މި ސީޒަނަށްފަހު ރިބެރީ ބަޔާން ދޫކޮށްލާނެކަން އިއުލާންކޮށްފި

މި ސީޒަނަށްފަހު ބަޔާން މިއުނިކް ދޫކޮށްލާނެކަން، އެ ކްލަބަށް ކުޅެމުން އަންނަ ފްރާންސްގެ މިޑްފިލްޑަރ ފްރޭންކް ރިބެރީ އިއުލާންކޮށްފިއެވެ.

ނޫސްވެރިންނަށް މައުލޫމާތު ދެމުން ރިބެރީ ބުނީ، މިއީ އޭނާ ބަޔާންއާއެކު ހޭދަކުރާ ފަހު ސީޒަން ކަމަށާއި، އަލްވަދާއުކިޔުމަކީ ފަސޭހަކަމެއް ނޫން ކަމަށެވެ. އަދި ބަޔާންއާއެކު ހާސިލްކުރި ކަންކަމަކީ ހަނދާނުން ފޮހެލެވޭނެ ކަންކަން ނޫން ކަމަށްވެސް އޭނާ ބުނިއެވެ.

ރިބެރީ ބުނީ، ބަޔާންއާއެކު 20 އަށްވުރެ ގިނަ ތަށި ހޯދިފައިވާ ކަމަށާއި، ސީޒަން ނިމުމުގެ ކުރިން ބުންޑަސްލީގާ އާއި ޖަރުމަން ކަޕްވެސް ކާމިޔާބުކޮށް، ކާމިޔާބީގެ ތެރޭގައި ހިމަނަން ބޭނުންވާ ކަމަށެވެ.

ރިޕޯޓްތައް ބުނާގޮތުން އުމުރުން 36 އަހަރުގެ ރިބެރީ ބަޔާން ދޫކޮށް ދެން ބަދަލުވާނީ ގަތަރުގެ އަލް ސާދުއަށެވެ. އެކަމަށް ވާންޖެހޭ އެންމެ ފަހުގެ ތައްޔާރީތައް ވަމުން އަންނަ ކަމަށް ރިޕޯޓްތައް ބުނެއެވެ.

މީގެކުރިން ގަލަސަތަރާއި އަދި މާސޭއަށް ކުޅެފައިވާ ރިބެރީ ބަޔާންއަށް ބަދަލުވީ 2007 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް ކުޅުނު 422 މެޗުގައި 123 ލަނޑު ކާމިޔާބު ކޮށްފައެވެ.

ބަޔާންއާއެކު 8 ލީގު ތަށި ކާމިޔާބު ކޮށްފައިވާ ރިބެރީ ވަނީ ޖަރުމަން ކަޕް ފަސް ފަހަރު، ޖަރުމަން ސުޕަ ކަޕް ހަތަރު ފަހަރު، ޔުއެފާ ޗެމްޕިއަންސް ލީގު އެއް ފަހަރު، ޔުއެފާ ސުޕަ ކަޕް އެއްފަހަރު އަދި ފީފާ ކްލަބް ވޯލްޑްކަޕް އެއްފަހަރު ކާމިޔާބު ކޮށްފައެވެ.

ފްރާންސް ގައުމީ ޓީމާއެކު ފީފާ ވޯލްޑް ކަޕްގެ ދެވަނަ 2006 ވަނަ އަހަރު ހޯދާފައިވާ ރިބެރީ ވަނީ ގައުމީ ޓީމަށް ކުޅުނު 81 މެޗުގައި 16 ލަނޑު ކާމިޔާބު ކޮށްފައެވެ.

ފްރާންސްގެ އެންމެ މޮޅު ކުޅުންތެރިޔާގެ މަގާމު ތިން ފަހަރު ހޯދާފައިވާ ރިބެރީ ވަނީ ޔުއެފާގެ އެންމެ މޮޅު ކުޅުންތެރިޔާގެ މަގާމު އެއްފަހަރު އަދި ފީފާ ބެލޮންޑޯގެ ތިންވަނަ އެއްފަހަރު ހޯދާފައެވެ. އަދި އޭނާ ވަނީ 2013 ވަނަ އަހަރު ބޭއްވުނު ވޯލްޑް ކަޕްގެ ގޮލްޑެން ބޯލް ވެސް ހޯދާފައެވެ.