ރެއާލްއިން އެރިކްސަން ބޭނުންވަނީ ފްރީ ޓްރާންސްފާއެއްގެ ދަށުން!

ރެއާލް މެޑްރިޑުން ބޭނުން ވަނީ ޓޮޓެންހަމް ހޮޓްސްޕާއަށް ކުޅެމުން އަންނަ ކްރިސްޓިއަން އެރިކްސަން ފްރީ ޓްރާންސްފާއެއްގެ ދަށުން ކަމަށް ރިޕޯޓްތައް ބުނެފިއެވެ.

މަޝްހޫރު ކުޅިވަރު ނޫހެއް ކަމަށްވާ ދަ ސަން އިން ބުނީ، ރެއާލް އިން އެރިކްސަން ބޭނުންވާ ކަމަށާއި، ނަމަވެސް އެ ކްލަބުން އޭނާ ބޭނުންވަނީ ޓޮޓެންހަމްއާ އެކު ހަދާފައިވާ އެއްބަސްވުން ހަމަވުމުން ފްރީ ޓްރާންސްފާއެއްގެ ދަށުން ކަމަށެވެ.

އުމުރުން 27 އަހަރުގެ އެރިކްސަން ޓޮޓެންހަމްއާ އެކު ހަދާފައިވާ އެއްބަސްވުން ހަމަވާނީ ކުރިޔަށް އޮތް ސީޒަނަށް ފަހުއެވެ. ބައެއް ރިޕޯޓްތައް ބުނާ ގޮތުން ޓޮޓެންހަމްއިން އެރިކްސަންގެ އެއްބަސްވުން އާކުރަން އަންނަނީ މަސައްކަތް ކުރަމުންނެވެ.

އެރިކްސަން ހޯދުމަށް ރެއާލްގެ އިތުރުން ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ބާސެލޯނާ ވެސް ހިމެނެއެވެ.

މީގެ އިތުރުން މެންޗެސްޓާ ޔުނައިޓެޑުން ވެސް އެރިކްސަން ހޯދުމަށް މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ. އަދި އެއީ ޔުނައިޓެޑުގެ ކޯޗު ސޯލްޝެއާގެ ކުރިޔަށް އޮތް ސީޒަނަށް އަމާޒުކޮށް ކުޅުންތެރިން ހޯދުމުގައި ޓާގެޓެއް ކަމަށް ވެސް ރިޕޯޓްތައް ބުނެއެވެ.

އަޔެކްސް އިން 2009 ވަނަ އަހަރު ކެރިޔަރު ފެށި އެރިކްސަން ޓޮޓެންހަމް އަށް ބަދަލުވީ 2013 ވަނަ އަހަރެވެ. އޭނާ ވަނީ މިހާތަނަށް އެޓީމަށް ކުޅުނު 271 މެޗުގައި 65 ލަނޑު ކާމިޔާބު ކޮށްފައެވެ.

ޓޮޓެންހަމްއާ އެކު ލީގް ކަޕްގެ ދެވަނަ 2014 ވަނަ އަހަރުގެ ސީޒަނުގައި ހޯދި އެރިކްސަން ވަނީ ޓޮޓެންހަމްގެ މޮޅު ކުޅުންތެރިޔާގެ މަގާމު ދެ ފަހަރެއްގެ މަތިން ހޯދާފައެވެ.

މީގެ އިތުރުން ހަތަރު ފަހަރު ޑެންމާކްގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ އެރިކްސަން ވަނީ ގައުމީ ޓިމަށް ކުޅުނު 87 މެޗުގައި 26 ލަނޑު ކާމިޔާބުކޮށްފައެވެ.