ހޮނިހިރު ދުވަހު ލަންކާއަށް ދިން ބޮމުގެ ހަމަލާތައް ދޭނެ ކަމުގެ އިންޒާރު އެ ގައުމުގެ ސަލާމަތީ ބާރުތަކަށް ލިބިފައިވާ ކަމަށް އެ ގައުމުގެ ބޮޑުވަޒީރު ރަނިލް ވިކްރަމަސިންހަ ވިދާޅުވެއްޖެއެވެ.

ކުރިޔާލާ ހަމަލާގެ އިންޓެލިޖެންސް ލިބިފައިވާ އިރު، އެ މަނިކުފާނާ ހަމައަށް މި މައުލޫމާތު އައިސްފައި ނުވާ ކަމަށާއި، މި ކަމަކީ ވެސް މިހާރު ހިނގަމުންދާ ތަހުގީގު ތެރޭގައި ބައްލަވާނެ ކަންކަން ކަމަށް ރަނިލް ވިދާޅުވިއެވެ. ކޮލަމްބޯގައި ގޮއްވާލި ބައެއް ތަންތަނަށް ޒިޔާރަތް ކުރުމަށް ފަހު ރަނިލް ވަނީ ލިބިފައިވާ ގެއްލުންތައް ބައްލަވާލައްވާފައެވެ.

ރަނިލްގެ އިތުރުން ސަރުކާރުގެ ދެ ވަޒީރަކު ވެސް މި ހަމަލާގެ މައުލޫމާތު ފުލުހުންނަށާއި އަސްކަރިއްޔާއަށް ލިބިފައިވާ ކަމަށް ވިދާޅުވި ކަމަށް ލަންކާގެ ނޫސްތަކުން ރިޕޯޓްކޮށްފައި ވެއެވެ.

މިހާތަނަށް ލިބިފައިވާ މައުލޫމާތަށް ބަލާއިރު، މި ހަމަލާގައި 215 މީހުން މަރުވެފައިވާ އިރު، 400 މީހުންނަށް ލިބުނު ޒަހަމްތަކަށް ފަރުވާ ދިިނުމަށް ހޮސްޕިޓަލުގައި އެޑްމިޓްކޮށްފައިވާ ކަމަށް އެ ގައުމުގެ ނެޝަނަލް ހޮސްޕިޓަލްސްގެ ތަރުޖަމާނު ވަނީ ވިދާޅުވެފައެވެ.

ހޮނިހިރު ދުވަހު ދިން ހަމަލާތަކުގައި ލަންކާގެ އަށް ސަރަހައްދެއްގައި ބޮން ގޮއްވާލާފައިވާ އިރު، އެންމެ ފުރަތަމަ ދިން ހަ ހަމަލާ ދީފައި ވަނީ ހެނދުނުގެ ވަގުތެއްގައި ވަރަށް ކައިރި ކައިރީގައެވެ. ހަމަލާތައް ދީފައިވަނީ ލަންކާގެ މަޝްހޫރު ހަތަރު ހޮޓަލަކަށާއި ތިން ޗާޗަކަށެވެ. އަދި ހަވީރު ގަޑީގައި ދިން އެއް ހަމަލާ ގިނަ އަދަދެއްގެ ދިވެހިން ދިރިއުޅޭ ދެހިވަލައިގައި ދީފައިވާ އިރު، އަނެއް ހަމަލާ ދީފައިވަނީ ތުހުމަތު ކުރެވޭ ފަރާތްތައް ހައްޔަރުކުރަން ފުލުހުން ހިންގި އޮޕަރޭޝަނެއްގެ ތެރެއިންނެވެ.

ލަންކާގެ ތާރީހުގައި ވެސް ދިން އެންމެ ނުރައްކާތެރި އެއް ޓެރަރިސްޓް ހަމަލާއާ ގުޅިގެން އެ ގައުމުގައި ކާފިއު އިއުލާންކޮށް މުޅި ގައުމު އޮތީ ކުއްލި ހާލަތުގައެވެ. މިއީ ތަމަޅަ ތައިގަރުންނާ އެކު ކުރި ދާހިލީ ހަނގުރާމަ ނިމުމަށް ފަހު ލަންކާގައި ހިނގައިދިޔަ އެންމެ ނުރައްކާތެރި ހާދިސާއެވެ.