ފިސްތޯލައެއް ގެންގުޅުނު މައްސަލާގައި ކުރީގެ ނައިބް ރައީސް އަހުމަދު އަދީބުގެ މައްޗަށް އިއްވި ޖަލު ހުކުމް ސާބިތު ނުވާ ކަމަށާއި އެހެން ކަމުން އެ މައްސަލަ ބާތިލް ކޮށްދިނުމަށް ދައުލަތުގެ ފަރާތުން ސުޕްރީމް ކޯޓުގައި އެދެފިއެވެ.

އެމައްސަލައިގެ އިސްތިއުނާފު އަޑުއެހުންތައް ސުޕްރީމް ކޯޓުގައި އާދީއްތަ ދުވަހު ބާއްވާފައިވާއިރު  އަދީބު ފިސްތޯލައެއް ގެންގުއްވި މައްސަލާގައި ދަށު ކޯޓުން އޭނާގެ މައްޗަށް ވަނީ 10 އަހަރުގެ ޖަލު ހުކުމެއް އިއްވާފައެވެ.

 އިސްތިއުނާފުގެ އަޑުއެހުމުގައި ދައުލަތުން ވަނީ އަދީބުގެ މައްޗަށް އިއްވާފައިވާ ހުކުމް ބާތިލް ކޮށްދިނުމަށް ބޭނުންވާ ސަބަބުތައް ހާމަ ކޮށްފައެވެ.

އަދީބުގެ ވަކީލު ވިދާޅުވީ އެމަނިކުފާނަށް ކޮށްފައިވާ ހުކުމަކީ ބާތިލް ހުކުމެއްކަން އެނގޭ ކަމަށެވެ. އެގޮތުން އެމަނިކުފާނުގެ މައްޗަށް ހުކުމް ކޮށްފައިވަނީ ހަމައެކަނި ހެކިންގެ ހެކިބަހުގެ މައްޗަށް ކޮށްފައިވާ ހުކުމެއް ކަމަށާއި ހުށައެޅި ތިން ހެކިންގެ ތެރެއިން ދެ ހެއްކަކީ ހަތިޔާރު ވަކިކުރަން ނޭނގޭ ބައެއްކަން ޝަރީއަތަށް ސާބިތުވާ ކަމަށެވެ. އަދި ހެކިން ބުނެފައިވާ ފިސްތޯލައިގެ ޑިސްކްރިޕްޝަން ގާނޫނުލް އުގޫބާތުގައި ބުނާ ބުނުމަށް ނުފެތޭ ކަމަށާއި ގާނޫނު ބުނާގޮތުން ފިސްތޯލަ ނުވަތަ ބަޑި އަކީ 60 ފޫޓަށް ވަޒަން ދަތުރާއެއްޗަކަށް ވާން ޖެހޭ ކަމަށެވެ.

މިމައްސަލައިގެ އިސްތިއުނާފުގައި އަދީބު ވިދާޅުވީ އެމަނިކުފާނުގެ މައްޗަށް ކޮށްފައިވާ ދައުވާއަކީ ސިޔާސީ ދައުވާއެއް ކަމަށާއި ސިޔާސީ ގޮތުން އެމަނިކުފާނު ފްރޭމް ކޮށްފައިވާ ކަމަށެވެ. އަދި އެއީ އެމަނިކުފާނު 24 އޮކްޓޯބަރ 2015 ވަނަ ދުވަހު ހައްޔަރު ކުރުމަށް ފަހު ކުރި ދައުވާއެއް ކަމަށާއި އެމައްސަލައިގެ ހެކިވެރިން ސިއްރު ކުރީ ސިޔާސީ ކަމެއް ގޮތުގައި ދެކިގެން ކަމަށެވެ. 

ދައުލަތުގެ ވަކީލު ވިދާޅުވީ ދަށު ކޯޓުން އަދީބުގެ މައްޗަށް ކުށް ސާބިތު ކުރުމަށް ހުށައަޅާފައިވަނީ ޓެރަރިޒަމްގެ ގާނޫނުގެ (ރ)އަށް ރިއާޔަތް ކޮށް ކަމަށެވެ. އެމާއްދާގައި ބުނެފައިވާ ގޮތުން  އެކި ވައްތަރުގެ ބަޑި ނުވަތަ އެފަދަ ތަކެތީގެ ވަޒަން ނުވަތަ އެކިވައްތަރުގެ ބޮން ނުވަތަ އެފަދަ ގޮވާތަކެތި ސަރުކާރުގެ ހުއްދަނެތި ރާއްޖެއަށް އެތެރެކުރުން ނުވަތަ އެފަދަ ތަކެތި ރާއްޖޭގައި އުފެއްދުން ނުވަތަ ގެންގުޅުން ނުވަތަ ވިއްކުން ނުވަތަ އެކަކު އަނެކަކަށް ދީހެދުން ނުވަތަ ބެހެއްޓުން އެއީ ކުށެއް ކަމަށެވެ.

ދައުލަތުގެ ވަކީލު ވިދާޅުވީ ދަށު ކޯޓުގެ ހުކުމް ހައިކޯޓުން ތާއީދު ކޮށްފައިވީނަމަވެސް ތަފްސީލީ ގޮތުން  ހައިކޯޓުން ގޮތެއް ނިންމާފައި ނުވާ ކަމަށެވެ. އަދި އަދީބުގެ މައްޗަށް ކޮށްފައިވާ ހުކުމަކީ އެކަށީގެންވާ ހެކިތަކެއްގެ މައްޗަށް ބިނާކޮށް ކޮށްފައިވާ ހުކުމެއް ނޫންކަމަށް އެނގޭ ކަމަށެވެ. އެހެންކަމުން އެ ހުކުމް ބާތިލް ކޮށްދިނުމަށް ދައުލަތުން ވަނީ އެދިފައެވެ.

2016 ވަނަ އަހަރުގެ ޖޫން މަހުގެ 5 ވަނަ ދުވަހު އަދީބްގެ މައްޗަށް ކޮށްފައިވާ 10 އަހަރުގެ ހުކުމާއެކު ޖުމްލަ 33 އަހަރުގެ ޖަލު ހުކުމެއް ދަނީ ތަންފީޒު ކުރައްވަމުންނެވެ. އެހެން ކަމުން މިމައްސަލައިގެ ހުކުމް ސާބިތު ނުވާ ކަމަށް ސުޕްރީމް ކޯޓުން ކަނޑައަޅައިފިނަމަ ދެން އެމަނިކުފާނު ތަންފީޒު ކުރައްވަން ޖެހިވަޑައިގަންނަވަން ޖެހޭ 33 އަހަރުގެ ހުކުމް 23 އަހަރަށް ކުޑަވާނެއެވެ.