އާމިރު ޚާންގެ ''ލާލް ސިންގް ޗައްދާ'' ރިލީޒް ކުރުން އަންނަ އަހަރު

ބޮލީވުޑް އެކްޓަރ އާމިރު ޚާންގެ އަންނަން އޮތް ފިލްމް "ލާލް ސިންގް ޗައްދާ" އަންނަ އަހަރުގެ ޑިސެމްބަރުގައި ރިލީޒް ކުރާނެ ކަމަށް ރިޕޯޓްތައް ބުނެފިއެވެ.

ވިއާކޮމް 18 މޯޝަން ޕިކްޗާރސް އާއި އާމިރު ޚާން ޕްރޮޑަކްޝަން ގުޅިގެން އުފައްދާ މި ފިލްމަކީ ހޮލީވުޑްގެ ހިޓް ފިލްމް "ފޮރެސްޓް ގަމްޕް" ގެ ރީމޭކެކެވެ.

މި ފިލްމް ގެ ވާހަކަ ފުރަތަމަ ހާމަކޮށްފައި ވަނީ މާރޗް މަހު އާމިރު ޚާންގެ 54 ވަނަ އުފަންދުވަހުއެވެ.

މި ފިލްމުގައި އާމިރު ފެނިގެންދާނީ ލާލް ސިންގ ޗައްދާ ކިޔާ ކެރެކްޓަރއަކުންނެވެ. ލާލް ސިންގ ޗައްދާގެ ކެރެކްޓަރއަކީ "ފޮރެސްޓް ގަމްޕް"ގައި ޓޮމް ހޭންކްސް ކުޅެފައިވާ ފޮރެސްޓް ގަމްޕްގެ ކެރެކްޓަރ ތަމްޞީލުކުރާ ހިންދީ ކެރެކްޓަރއެވެ.

އާމިރު ބުނީ "ފޮރެސްޓް ގަމްޕް" އަކީ އޭނާއަށް ވަރަށް ކަމުދާ ފިލްމެއް ކަމަށާއި، މިއީ އާއިލާއަށް އެކުގައި ބަލައިލެވޭނެ، ދިރިއުޅުމާ މެދު މީހުން ގެންގުޅޭ ތަޞައްވުރު ރަނގަޅު ކޮށްދޭ ފަދަ ފިލްމެއް ކަމަށެވެ.

އާމިރު އިތުރަށް ބުނީ މި ފިލްމަށް އޭނާ މިހާރު ތައްޔާރުވަމުންދާ ކަމަށާއި، އެންމެ ބޮޑު ބަދަލެއް ފެންނާނީ އޭނާގެ ހަށިގަނޑުން ކަމަށެވެ. އެގޮތުން މި ފިލްމު ކުޅުމަށް އޭނާ މިހާރު ހުރި ވަރަށް ވުރެ 20ކިލޯ ހިކުމަށް މަސައްކަތް ކުރަމުންދާ ކަމަށް އޭނާ ބުންޏެވެ.

އާމިރު އެންމެ ފަހުން ކުޅެފައިވާ ފިލްމް "ތަގްސް އޮފް ހިންދުސްތާން" އަށް ބޮކްސް އޮފީހުގައި މާ ބޮޑު ކާމިޔާބީއެއް ލިބިފައެއް ނުވެއެވެ.