ރާއްޖެ އާއި ޗައިނާއާ ދެމެދު ފެށުނު މިނިވަން ވިޔަފާރީގެ އެއްބަސްވުމުގެ މަޝްވަރާތައް ނިންމާލައިފި އެވެ.

މިނިސްޓްރީ އޮފް އިކޮނަމިކް ޑިވަލޮޕްމަންޓުން ހޯމަ ދުވެހު ނެރުނު ބަޔާނެއްގައި ބުނެފައި ވަނީ މި އެއްބަސްވުންތައް ފަށާފައިވަނީ 08 ސެޕްޓެމްބަރ 2015 ގައި ކަމަށާއި މި މަޝްވަރާތައް ކުރިއަށް ގެންގޮސްފައި ވަނީ 2017 ވަނަ އަހަރުގެ ސެޕްޓެމްބަރ 15 އިން 16 އަށް ކަމަށެވެ. އަދި މި ވިޔަފާރި މަޝްވަރާތައް ކުރިއަށް ގެންގޮސްފައިވަނީ ޗައިނާގެ ބެއިޖިންގ ގައި ކަމަށާއި މަޝްވަރާތަކުގެ 5 ބައްދަލުވުމެއް ވަނީ ބާއްވާފައި ކަމަށް ބަޔާނުގައި ވެއެވެ.

މި އެއްބަސްވުމުގެ ސަބަބުން ދިވެހި މަސްވެރިންނާއި މަސް އަދި މަހުގެ ބާވަތްތައް އެކްސްޕޯޓް ކުރާ ފަރާތްތަކަށާއި އަދި ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް ދުނިޔޭގެ ބާޒާރުތަކުގައި ގިނަ ފުރުސަތުތަކެއް ހުޅުވިގެންދާނެ ކަމަށްވެސް ބަޔާނުގައި ވަނީ ބުނެފައެވެ. އަދި ދުނިޔޭގެ ބާޒާރުތަކުގައި ދިވެހިން ބާނާ މަސް ފަސޭހަކަމާއި އެކު އެކްސްޕޯޓް ކުރެވޭނެ އިންތިޒާމް ހަމަޖެއްސުމާއި މަހާއި މަހުގެ ބާވަތްތަކާއި ސީފުޑް އެކްސްޕޯޓް ކުރާ ފަރާތްތަކަށް ރަގަޅު އަގެއް ހޯދައިދިނުމަށް ސަރުކާރުން މަސައްކަތް ކުރައްވަމުން އަންނަ ކަމަށްވެސް ބަޔާނުގައި ވެއެވެ.

ކުދި އަދި މެދު ފަންތީގެ ވިޔަފާރީތަކަށް ބައިނަލްއަގްވާމީ ބާޒާރުގައި ފަސޭހަ ކަމާއިއެކު ވިޔަފާރި ކުރެވޭނެ އިންތިޒާމްތައް ހަމަޖައްސައިދިނުމަށާއި ރާއްޖޭގެ ފަތުރުވެރިކަމުގެ ސިނާއަތަށް ކުރިއެރުން ލިބޭނެ އިތުރު ފުރުސަތުތައް ފަހިކޮށްދިނުމާއި މާލީ އަދި ބޭންކިންގ ގެ ވިޔަފާރީގައި، ދިވެހި ވިޔަފާރިވެރިންނަށް މުއާމަލާތް ކުރެވޭނެ މަގުތައް ހޯދައި ދިނުމަށް މަޝްވަރާ ތަކުގައި ސަރުކާރުން އިސްކަންދޭ ކަމަށް ބަޔާނުގައި ވަނީ ބުނެފައެވެ.

ޗައިނާގެ އިތުރުން އެމެރިކާ، ޔޫރަޕް، ޔޫރަޕިއަން ޔޫނިއަން އަދި ޖަޕާން ފަދަ ޤައުމުތަކަށް މިނިވަން ވިޔަފާރީގެ ވާހަކަތައް ކުރިއަށް ގެންދިއުމަށް ސަރުކާރުގެ ފަރާތުން ވަނީ އެ ޤައުމުތަކަށް ދައުވަތު ދީފައެވެ.