މާއޮއިސްޓުންގެ ހަމަލާއެއްގައި އިންޑިއާގެ 15 ފުލުހުންނާއި އާންމުންގެ މީހަކު މަރުވެއްޖެ
ހަމަލާ ދީފައިވަނީ އައިއީޑީއެއް ގޮއްވާލައިގެން
ބުދަ ދުވަހު މާއޮއިސްޓުން ދިން ހަމަލާ
އިންޑިއާގައި ޓެރަރިސްޓް ޖަމާއަތެއްގެ ގޮތުގައި ބަލާ މާއޮއިސްޓުން ދިން ހަމަލާއެއްގައި 15 ފުލުހުންނާއި، އާންމުންގެ މީހަކު މަރާލައިފިއެވެ.
އިންޑިއާގެ ކަމާއިބެހޭ ފަރާތްތަކުން ހާމަކޮށްފައިވާ ގޮތުގައި ބުދަ ދުވަހު މަހަރާސްތްރާގެ ގަޑްޗިރޯލީގައި ދެ ވެހިކަލަކަށް އަމާޒުކޮށް މި ހަމަލާ ދީފައިވަނީ އައިއީޑީއެއް ގޮއްވާލައިގެންނެވެ.
ގަޑްޗިރޯލީ އަކީ ނަކްސަލުންގެ ނަމުން މަޝްހޫރުވެފައިވާ މާއޮއިސްޓުންގެ ބާރު އެންމެ ބޮޑަށް އޮންނަ ޗައްތީޝްގަރާއި ބޯޑަރު ހިއްސާކުރާ ސަރަޙައްދެކެވެ. މި ދުވަސްވަރު ޗައްތީޝްގަރުގައި ވެސް މާއޮއިސްޓުންގެ ހަރަކާތްތައް އިތުރު ކޮށްފައިވާއިރު، މިހާރު ކުރިއަށްދާ އިންޑިއާގެ އާންމު އިންތިޚާބާއި ދިމާކޮށް، މާއޮއިސްޓުން ވަނީ ޗައްތީޝްގަރުގައި ޤާނޫނު ހަދާ މަޖިލީހުގެ މެންބަރަކު ވެސް ހިމެނޭގޮތަށް 10 މީހުން މަރާލާފައެވެ.
އިންޑިއާއަށް އަންނަމުންދާ ތަރައްޤީއިން ބާކީކޮށްފައިވާ މީހުންގެ ޙައްޤުގައި ކަމަށް ދައުވާކޮށް މާއޮއިސްޓުން އިންޑިއާ ސަރުކާރާއި ހަނގުރާމަ ކުރަމުންދާތާ އެތައް އަހަރެއް ވެފައިވާއިރު، އެމީހުންގެ ބާރު އޮންނަ ސަރަޙައްދުތަކުގައި ސަރުކާރުގެ އޮފިޝަލުންނާއި ފުލުހުން ހަރަކާތްތެރިވުމަށް އެފަރާތްތަކުން ވަނީ ހުރަސްއަޅާފައެވެ.
