އޭޝިއަން ޗެމްޕިއަންޝިޕުގައި ވާދަކުރުމަށް ޓީޓީ ޓީމު ޗައިނާއަށް ފުރައިފި

އަންނަ މަހުގެ 9 އިން 16 އަށް ޗައިނާގެ ވޫޝީގައި ފެށުމަށް ހަމަޖެހިފައިވާ އޭޝިއަން ޗެމްޕިއަންޝިޕްގައި ވާދަކުރާ ރާއްޖޭގެ ޓެބަލް ޓެނިސް ޓީމު އެގައުމަށް ދިއުމަށް ފުރައިފި އެވެ.

ބުރާސްފަތި ދުވަހު ހަވީރު ފުރި ޓީމުގައި ހިމެނެނީ އަންހެން 4 ކުޅުންތެރިންނާއި ފިރިހެން 3 ކުޅުންތެރިންނެވެ. އެގޮތުން ޓީމުގައި ހިމެނޭ އަންހެން ކުޅުންތެރިންނަކީ އައިމިނަތު ޝިއުރާ ޝަރީފާއި އައިޝަތު ރަފާ ނާޒިމާއި ފާތިމަތު ޖުމާނާ ނިމާލް އަދި އައިޝަތު ފަދުވާ ރަޝީދެވެ.

މި މުބާރާތަށް ފުރި ފިރިހެން ކުޅުންތެރިންނަކީ މޫސާ މުންސިފް އަހުމަދާއި މުހައްމަދު ޒީސްތު ނަސީމް އަދި މުހައްމަދު ޝައްފާން އިސްމާއިލް އެވެ. މި ޓީމާއެކު ޓީޓީ އެސޯސިއޭޝަންގެ ރައީސް އަލީ ރަޝީދު އަދި ގައުމީ ޓީޓީ ޓީމުގެ ބިދޭސީ ކޯޗު ޗަމިންދަ ރޮޑްރިގޯ ވެސް ވަނީ ޗައިނާ އަށް ފުރާފަ އެވެ.

މި މުބާރާތުގެ ކުރިން ގައުމީ ޓީޓީ ޓީމް ޗައިނާގެ ނަންޖިންގައި އެއް ހަފްތާގެ ފަރިތަކުރުންތައް ކުރިއަށްގެންދާނެ އެވެ. އެގޮތުން މި ފަރިތަކުރުންތަކުގައި އެގައުމުގެ ޕްރޮވިންސް ލެވެލްގެ ކުޅުންތެރިންނާއެކު މެޗުތައް ކުޅެވޭނެ ކަމަށް ޓީޓީ އެސޯސިއޭޝަނުން މައުލޫމާތުދެ އެވެ.

ޓީޓީ އެސޯސިއޭޝަނުން ބުނީ މުބާރާތުގެ ކުރިން ތަމްރީނު ދަތުރުގެ ކަންތައް ހަމަޖެހިގެން ދިޔައީ ރާއްޖޭގައި ހުންނަވާ ޗައިނާ ސަފީރު ހިޒް އެކްސެލެންސީ ވަން ފޫކަންގެ އެހީތެރިކަމާއެކުގައި ކަމަށެވެ.

މިފަހަރުގެ އޭޝިއަން ޗެމްޕިއަންޝިޕަކީ ރާއްޖެ އަށް ވަރަށް މުހިންމު މުބާރާތެކެވެ. އެގޮތުން މި މުބާރާތުގައި ރާއްޖޭގެ ކުޅުންތެރިންގެ ފެންވަރަށް ބެލުމަށްފަހު އަންނަ އަހަރު ބޭއްވުމަށް ހަމަޖެހިފައިވާ ވާލްޑް ޗެމްޕިއަންޝިޕްގައި ރާއްޖެއަށް ވާދަކުރުމުގެ ފުރުސަތު ލިބިގެންދާނެ އެވެ.