އަމާނާ ތަކާފުލް އިން 22 އިންސައްތައިގެ ވިޔަފާރީގެ ކުރިއެރުމެއް ހޯދައިިފި
ޖުމްލަ ފައިދާގެ ގޮތުގައި 11 މިލިއަން ރުފިޔާ ލިބިފައިވޭ
އަމާނާ ތަކާފުލްގެ ޑިރެކްޓަރުންގެ ބޯޑް
އަމާނާ ތަކާފުލް މޯލްޑިވްސް ޕލކ އިން 22 އިންސައްތައިގެ ވިޔަފާރީގެ ކުރިއެރުމެއް މިދިޔަ އަހަރު ހޯދައިފިއެވެ.
މިއީ ދިވެހިރާއްޖޭގެ އިންޝުއަރަނަސް ސިނާއަތް ކުރިއެރި 14 އިންސައްތައާ އަޅާބަލާއިރު ރެކޯޑްކުރިއެރުމެކެވެ.
ޝަރީޢާގެ އުސޫލުން ރާއްޖޭގައި އިންޝުއަރަންސްގެ ހިދުމަތް ފޯރުކޮށްދޭ ހަމައެކަނި ކުންފުނީގެ ގޮތުގައި އަމާނާ ތަކާފުލް ރާއްޖޭގެ ހިއްސާގެ ބާޒާރުގައި ލިސްޓްކުރިތާ މިހާރު އަށް އަހަރު ވެފައިވާއިރު އެ ކުންފުނީގެ އަށް ވަނަ އަހަރީ އާންމު ޖަލްސާގައި ކުންފުނީގެ ޑިރެކްޓަރުންގެ ބޯޑުން ވަނީ ހިއްސާގެ ފައިދާ ހިއްސާދާރުންނަށް ބެހުމަށް ނިންމާފައެވެ.
2018 ވަނަ އަހަރުގެ މާލީ އަހަރު ނިމުނުއިރު ކުންފުނީގެ މާލީ ހިސާބުތައް ދައްކާ ގޮތުން އާމްދަނީގެ ގޮތުގައި 130 މިލިއަން ރުފިޔާ ލިބިފައި ވެއވެެ. އަދި ޖުމްލަ ފައިދާގެ ގޮތުގައި 11 މިލިއަން ރުފިޔާ ލިބިފައިވެއެވެ. އެއީ 2017 ވަނައަހަރުގެ އާމްދަނީ އާއި ވިޔަފާރި ފައިދާ އަޅާބަލާއިރު 23 އިންސައްތަ އާއި 113 އިންސައްތައިގެ ކުރިއެރުމެކެވެ.
މިދިޔަ އަހަރުގެ ކުރިއެރުންތައް އެންމެ ބޮޑަށް ބިނާވެފައި ވަނީ ކުންފުނީގެ މައިގަނޑު ވިޔަފާރިތަކުން ލިބުނު ކުރިއެރުންތަކާއި އަދި މާކެޓިންގ ހަރަކާތްތައް ރޭވުންތެރިކަމާ އެކު ހަރުދަނާ ގޮތެއްގައި ހިންގުމުގެ ސަބަބުން ކަމަށް އަމާނާގެ ޑިރެކްޓަރުންގެ ބޯޑުން ބުންޏެވެ.
އަމާނާ ތަކާފުލްއިން ވަނީ ހިއްސާދާރުންނަށް ހިއްސާގެ ފައިދާ ވިދިވިދިގެން އަށް ވަނަ އަހަރު ބެހުމަށް ނިންމާފައެވެ. އަދި 2018 ވަނަ އަހަރު ބެހި އިންޓެރިމް ޑިވިޑެންޑްއާ އެކު ރަސްމީ ޑިވިޑެންޑްއެއް ބެހުމަށް ކުންފުނީގެ އަހަރީ އާންމު ޖަލްސާއިން ވަނީ ނިންމާފައެވެ. އެގޮތުން ހިއްސާއެއްގެ މޫނުމަތީގެ އަގުގެ 15 އިންސަތައިގެ ފައިދާއެއް 2018 ގައި ނިމުނު މާލީ އަހަރުގައި ބެހުމަށް ވަނީ ނިންމާފައެވެ.
ހިއްސާދާރުންނަށް ހިއްސާގެ ފައިދާ ބެހުމުގެ ބޭނުމަށް ހިއްސާގެ ރަޖިސްޓްރީ ބަންދުކުރާ އެންމެ ފަހުގެ ތާރީޚަކީ 20 އެޕްރިލް 2019 އެވެ. އެމުއްދަތާއި ހަމައަށް ރަޖިސްޓްރީވެފައިވާ ހުރިހާ ހިއްސާދާރުންނަށް ހިއްސާގެ ފައިދާ ލިބޭނެ ކަމަށް އެކުންފުނިން ބުންޏެވެ.
އަމާނާ ތަކަފުލްގެ މެނޭޖިންގ ޑިރެކްޓަރ ހަރީޒް ސުލައިމާން ވިދާޅުވީ ހެޔޮ ހިންގުމުގެ ނިޒާމުގެ މާނައަކީ ރަނގަޅު ވިޔަފާރި، އެގޮތުން އަމާނާ ތަކާފުލް ދެމި އޮންނާނީ ވިޔަފާރީގެ އަޚްލާޤް އަދި ކޯޕަރޭޓް ގަވަނަންސް އޭގެ އެންމެ ފުރިހަމަ ގޮތުގައި ދަމަހައްޓާ އަދި އެމަގުން އެކަން ތަންފީޒުކުރުމާއި އެކު ހިރާސް މެނޭޖްކުރުން ހަރުދަނާކުރުމާއި ކުންފުނީގެ އެތެރޭގެ ހިންގުން ވަރުގަދަކުރުންމަތީ ކަމަށެވެ.
ކުންފުނީގެ ހިއްސާދާރުން ވަނީ ކުންފުނީގެ ބޯޑުގައި މިނިވަން ޑިރެކްޓަރެއްގެ ގޮތުގައި އިންނަވާ ޑރ.އަބްދުﷲ ޝިހާމް އާ ދައުރަކަށް އަލުން އިންތިޚާބުކޮށްފައެވެ.
މިއަހަރުގެ އަހަރީ އާންމު ޖަލްސާގައި ވެސް ވަނީ ކުންފުނީގެ ހިއްސާދާރުންނަށް ހިލޭ ޕަރސަނަލް އެކްސިޑެންޓް ކަވަރއެއް ދިނުމަށް ނިންމާފައެވެ.
ކުންފުނީގެ ބޯޑުގައި މިހާރު ތިއްބަވާ ޑިރެކްޓަރުންނަކީ، ތައްޔިބް އަކްބަރް އަކީ (ޗެއަރމަން)، އުސްމާން ކާސިމް، ދާތޯ މުހައްމަދު ފަޒްލީ ޔޫސުފް، ޑރ. އަބްދުﷲ ޝިހާމް، އަބްދުﷲ ކާސިމް އަދި ހަރީޒް ސުލައިމާން (މެނޭޖިންގ ޑިރެކްޓަރ) އެވެ.
