އަންނަ މަހުގެ އެއްވަނަ ދުވަހު ފެށުމަށް ހަމަޖެހިފައިވާ 21 އަހަރުން ދަށުގެ އޭޝިއަން ބީޗް ވޮލީ ޗެމްޕިއަންޝިޕުގައި ވާދަކުރާ ރާއްޖޭގެ ޓީމުގެ އަމާޒަކީ މަދުވެގެން އެއް މެޗު ކާމިޔާބުކުރުން ކަމަށް އެޓީމުގެ ކޯޗު އަބްދުﷲ ނަޝީދު (އަބުޅޯ) ބުނެފި އެވެ.

ތައިލެންޑުގައި ކުރިއަށްދާ މި މުބާރާތަށް ޓީމު ފުރުމުގެ ކުރިން ރާއްޖެއެމްވީ އަށް މައުލޫމާތު ދެމުން އަބުޅޯ ބުނީ ރާއްޖެއިން މި މުބާރާތުގައި ވާދަކުރާ ޓީމަކީ ވަރަށް ޒުވާން ކުޅުންތެރިންގެ މައްޗަށް ހިމެނޭ ޓީމެއް ކަމަށާއި އަދި އެ ކުޅުންތެރިންނަކީ 16 އަހަރުން ދަށުގެ ކުޅުންތެރިން ކަމަށެވެ.

އޭނާ ބުނީ ރާއްޖޭގެ ކުޅުންތެރިންގެ އިތުރުން ދެން މި މުބާރާތުގައި ވާދަކުރާ ޓީމުގެ ކުޅުންތެރިންނަކީ 20 އަހަރާއި 19 އަހަރުން ދަށުގެ ކުޅުންތެރިން ކަމަށާއި އެހެން ކަމުން އެ ކުޅުންތެރިން ކައިރީގައި ރާއްޖޭގެ ކުޅުންތެރިންނަށް ކުޅުމަކީ ފަސޭހަ ކަމަކަށް ނުވާނެ ކަމަށެވެ.

މުބާރާތަށް ދިއުމުގެ ކުރިން މާލޭގައި ކުރިއަށް ގެންދިޔަ ފަރިތަކުރުންތަކުން އެ ކުޅުންތެރިންނަށް ގިނަ ކަންތައްތަކެއް ދަސްކޮށްދެވިފައިވާނެ ކަން ފާހަގަ ކުރަމުން އަބުޅޯ ބުނީ މުބާރާތުގައި ރާއްޖޭގެ ޓީމަށް ދިމާވާނެ ހަމައެކަނި ގޮންޖެހުމަކަށް ވާނީ އިސްކޮޅުގެ މައްސަލަ ކަމަށެވެ.

މި މުބާރާތުއި ވާދަކުރުމަށް ތައިލެންޑަށް ފުރާފައި ވަނީ މުހައްމަދު ރިމާޒާއި ހުސައިން ޝާހް އެވެ. ޓީމުގެ ކޯޗެއްގެ ގޮތުގައި ހަރަކާތްތެރިވާނީ ބީޗް ވޮލީ ކޮމިޝަންގެ ޗެއާމަންގެ މަގާމުވެސް އަދާކުރަމުން އަންނަ އަބްދުﷲ ނަޝީދު (އަބުޅޯ) އެވެ.

މި މުބާރާތް ކުރިއަށްދާނީ މާޗު މަހުގެ އެއްވަނަ ދުވަހުން ފެށިގެން ހަތަރުވަނަ ދުވަހުގެ ނިޔަލަށެވެ.