ހަބޭސް ބޮޑުބެރުގެ މީޑިއާ ޕާޓްނަރަކަށް ރާއްޖެޓީވީ
24 އެޕްރީލު 2019 | ބުދަ 10:04އެއްބަސްވުމުގައި ސޮއިކޮށްފައިވަނީ އަންގާރަ ދުވަހުގެ ރޭ
އެއްބަސްވުމުގައި ދެ ފަރާތުން ސޮއިކުރައްވަނީ
މަޝްހޫރު ބޮޑުބެރު ގްރޫޕް ހަބޭސްގެ މީޑިއާ ޕާޓްނަރަކަށް ރާއްޖެޓީވީ ވުމުގެ އެއްބަސްވުމުގައި ސޮއިކޮށްފިއެވެ.
ރާއްޖެޓީވީއާއި ހަބޭސް ބޮޑުބެރު ގްރޫޕާ ދެމެދު ސޮއިކުރި އެއްބަސްވުމަކީ ރާއްޖޭގައި ބޮޑުބެރާއި މިއުޒިކް ކުރިއެރުވުމަށް ގުޅިގެން މަސައްކަތް ކުރުމަށް ވެވުނު އެއްބަސްވުމެކެވެ. މި އެއްބަސްވުމުގެ ދަށުން ހަބޭސް ބޮޑުބެރު ގްރޫޕުން ބޮޑުބެރު ކުރިއެރުވުމަށް ކުރާ މަސައްކަތުގައި ރާއްޖެޓީވީން ބައިވުމުގެ އިތުރުން ހަބޭސްއިން އުފައްދާ އުފެއްދުންތައް ޕްރޮމޯޓް ކުރުމުގައި ރާއްޖެޓީވީން ބައިވެރިވާނެއެވެ. އަދި ރާއްޖެޓީވީން ހިންގާ ހަރަކާތްތަކުގައި ހަބޭސްއިންވެސް ބައިވެރިވާނެއެވެ.
އަންގާރަ ދުވަހުގެ ރޭ ބޭއްވި ހަފްލާއެއްގައި މި އެއްބަސްވުމުގައި ސޮއިކޮށްފައިވަނީ ހަބޭސް ބޮޑުބެރު ގުރޫޕުގެ މަސްޢޫލުވެރިޔާ އަލީ ޝިފާޢު އާއި ރާއްޖެ ޓީވީގެ މެނޭޖިންގް ޑިރެކްޓަރ އަދި 19 ވަނަ ރައްޔިތުންގެ މަޖިލީހުގެ ހޯރަފުށީދާއިރާގެ މެމްބަރު އަހްމަދު ސަލީމް (ސައްލެ) އެވެ.
ހަބޭސް މިހާރު ރާއްޖޭގެ މަޝްހޫރު ބްރޭންޑަކަށް ވެފައިވާއިރު ހަބޭސް އަކީ ރާއްޖޭގެ ޒުވާނުންގެ މެދުގައިވެސް އެންމެ މަޤްބޫލް އެއް ބޭންޑެވެ. ހަބޭސް ބޮޑުބެރު ގްރޫޕްގެ އިތުރުން ހަބޭސް ލެވިޓޭޝަން ބޭންޑާއި، ހަބޭސް ފިއުޝަންއަކީ ހަބޭސްގެ ދަށުން ހިނގަމުން އަންނަ ބޭންޑުތަކެވެ. އަދި ރާއްޖޭގެ މަޝްހޫރު ޓްރެފިކް ޖޭމާއި ހަބޭސް ގުޅިގެން މަސައްކަތް ކުރުމަށް ވަނީ ނިންމާފައެވެ. މީގެކުރިންވެސް ހަބޭސް ބޮޑުބެރު ގްރޫޕާއި ރާއްޖެޓީވީ އާއި އެކު އެއްބަސްވުމެއްގައި ސޮއި ކުރެވުނެވެ.
