ވިމްބަލްޑަން މުބާރާތުން މޮޅުވާ ކުޅުންތެރިންނަށް 3.6 މިލިއަން ޑޮލަރު

ދުނިޔޭގެ އެންމެ ދުވަސްވެފައިވާ ޓެނިސް މުބާރާތް ކަމުގައިވާ ވިމްބަލްޑަން ޓެނިސް ޗެމްޕިއަންސްޝިޕްގެ ސިންގަލްސް މުބާރާތުން މޮޅުވާ ކުޅުންތެރިންނަށް 3.6 މިލިއަން ޑޮލަރުގެ އިނާމެއް ކަނޑައަޅައިފިއެވެ.

މި އަހަރުގެ މުބާރާތުން މޮޅުވާ ދެ މިންތީގެ ކުޅުންތެރިންނަށް ދޭ އިނާމު ބޮޑުކޮށްފައިވާ އިރު، މިއީ މުބާރާތުގައި ކުޅޭ ކުޅުންތެރިންނަށް ދޭ ޖުމްލަ ފައިސާގެ އިނާމުގެ އަދަދަށް އައި 11.8 އިންސައްތައިގެ ކުރިއެރުމުގެ ސަބަބުން އައި ބަދަލެކެވެ. މުބާރާތުގެ އިނާމް ފައިސާ ވަނީ 44.2 މިލިއަނުން 49.4 މިލިއަނަށް ބޮޑުކޮށްފައެވެ.

މި ބަދަލުގެ ސަބަބުން ކޮލިފައިންގައި ނުވަތަ މުބާރާތުގެ ފުރަތަމަ ތިން ބުރުގެ ތެރެއިން ބަލިވާ ކޮންމެ ކުޅުންތެރިޔަކަށް ވެސް 13000 ޑޮލަރު ލިބޭނެއެވެ.

މިދިޔަ އަހަރުގެ ޗެމްޕިއަނުން ކަމުގައިވާ ނޮވާކް ޖޮކޮވިޗްއާއި އެންޖެލީކް ކަރބަރއަށް ލިބުނީ 2.93 މިލިއަން ރުފިޔާގެ އިނާމެއް ލިބިފައެވެ.

ވިމްބަލްޑަން މުބާރާތުގައިދޭ އިނާމު ބޮޑުކުރަން ނިންމި ކަމުގައިވީ ނަމަވެސް، އަދިވެސް ޓެނިހުގެ ދުނިޔޭގައި އެންމެ ބޮޑު ފައިސާގެ އިނާމެއް ލިބެނީ ޔޫއެސް އޯޕަން ޓެނިސް މުބާރާތުންނެވެ. އެ މުބާރާތުން މޮޅުވާ ސިންގަލްސް ޗެމްޕިއަނުންނަށް 3.89 މިލިއަން ޑޮލަރުގެ ފައިސާގެ އިނާމެއް ލިބެއެވެ.