ރިއާލް މެޑްރިޑްގެ ކެޕްޓަން ސާޖިއޯ ރާމޯސް ދާން ބޭނުންވަނީ ހިލޭ ޓްރާންސްފަރއެއްގަ ޗައިނާގެ ކްލަބަކަށް ކަމަށް އެ ކްލަބްގެ ރައީސް ފްލޮރެންޓީނޯ ޕެރޭޒް ބުނެފިއެވެ.

ރާމޯސް މިހާރު ބޭނުންވަނީ ޗައިނީސް ސުޕަރލީގުގެ ކްލަބަކަށް ކުޅެން ކަމަށް އޭނާ ގާތު ރާމޯސް ބުނެފައިވާ ކަމަށް ޕެރޭޒް ބުނީ ސްޕެއިންގެ ރޭޑިއޯ ސްޓޭޝަނަކަށް ދިން އިންޓަވިއުއެއްގައެވެ. ޗައިނާގެ ކްލަބުން ރާމޯސްގެ އޭޖެންޓަށް ވަރަށް ރަނގަޅު އޮފަރއެއް ލިބިފައިވާ ކަމަށް ރާމޯސް ބުނިކަމަށް ވެސް އޭނާ ބުންޏެވެ. ނަމަވެސް އެ ކްލަބަށް ޓްރާންސްފަރ ފީއެއް ނުދެއްކޭނެ ކަމަށް ޗައިނާގެ ކްލަބުން ބުނެފައިވެއެވެ.

ޕެރޭޒް ބުނީ ރާމޯސްއަށް ދިން ޖަވާބުގައި، ރިއާލް މެޑްރިޑަށް އެ ކްލަބުގެ ކެޕްޓަން ހިލޭ އެހެން ކްލަބަކަށް ދޫނުކޮށްލެވޭނެ ކަމަށް ބުނެފައިވާނެ ކަމަށެވެ. ޓްރާންފަރ ފީއެއް ދެއްކެން ޗައިނާގެ ކްލަބަށް ނެތީ ޗައިނާގެ ކްލަބްތަކަށް ކުޅުންތެރިން ގެންނަން ބޮޑެތި ފައިސާގެ އަދަދުތަކާއި ގުޅިގެން އެކަން ހުއްޓުވުމަށް ޗައިނާ ސަރުކާރުން އެކުލަވާލި ގަވައިދުގެ ސަބަބުންނެވެ.

ރާމޯސްއަކީ މިހާރު ރިއާލް މެޑްރިޑުގައި ހުރި އެ ކްލަބަށް އެންމެ ގިނަ ދުވަސް ވަންދެން ކުޅެފައިވާ ކުޅުންތެރިޔާއެވެ. 2005 ވަނަ އަހަރު ސްޕެއިންގެ ކްލަބެއް ކަމުގައިވާ ސެވިއްޔާއިން ރިއާލްއާ ގުޅުނު ފަހުން އޭނާ ވަނީ އެ ކްލަބަށް ކުޅުނު 606 މެޗުގައި 84 ލަނޑު ކާމިޔާބު ކޮށްދީފައެވެ. އޭނާ ވަނީ ރެއާލްއާ އެކު ސްޕެނިޝް ލީގް ހަތަރު ފަހަރު އަދި ޗެމްޕިއަންސް ލީގު ހަތަރު ފަހަރު ކާމިޔާބު ކޮށްފައެވެ.

ރާމޯސްއާ ޕެރޭޒްގެ ގުޅުން ގޯސްވީ މި ފަހަރުގެ ޗެމްޕިއަންސް ލީގުން ރިއާލް ކެޓި މެޗުގައި އަޔަކްސްއާ ދެކޮޅަށް ކުޅުނު މެޗުގެ ފުރަތަމަ ލެގަށް ފަހުގައެވެ. ފެބްރުއަރީ މަހުގެ ތެރޭގައި ކުޅުނު މެޗުގައި ގަސްތުގައި ރީނދޫ ކާޑެއް ހޯދި ކަމަށް ތުހުމަތުކޮށް، ފިޔަވަޅުއަޅަން ޔޫއެފްއާއިން ފޮނުވާފައިވެއެވެ. އެ ރީނދޫ ކާޑުގެ ސަބަބުން ދެވަނަ ލެގުގައި ކުޅުމުގެ ފުރުސަތު ރާމޯސްއަށް ވަނީ ގެއްލިފައެވެ.