްކުރަން ސިވިލް ކޯޓުން ކުރި ހުކުމާ ގުޅިގެންނެވެ.
