"ތަގްސް އޮފް ހިންދުސްތާން" އަށް އާމިރުހާން ނޭފަތް ތޮރުފައިފި

"ތަގްސް އޮފް ހިންދުސްތާން" ގެ ޝޫޓިންގައި އާމިރުހާން އޭނާގެ ނޭފަތް ތޮރުފައިފިއެވެ. އަންގާރަ ދުވަހުގެ ހެނދުނު ސުޝާންތު ސިންހު އިންސްޓާގްރާމަށް ލާފައިވާ ފޮޓޯގައިވަނީ އޭނާއާއިއެކު އާމިރުހާންގެ ވައަތު ނޭފަތް ތޮރުފައިވާ ފޮޓޯއެއް ލާފައެވެ.

އެ ފޮޓޯއަކީ އެކްޓަރު ސުޝާންތު ސިންގް ރާޖްޕުޓްއާ އެކު ޖިމެއްގައި ނަގާފައިވާ ފޮޓޯއެކެވެ.

އާމިރު ވަނީ މި ފިލްމަށް ތައްޔާރީ ވުމަށް އެކި ކަންތައްތައް ކުރަމުންނެވެ. އެ ގޮތުން އޭނާ ވަނީ އޭނާގެ އިސްތަށިގަނޑާއި ތުބުޅިވެސް ވަކި ގޮތަކަށް ބައްޓަންކޮށްފައެވެ.

އާމިރަކީ އަބަދުވެސް އޭނާ ކުޅޭ ކޮންމެ ފިލްމަކަށް އެހާ ތައްޔާރީ ވާ މީހެކެވެ. އެގޮތުން އޭނާގެ އެންމެ ފަހުން ނިކުތް ފިލްމު "ޑަންގަލް"އަށް ތައްޔާރުވުމަށްވެސް އޭނާ ވަނީ ވަރަށް ބޮޑަށް ބަރުދަން އިތުރުކޮށް، ބޮޑު ބަނޑެއްލައި، ފަހުން ހަމަ އެ ރޯލަށް ބަރުދަން ލުއިކޮށް، މުޅި މީހާ އަށް ބޮޑު ބަދަލެއް ގެނެސްފަ އެވެ.

"ތަގްސް އޮފް ހިންދުސްތާނުގެ ޑައިރެކްޓަރަކީ ވިޖޭ ކްރިޝްނާއެވެ.

މި ފިލްމުގެ ސްކްރިޕްޓް ލިޔެފައިވަނީ ވެސް އޭނާއެވެ. މި ފިލްމުގައި ފެނިގެންދާ ސްތާރުންނަކީ އާމިރުހާންގެ އިތުރުން އަމީތާބް ބައްޗަން، ފާތިމާ ސަނާ ޝައިޚް އާއި ޖެކީ ޝްރޮފްއެވެ. މި ފިލްމުގެ ޕްރޮޑިއުސަރަކީ އަދިތްޔާ ޗޮޕްރާއެވެ.