ދުނިޔޭގެ އެންމެ ފަލަމީހާ: ސަލްމާން ޚާންގެ ވަރަށް ބޮޑު ފޭނެއް!

އިޖިޕްޓަށް ނިސްބަތްވާ، ބަރުދަނުގައި 500 ކިލޯ ހުންނަ އީމާން އަހްމަދު އަބްދުލްއަތީއަކީ ސަލްމާން ޚާންގެ ވަރަށް ބޮޑު ފޭނެއް ކަމުގައި އޭނާ އެޑްމިޓްކޮށްފައިވާ ހޮސްޕިޓަލްގެ އޮފިޝަލުން ބުނެފިއެވެ.

މިއަހަރުގެ ފެބްރުއަރީ 11 ވަނަ ދުވަހު ފުރާނަ ސަލަމާތްކުރުމަށްޓަކައި ސާޖަރީއެއް ހެދުމަށް މުމްބާއީގެ ހޮސްޕިޓަލަކަށް ގޮސްފައިވާ 37 އަހަރުގެ އީމާން އެ ހޮސްޕިޓަލުގެ އޮފިޝަލުން ކައިރީ ބުނެފައިވާ ގޮތުގައި ސަލްމާންއަކީ އޭނާގެ އައިޑަލް ކަމަށާއި އަދި އޭނާ ސަލްމާންއާ ވަރަށް ބައްދަލު ކުރާހިތްވާ ކަމަށެވެ.

މިލްމް "ދަބަންގް" އިން ސަލްމާން ޚާންގެ ބޭބެގެ ގޮތުގައި ފެނިގެން ގޮސްފައިވާ އަރްބާޒް މި ވާހަކަތަކާ ގުޅިގެން ބުނެފައިވަނީ ސަލްމާން ޚާންގެ ވަރަށް ގިނަ ފޭނުން ތިބޭނެ ކަމަށާއި ނަމަވެސް އެ ހުރިހާ ފޭނުންނާ ބައްދަލުކުރުމަކީ ދަތިކަމެއް ކަމަށެވެ. އެހެން ނަމަވެސް ސަލްމާން ޚާންގެ ޓީމުން ދަނީ ސަލްމާންގެ މަސައްކަތުގެ ޝެޑިއުލް ބެލުމަށް ފަހު އީމާންއާ ބައްދަލުކުރެވޭނެ ގޮތެއް ހޯދޭތޯ މަސައްކަތް ކުރަމުން ކަމަށް ވެސް އަރްބާޒް ބުނެފައި ވެއެވެ.

ސަލްމާން ޚާނަކީ އަބަދުވެސް އޭނާގެ ހިތްހެޔޮކަމާއި ދީލަތިކަމަށް މީހުންގެ މެދުގައި މަޝްހޫރު މީހަކަށް ވާއިރު އީމާންގެ އުންމީދުވެސް އޭނާ ފުރިހަމަކޮށްދޭނެ ކަމާ މެދު ގިނަ ބަޔަކު ޝައްކެއް ނުކުރެއެވެ.

އީމާން އެނދުމަތިވެފައި އޮންނަތާ ދެ އަހަރެއްހާ ދުވަސް ވެއްޖެއެވެ.