ރާއްޖެޓީވީގެ އަހަރު ޝަހުސިއްޔަތަކަށް ކުރީގެ ރައީސް މުހައްމަދު ނަޝީދު

ރާއްޖެޓީވީގެ 2016 ވަނަ އަހަރުގެ ޝަހުސިއްޔަތަކަށް ކުރީގެ ރައީސުލްޖުމްހޫރިއްޔާ ހޮވިއްޖެ އެވެ. 2016 ވަނަ އަހަރުގެ ޝަހުސިއްޔަތު ހޮވުމަށް ރާއްޖެޓީވީން ހަތަރު ނަމެއް ބެލުންތެރިންނަށް ދޫކޮށްލައި، އެސްއެމްއެސް އަދި ޓުވިޓާރ، ފޭސްބުކް މެދުވެރިކޮށް ވޯޓްލުމުގެ ފުރުސަތު ހުޅުވާލި އެވެ.

އެގޮތުން ރާއްޖެޓީވީގެ 2016 ވަނަ އަހަރުގެ ޝަހުސިއްޔަތު ކަމަށް ވާދަކުރެއްވި ހަތަރު ބޭފުޅުންނަކީ ކުރީގެ ރައީސުލްޖުމްހޫރިއްޔާ މުހައްމަދު ނަޝީދާއި، ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމްގެ އިތުރުން އެމްއެމްޕީއާރުސީގެ ހިޔާނަތް ފަޅާއަރުވާލި ޤާސިމް އަބްދުއް ކަރީމާއި، ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފް އެވެ.

އެ ހަތަރު ބޭފުޅުންގެ ނަމަށް ވޯޓުލުމުގެ ފުރުސަތު ހުޅުވާލުމުން، ބެލުންތެރިން އަހަރު ޝަހުސިއްޔަތަކަށް ހޮވާފައިވަނީ ކުރީގެ ރައީސުލްޖުމްހޫރިއްޔާ މުހައްމަދު ނަޝީދު އެވެ. އެގޮތުން ރައީސް މުހައްމަދު ނަޝީދަށް، ބެލުންތެރިންގެ ވޯޓުގެ 79.6 އިންސައްތަ ލިބުނުއިރު، މިހާރުގެ ރައީސުލްޖުމްހޫރިއްޔާ އަބްދުﷲ ޔާމީނަށް ލިބިވަޑައިގެންނެވީ އެންމެ 0.7 އިންސައްތަ ވޯޓު އެވެ. އެ ދެ ބޭފުޅުންގެ އިތުރުން ވާދަކުރެއްވި ޤާސިމް އަބްދުލް ކަރީމަށް 10.9 އިންސައްތަ ބެލުންތެރިން އަހަރުގެ ޝަހުސިއްޔަތު ކަމަށް ވޯޓުދެއްވިއިރު، އަހުމަދު މަހުލޫފަށް ބެލުންތެރިންދެއްވާފައި ވަނީ 8.8 އިންސަތަ ވޯޓެވެ.

ރާއްޖެޓީވީގެ އަހަރުގެ ޝަހުސިއްޔަތު ކަމަށް ހޮވުނު ރައީސް މުހައްމަދު ނަޝީދަށް ސްޓޭޝަނާއި، ބެލުންތެރިންގެ ނަމުގައި ހާއްސަ މަރުހަބާއެއް ދަންނަވަމެވެ. ރައީސް މުހައްމަދު ނަޝީދު ވަނީ ނިމުނު 2016 ވަނަ އަހަރުގައި ރާއްޖެގެ ސިޔާސީ މަޝްރަހުގައި މުހިންމު ރޯލެއް ކުޅުއްވާފަ އެވެ. އެގޮތުން ރައްޔިތުންނަށް ރައްޔިތުންގެ ހައްޤުތައް ހޯދައިދީ، ރައްޔިތުން ބާރުވެރިކުރުމަށް ރާއްޖެއިން ބޭރުގައި ހުންނަވާ ރައީސް ނަޝީދު ހާއްސަ މަސައްކަތްތަކެއް ކުރައްވާފައި ވެއެވެ.