ނަވާރަ ވަނަ މަޖިލީހުގެ ފުރަތަމަ ޖަލްސާގެ ރިޔާސަތު ބަލަހައްޓަވާނީ މީދޫ ދާއިރާގެ މެމްބަރު އަހުމަދު ސިޔާމް (ސަން ސިޔާމް) ކަމަށް ރައްޔިތުންގެ މަޖިލީހުން ބުނެފިއެވެ. 

ގާނޫނު ބުނާ ގޮތުން އާ މަޖިލީސް ހުވާކުރާއިރު ރިޔާސަތުގައި އިންނަވަން ޖެހޭނީ މަޖިލީހުގައި އެންމެ ގިނަ ދައުރު ފުރިހަމަކުރެއްވި މެމްބަރެކެވެ. ސިޔާމް ވަނީ މަޖިލީހުގައި ތިން ދައުރު ފުރިހަމަ ކުރައްވާފައެވެ. އަދި އޭނާ ވަނީ ހަތަރު ވަނަ ދައުރަށް މީދޫ ދާއިރާގެ މެމްބަރު ކަމަށް އިންތިޚާބު ވެފައެވެ. ނަމަވެސް ސިޔާމްއަކީ ފާއިތުވި އަހަރުތަކުގައި މަޖިލީހުގެ ޖަލްސާތަކަށް އެންމެ މަދުން ވަޑައިގަންނަވާ މެންބަރެވެ.

މަޖިލީހުގެ އިދާރާ އިން ބުނީ ނަވާރަ ވަނަ ރައްޔިތުންގެ މަޖިލީހުގެ މެމްބަރުން ހުވައި ކުރުމުގެ ކަންކަން އަންނަ މެއި މަހުގެ 28 ވަނަ ދުވަހުގެ ރޭ 9:30 ގައި ރައްޔިތުންގެ މަޖިލީހުގައި އޮންނާނެ ކަމަށެވެ. އަދި އެރޭ އާ މަޖިލީހުގެ ޖަލްސާއެއް ވެސް އޮންނާނެ ކަމަށެވެ. 

އެ އިދާރާ އިން ބުނީ އާ މަޖިލީހުގެ މެމްބަރުން މެމްބަރުކަމުގެ ހުވާ ކުރުމުގެ އިންތިޒާމް ހަމަޖެއްސުމަކީ މަޖިލީހުގެ ރައީސް ކުރައްވަން ޖެހޭ ކަމަކަށް ވާތީ ހުވާ ކުރުމަށް ވާންޖެހޭ ތައްޔާރީތައް އެ އިދާރާ އިން ކުރަމުންދާ ކަމަށެވެ. 

މަޖިލިސް އިންތިޚާބުގައި މެމްބަރުން ހޮވުމަށް ހޮނިހިރު ދުވަހު ބޭއްވި އިންތިޚާބުގައި 87 ދާއިރާއަކަށް މެމްބަރުން ވަނީ ހޮވާފައެވެ. 

އަށާރަވަނަ ރައްޔިތުންގެ މަޖިލީހުގެ 85 މެމްބަރުން ވެސް ހުވާ ކުރައްވާފައި ވަނީ 2014 ވަނަ އަހަރުގެ މެއި މަހުގެ 28 ގައެވެ. 

ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 81 ވަނަ މާއްދާގައި ވަނީ ރައްޔިތުންގެ މަޖިލީހުގެ މެންބަރު ކަމަށް އިންތިޚާބުވާ މީހަކު އެ މަޖިލީހުގެ މެންބަރު ކަމުގެ މަޤާމް ފުރަން ފެށުމުގެ ކުރިން އުއްތަމަ ފަނޑިޔާރުގެ ކުރިމަތީގައި ނުވަތަ އުއްތަމަ ފަނޑިޔާރު ކަނޑައަޅާ ފަނޑިޔާރެއްގެ ކުރިމަތީގައި ޤާނޫނުއަސާސީގެ ޖަދުވަލު 1 ގައިވާ ރައްޔިތުންގެ މަޖިލީހުގެ މެންބަރުންގެ ހުވައިކޮށް އެ ހުވައިގެ އިޤްރިރާރުގައި ސޮއިކުރައްވާނެ ކަމުގައެވެ. އަދި ޤާނުނު އަސާސީގެ 79 ވަނަ މާއްދާގެ (ހ) ގައި ވަނީ ރައްޔިތުންގެ މަޖިލީހުގެ ޢުމުރަކީ، މަޖިލިސް އިންތިޚާބު ކުރުމަށްފަހު ފުރަތަމަ ޖަލްސާ ކުރާ ތާރީހުން ފެށިގެން ފަސް އަހަރު ދުވަސް ކަމުގައެވެ. އަދި އެމުއްދަތު ހަމަވުމުން މަޖިލިސް އުވުނީ ކަމުގައެވެ. އުމުރު ހަމަވެގެން މަޖިލިސް އުވުމާއެކު އަލަށް އިންތިޚާބު ކުރާ ރައްޔިތުންގެ މަޖިލީހުގެ ފުރަތަމަ ޖަލްސާ ބާއްވަން ވާނެ ކަމުގައެވެ.

ޤާނޫނު އަސާސީގެ 82 ވަނަ މާއްދާގެ (ހ) ގައިވަނީ ޢާންމު އިންތިޚާބަށް ފަހު ބާއްވާ ރައްޔިތުންގެ މަޖިލީހުގެ ފުރަތަމަ ޖަލްސާގައި އެ މަޖިލީހުގެ މެންބަރުންގެ ތެރެއިން މެމަޖިލީހުގެ ރައީސަކާއި ނައިބު ރައީސެއް، އެ މަޖިލީހުގެ ސިއްރު ވޯޓަކުން އިންތިޚާބު ކުރަން ވާނެ ކަމުގައެވެ.

ރައްޔިތުންގެ މަޖިލީހުގެ ގަވައިދުގެ 208 ވަނަ މާއްދާގެ (ހ) ގައި ވަނީ މަޖިލީހުގެ މެންބަރުކަމަށް އިންތިޚާބުވާ މެންބަރުން ޤާނޫނު އަސާސީގެ 81 ވަނަ މާއްދާގައިވާ ގޮތުގެ މަތިން ކުރަންޖެހޭ މަޖިލީހުގެ މެންބަރު ކަމުގެ ޤާނޫނީ ހުވައި ކުރުމުގެ އިންތިޒާމް މަޖިލީހުގެ ރައީސް ހަމަޖައްސަވަން ވާނެ ކަމުގައެވެ.

މިފަހަރުގެ މަޖިލިސް އިންތިހާބުގައި އެމްޑީޕީން ވަނީ 60 އަށް ވުރެ ގިނަ ގޮނޑި ކާމިޔާބުކޮށް ބޮޑު ކާމިޔާބީއެއް ހޯދާފައެވެ. މަޖިލީހުގެ ރައީސްކަމާއި ނައިބު ރައީސް ކަމަށް ގެންނާނީ އެ ޕާޓީގެ މެންބަރުން ކަމަށް އެ ޕާޓީން ބުނެފައިވާއިރު މިހާތަނަށް ގިނަ ބޭފުޅުންތަކެއް ވަނީ އެކަމުގެ ޝައުގުވެރިކަން ފާޅުކުރައްވާފައެވެ.