ސިނގިރޭޓު ބުއިން ހުއްޓާލާ މީހުންނަށް ބައިސްކަލް ދޭ ޕްރޮގްރާމެއް ފަށައިފި
31 މެއި 2019 | ހުކުރު 18:14އެ ބައިސްކަލެއް މިލްކް ވާނީ އެ މީހަކު ސިނގިރޭޓް ބުއިން ހުއްޓާލާތާ އެއްއަހަރު ވުމުން
ސިނގިރޭޓު ބުއިން ހުއްޓާލާ މީހާއަށް ބއިސްކަލް ހަވާލުކުރަނީ
ދުންފަތުގެ އިސްތިއުމާލް ނުކުރާ ދުވަހާއި ގުޅިގެން ސިނގިރޭޓު ބުއިން ހުއްޓާލާ މީހުންނަށް ބައިސްކަލެއް ދޭ ޕްރޮގްރާމެއް ފަށައިފިއެވެ.
މި ޕްރޮގްރާމަކީ ކެންސާ ސޮސައިޓީ އޮފް މޯލްޑިވްސް އާއި ބައިކް މޯލްޑިވްސް އަދި ސިސޭޝަން ކްލިނިކްތަކުން ގުޅިގެން ފަށާފައިވާ ޕްރޮގްރާމެކެވެ.
ހުކުރު ދުވަހު ފެށި މި ޕްރޮގްރާމް އިފްތިތާހުކޮށްދެއްވީ އެންވަޔަރަމެންޓް މިނިސްޓަރު ޑރ. ހުސެއިން ރަޝީދު ހަސަނެވެ. މި ޕްރޮގްރާމުގެ ދަށުން ދޭ ފުރަތަމަ ބައިސްކަލް ދީފައިވަނީ ސިނގިރޭޓް ބުއިން ހުއްޓާލާފައިވާ އަހްމަދު ރަޝީދަށް ބޮޑުބޭބެ ކިޔާ 12 އަހަރުގެ އަހުމަދު ފަޒީލް އަށެވެ.
އަހްމަދު ރަޝީދު ސިނގިރޭޓް ބުއިން ހުއްޓާލިތާ ހަތަރު މަސް ވަނީ ވެފައެވެ.
"ކުއިޓް. ރައިޑް. ލިވް ހެލްތީ" ގެ ނަމުގައި ފެށި މި ޕްރޮގްރާމުގެ ދަށުން ބައިސްކަލެއް ލިބޭނީ ސިނގިރޭޓް ބުއިން ހުއްޓާލަން އެހީތެރިވާ ސިސޭޝަން ކްލިނިކްތަކުގައި ރަޖިސްޓްރީވެފައިވާ މީހުންނަށެވެ. އަދި އެ ބައިސްކަލެއް މިލްކް ވާނީ އެ މީހަކު ސިނގިރޭޓް ބުއިން ހުއްޓާލާތާ އެއް އަހަރު ވުމުންނެވެ.
އައިޖީއެމްއެޗްގައި ހުންނަ ސިސޭޝަން ކްލިނިކް ހުޅުވިފައި ހުންނާނީ ހެނދުނު 9:00 މެންދުރު 3:00 އަށެވެ. އޭޑީކޭގައި ހުންނަ ސިސޭޝަން ކްލިނިކްގެ ހިދުމަތް ލިބޭނީ ހޮނިހިރު ދުވަހުގެ ހެނދުނު 10:00 އިން މެންދުރު 1:00 އަށެވެ.
ދަމަނަވެށި ކްލިނިކް ހުޅުވާފައި ހުންނަނީ ހެނދުނު 8:00 އިން މެންދުރު 1:30 އަށެވެ.
