މޯލްޑިވްސް މީޑިއާ ކައުންސިލްގެ ހުސްވެފައިވާ މަގާމަށް މެންބަރަކު އިންތިޚާބް ކުރުމަށް ބާއްވާ ވޯޓް ނެގެން ފަސްކޮށްފިއެވެ.

މީޑިއާ ކައުންސިލްގައި މީޑިއާތައް ތަމްސީލްކުރާ އަށް މެންބަރުންގެ ތެރެއިން އެއް މެންބަރަކު އިސްތިއުފާ ދިނުމާ ގުޅިގެން އެންމެ ފުރަތަމަ އިންތިޚާބުގެ ވޯޓުލުން ބާއްވަން ނިންމީ ޖެނުއަރީ 28 ވާ ހޮނިހިރު ދުވަހުއެވެ. އަދި ރެޖިސްޓްރީކުރުން ޖެނުއަރީ 23، 24 އަދި 25 ގައި ކުރިއަށް ގެންދަން ނިންމާފައި ވަނިކޮށް ފަސްކުރިކަން ކެންޑިޑޭޓުންނަށް އެނގުނީ ވޯޓުލުމަށް ރަޖިސްޓްރީކުރުމަށް ހޯމް މިނިސްޓްރީ އަށް ދިޔުމުންނެވެ.

ހޯމް މިނިސްޓްރީން ބުނީ އިންތިޚާބު ފަސްކުރީ ނޫން ކަމަށާއި އިންތިޚާބުގެ ވޯޓު ނަގާ ދުވަސް ފަސްކުރީ ކަމަށެވެ. އެހެން ކަމުން ބާއްވަނީ އާ އިންތިޚާބަކަށް ނުވާތީ ކުރިމަތިލުމަށް ހުޅުވާނުލާނެ ކަމަށް ވެސް މިނިސްޓްރީން ބުންޏެވެ.

މި އިންތިޚާބުގައި ވޯޓުލުމަށްޓަކައި ރަޖިސްޓްރީ ކުރުން މިހިނގާ ޖެނުއަރީ މަހުގެ 30، 31 އަދި މާރޗް މަހުގެ 01 ވަނަ ދުވަހުގެ ހެނދުނު 9:00 އިން 12:00 އަށް ހޯމް މިނިސްޓްރީގައި ކުރިއަށް ދާނެ ކަމަށް މިނިސްޓްރީ އޮފް ހޯމް އެފެއާޒްއިން މައުލޫމާތު ދެއެވެ.

ވޯޓުލުމަށް ރަޖިސްޓްރީ ކުރުމަށް ދާއިރު ދިވެހި ރައްޔިތެއްކަން އަންގައިދޭ ކާޑާއި، ތަމްސީލްކުރާ މީޑިއާގެ ތައްގަނޑު ޖެހި ލިޔުމެއް ހުށަހަޅަން ޖެހެއެވެ.

މޯލްޑިވްސް މީޑިއާ ކައުންސިލްގެ މެންބަރު ކަމަށް ވޯޓުދެވޭނީ މިނިސްޓްރީގައި ރަޖިސްޓްރީކޮށްފައިވާ ނޫސްތަކާއި ބްރޯޑްކާސްޓަރުންގެ ތެރެއިން ކޮންމެ ފަރާތެއް ތަމްސީލްކުރާ އެކަކަށް ކަމަށް އިއުލާންގައި ވެއެވެ.

މީޑިއާ ކައުންސިލަށް މީޑިއާގެ ފަރާތުން ކުރިމަތިލާފައިވަނީ ރާއްޖެ ޓީވީގެ ފަރާތުން އަލީ ޔޫސުފް އާއި ޗެނަލް 13 ގެ ފަރާތުން މުހައްމަދު ނިޔާޒްއެވެ.