ނިއު މޮޅުވުން ހައްގެއް ނޫން، ރެފްރީންގެ ފެންވަރުދަށް: ސޮބާ

ގްރީން ސްޓްރީޓް އަތުން ނިއު މޮޅުވުން ހައްގެއް ނޫން ކަމަށާއި، މެޗުގައި ރެފްރީކަން ކުރި ރެފްރީންގެ ފެންވަރު ދަށް ކަމަށް ގްރީން ސްޓްރީޓްގެ ކޯޗު ސޮބާހް މުހައްމަދު (ސޮބާ) ބުނެފި އެވެ.

މެޗަށްފަހު ނޫސްވެރިންނަށް މައުލޫމާތު ދެމުން ސޮބާ ބުނީ އަލަށް ފުރަތަމަ ޑިވިޝަނަށް ނިކުތް ޓީމަކާއި ބަލާފައި ގްރީން އިން ނިއުއާ ދެކޮޅަށް ދެއްކި ކުޅުމާ މެދު ފަހުރުވެރިވާ ކަމަށާއި، މިއީ ނިއު އަށް ހައްގު މޮޅެއް ނޫން ކަމަށެވެ.

ސޮބާ ބުނީ ނިއު އިން ޖެހި ދެ ލަނޑަކީވެސް ބޯޅަ ކުޅެގެން އެޓީމުން ޖެހި ދެ ލަނޑެއް ނޫން ކަމަށާއި، އެއީ ގްރީން އިން އެޓީމަށް ދިން ދެ ލަނޑު ކަމަށެވެ. އެގޮތުން ސޮބާ ބުނީ ފުރަތަމަ ލަނޑަކީ ލޫޒް މާކިންއެއްގެ ފައިދާ ނަގާ ޖެހި ލަނޑެއް ކަމަށާއި، ދެވަނަ ލަނޑަކީ ރެފްރީއަށް ބަލަން ހަދައިގެން ޖެހި ލަނޑެއް ކަމަށެވެ.

ސޮބާ ބުނީ ރެފްރީއަކަށް ހުރީ ދެވަނަ ޑިވިޝަނުންވެސް ނުފެންނަ ރެފްރީއެއް ކަމަށާއި، ބޮޑެތި ހަރަދުތައް ކޮށްގެން ކްލަބްތައް ނިކުންނައިރު، ރަނގަޅު ރެފްރީންތައް ދަނީ ކްލަބް މޯލްޑިވްސް ފަދަ މުބާރާތްތަކުގައި ރެފްރީކަން ކޮށްގެން ލާރިހޯދަމަށް ކަމަށެވެ.

އެގޮތުން ސޮބާ ބުނީ ދަސްކުރާ ރެފްރީންތައް ބޮޑެތި މެޗުތަކަށް އެރުވުމުން ފުޓުބޯޅައިގެ ހާލަތުދާނެ ގޮތް އޭނާއަށް ބުނެދޭން ނޭނގޭ ކަމަށެވެ. ފުރަތަމަ ޑިވިޝަންގެ ގިނަ ކޯޗުން ރެފްރީންގެ ވާހަކަ ދައްކަމުން އަންނަ ކަމަށާއި، މެޗުތައް ރެފްރީންނަށް ކޮންޓްރޯލް ނުކުރެވޭކަމަށްވެސް ސޮބާ ވަނީ ބުނެފައެވެ.

ސޮބާ ބުނީ އޭނާ އަކީ ދުވަހަކުވެސް ރެފްރީންގެ ވާހަކަދައްކާ މީހެއް ނޫން ކަމަށާއި، މިއަދު ރެފްރީންގެ ވާހަކަ ދައްކަން ޖެހުނީ ދައްކަން ޖެހޭ ހިސާބަށް ދިޔުމުން މކަމަށެވެ. މީގެއިތުރުން އޭނާ ބުނީ ރެފްރީންގެ ވާހަކަދައްކަނީ އެއްގޮތަކަށްވެސް މެޗުން ބަލިވުމުން ނޫން ކަމަށާއި، ނުބައިކޮށް މާނަ ނުނެގުމަށް އެދޭ ކަމަށެވެ.

ގްރީން ސްޓްރީޓް ލީގުގައި ކުޅުނު ހަ މެޗުގެ ތެރެއިން ތިން މެޗުން މޮޅުވެފައިވާއިރު، ދެ މެޗުން އެޓީމު ވަނީ ބަލިވެފައެވެ. އަދި އެއް މެޗުން އެޓީމު ވަނީ އެއްވަރުވެފައެވެ.