ނޭޝަންސް ލީގުގެ ސެމީ ފައިނަލުގައި އަންނަ ޖޫން މަހުގެ ނުވަ ވަނަ ދުވަހު އިންގްލޭންޑް އާއި ނެދަލޭންޑްސް ބައްދަލުކުރާ މެޗަށް ނެގި އިނގިރޭސި ސްކޮޑުގައި ޓޮޓެންހަމް ހޮޓްސްޕާއަށް ކުޅެމުން އަންނަ ހެރީ ކޭން ހިމަނައިފިއެވެ.
އިންގްލޭންޑްގެ ކެޕްޓަން ކޭންއަށް މިދިޔަ އެޕްރިލް މަހުގެ ހަވަނަ ދުވަހު އަނިޔާވެފައިވާއިރު، ޖޫން މަހުގެ އެއްވަނަ ދުވަހު ޔުއެފާ ޗެމްޕިއަންސް ލީގުގެ ފައިނަލުގައި ޓޮޓެންހަމް ހޮޓްސްޕާ އާއި ލިވަޕޫލް ބައްދަލުކުރާ މެޗުގައި ވެސް ނުކުޅެވޭނެއެވެ.
ނަމަވެސް އަނިޔާއިން ސަލާމަތްވެ، ޖޫން މަހުގެ ހަވަނަ ދުވަހު ނެދަލޭންޑްސްއާ ދެކޮޅަށް ކޭން ކުޅޭނެ ކަމަށް ވަނީ ބެލެވިފައެވެ. އެގޮތުން އިނގިރޭސި ކޯޗު ގެރެތު ސައުތު ގޭޓް ވަނީ މެޗަށް ނެގި 27 ކުޅުންތެރިންގެ ސްކޮޑުގައި އޭނާ ހިމަނާފައެވެ.
މިދިޔަ އަހަރު ރަޝިއާގައި ބޭއްވި ވޯލްޑް ކަޕުގެ ސެމީ ފައިނަލުން އިންގްލޭންޑް ކަޓާފައިވާއިރު، އެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ އެވޯޑު ކޭން ވަނީ ހޯދާފައެވެ.
ކޭންގެ އިތުރުން އިނގިރޭސި ސްކޮޑަށް ދުވަސްތަކަކަށްފަހު މެންޗެސްޓާ ޔުނައިޓެޑުގެ މާކަސް ރަޝްފޯޑް އާއި މެންޗެސްޓާ ސިޓީގެ ރަހީމް ސްޓާލިން އަދި ބޯންމައުތުގެ ކެލަމް ވިލްސަންވެސް ވަނީ ޖާގަ ހޯދާފައެވެ.
ނޭޝަންސް ލީގަށް ނެގި 27 ކުޅުންތެރިން 23 ކުޅުންތެރިންނަށް ކޯޗު ސައުތު ގޭޓް މަދުކުރާނީ ޗެމްޕިއަންސް ލީގު އަދި ޔޫރޮޕާ ލީގުގެ ފައިނަލް ބެލުމަށްފަހުއެވެ. އަދި މެޗު ޓީމު ޕޯޗުގަލްއަށް ފުރުމަށް ހަމަޖެހިފައިވަނީ ޖޫން ފަސްވަނަ ދުވަހުއެވެ.
