ހޭންޑްބޯލް މޯލްޑިވްސްއިން އިންތިޒާމުކޮއްގެން ކުރިއަށް ގެންދިޔަ، ހޭންޑްބޯލް ޖޫނިއާ ރެފްރީ ކޯސް ބެޗް 1 ފުރިހަމަކުރި ބައިވެރިންނަށް ސެޓްފިކެޓް ހަވާލުކޮއްފިއެވެ.

10 ދުވަހުގެ މުއްދަތަކަށް ކުރިއަށް ގެންދިޔަ މި ކޯސް ފުރިހަމަކުރި ބައިވެރިންނަށް ސެޓްފިކެޓް ހަވާލުކުރީ، ބުރާސްފަތި ދުވަހުގެ ރޭ ހޭންޑްބޯލް އެސޯސިއޭޝަން އޮފް މޯލްޑިވްސްގައި އެކަމައްޓަކައި ހާއްސަކޮއްގެން ބޭއްވި ކުޑަ ހަފްލާއެއްގައެވެ.

މި ހަފްލާގައި ހޭންޑްބޯލް މޯލްޑިވްސްގެ ފަރާތުން ވާހަކަ ދައްކަމުން، މި ކޯސް ކުރިއަށް ގެންދިއުމުގައި އެންމެ އިސްކޮށް ހަރަކާތްތެރިވި އެ އެސޯސިއޭޝަންގެ ޓެކްނިކަލް ޑިރެކްޓާ މުހަންމަދު ޝާން ވިދާޅުވީ، މި ކޯހުގެ ފުރަތަމަ ބެޗް ކާމިޔާބުކަމާއި އެކު ނިންމާ ލެވުމުން އެކަމާ އުފާކުރާ ކަމަށާއި، މުސްތަގުބަލުގައި މިކަމުގެ ފައިދާ ފެނިގެންދާނެ ކަމަށް އުންމީދު ކުރާ ކަމަށެވެ.

އިތުރަށް ވާހަކަ ދައްކަމުން ޝާން ވިދާޅުވީ، މި ކޯހުގައި ބައިވެރިންނަށް ކިޔަވާއި ދީފައި ވާނީ، ހޭންޑް ބޯޅައިގެ ގަވާއިދު ތަކާއި، މެޗެށް ކުރިއަށް ދާ ވަގުތު އޮފިޝަލުންގެ ޓޭބަލްގެ މަސައްކަތްތަށް ކުރިއަށް ގެންދަން ޖެހޭނެ ގޮތުގެ އިތުރުން، ސްކޯ ކީޕަރުގެ ޑިއުޓީ އާއި، ޓައިމް ކީޕަރުގެ ޑިއުޓީ އާއި، ރެފްރީކަން ކުރާނެ ގޮތް ކަމަށެވެ.

އެސޯސިއޭޝަނުން ބުނެފައިވަނީ މައިގަނޑު ގޮތެއްގައި މި ކޯހުގެ ބައިވެރިން ނޮމިނޭޓު ކުރެވިފައިވަނީ ސްކޫލްތަކުން ކަމަށެވެ. ޖުމްލަ 19 ކުދިން މި ކޯހުގައި ބައިވެރި ވިއިރު، ހުރިހާ ބައިވެރިންވެސް ކޯސް ފުރިހަމަ ކޮއްފައި ވާކަމަށް އެސޯސިއޭޝަނުން ވަނީ މައުލޫމާތު ދީފައެވެ. މި ކޯހުގެ 1 ވަނަ ބައިވެރިއަކަށް ހޮވިފައިވަނީ ޝަންމާ އަބްދު ސައްތާރު އެވެ.

ކޯހުގެ ބައިވެރިންގެ ފަރާތުން ވާހަކަ ދައްކަމުން އާމިނަތު ރަފާހާ ބުނެފައިވަނީ، މި ކޯސް ކާމިޔާބުކުރި ފުރަތަމަ ބައިވެރިންގެ ތެރޭގައި ހިމެނުމުން އެކަމާ އުފާކުރާ ކަމަށާ، މިކޯހުގެ ސަބަބުން މުސްތަގުބަލުގައި ގިނަގުނަ ފައިދާތަކެށް ވާނެކަމަށެވެ. މީގެ އިތުރުންވެސް ރަފާހާ ވަނީ ހުރިހާ ބައިވެރިންގެ ނަމުގައި އެސޯސިއޭޝަނުގެ މެނޭޖުމަންޓަށާއި ހުރިހާ ކޯޗުންނަށް ޝުކުރު އަދާކޮއްދަ އެވެ.